ବଡ଼ବିଲ,୬ା୩(ଦେବପ୍ରିୟ ରଣା): କେନ୍ଦୁଝର ଜିଲା ବଡ଼ବିଲ ଥାନା ଅନ୍ତର୍ଗତ କଳିଙ୍ଗନଗରରେ ଭଡ଼ା ଘରେ ରହୁଥିବା ପୂର୍ଣ୍ଣମାସୀ ଦଳେଇ ନାମକ ଅବସରପ୍ରାପ୍ତ ମହିଳା କର୍ମଚାରୀଙ୍କ ଆକାଉଣ୍ଟରୁ ସାଢେ ୪ ଲକ୍ଷ ଟଙ୍କା ଠକେଇ ହୋଇଥିବା ନେଇ ଅଭିଯୋଗ ହୋଇଥିବା ବେଳେ ପୋଲିସ ଘଟଣାର ପର୍ଦ୍ଦାଫାଶ କରିଛି। ଘଟଣାରେ ସମ୍ପୃକ୍ତ ଦୁଇ ଅଭିଯୁକ୍ତ ତଥା ଦମ୍ପତିଙ୍କୁ ଗିରଫ କରି ସେମାନଙ୍କ ନିକଟରୁ ସମସ୍ତ ଟଙ୍କା ଉଦ୍ଧାର କରିବାରେ ସକ୍ଷମ ହୋଇଛି। ଏଥିସହ ପୋଲିସ ଅଭିଯୁକ୍ତ ଦ୍ୱୟଙ୍କ ନିକଟରୁ ଦୁଇଟି ମୋବାଇଲ ଜବତ କରିଥିବା ଜଣାପଡ଼ିଛି। ଗିରଫ ଦମ୍ପତି ହେଲେ କଳିଙ୍ଗନଗର ନ୍ୟୁ କଲୋନୀ ଅଞ୍ଚଳର ସ୍ତ୍ରୀ-ଭାଗ୍ୟଲକ୍ଷ୍ମୀ ଜେନା ଏବଂ ସ୍ବାମୀ-ଅବିନାଶ କର୍ମକାର।
ପ୍ରାପ୍ତ ସୂଚନାନୁଯାୟୀ, କଳିଙ୍ଗନଗର ନ୍ୟୁ କଲୋନୀରେ ପୂର୍ଣ୍ଣମାସୀ ଦଳେଇ ଭଡ଼ା ସୂତ୍ରରେ ରହୁଥିଲେ। ଗତ ୨ ତାରିଖ ଶନିବାର ପୂର୍ଣ୍ଣମାସୀ ତାଙ୍କ ବ୍ୟାଙ୍କ ଆକାଉଣ୍ଟ ଅପଡେଟ କରିବାରୁ ତାଙ୍କ ଆକାଉଣ୍ଟରୁ ତା’ ୨୦.୦୧.୨୦୨୪ରିଖ ଠାରୁ ତା୦୨.୦୩.୨୦୨୪ ରିଖ ମଧ୍ୟରେ ଏକାଧିକବାର ଟ୍ରାଞ୍ଜାକ୍ସନ ହୋଇ ମୋଟ ସାଢ଼େ ୪ ଲକ୍ଷ ଟଙ୍କା ଅନ୍ୟ ଆକାଉଣ୍ଟକୁ ଯାଇଥିବା ଜାଣିବାକୁ ପାଇଥିଲେ। ଏଥିରୁ ସେ ବ୍ୟାଙ୍କ ଆକାଉଣ୍ଟରୁ ଠକେଇ ହୋଇଥିବା ଜାଣିବାକୁ ପାଇ ତୁରନ୍ତ ବଡ଼ବିଲ ଥାନାରେ ଲିଖିତ ଅଭିଯୋଗ କରିଥିଲେ। ବଡ଼ବିଲ ପୋଲିସ ଏ ନେଇ କେସ୍ ନଂ ୧୦୩/୨୪ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା ବେଳେ ଆସାମ ଏବଂ ରାଜସ୍ଥାନର ଦୁଇଟି ଆକାଉଣ୍ଟକୁ ଉକ୍ତ ଟଙ୍କା ଟ୍ରାନ୍ସଫର ହୋଇଥିବା ଜଣାପଡ଼ିଥିଲା। ପୁଣି ସେହି ଆକାଉଣ୍ଟଗୁଡ଼ିକରୁ ପୂର୍ଣ୍ଣମାସୀ ଭଡ଼ାରେ ରହୁଥିବା ଗୃହମାଲିକଙ୍କ ଝିଅ ଭାଗ୍ୟଲକ୍ଷ୍ମୀ ଏବଂ ଜ୍ୱାଇଁ ଅବିନାଶ କର୍ମକାରଙ୍କ ଆକାଉଣ୍ଟକୁ ଟ୍ରାନ୍ସଫର ହୋଇଥିବା ଜଣାପଡ଼ିଥିଲା। ପୋଲିସ ଅଭିଯୁକ୍ତ ଦ୍ୱୟଙ୍କ ଥାନାକୁ ଆଣି ପଚରାଉଚରା କରିବାରୁ ସେମାନେ ଦୋଷ ସ୍ବୀକାର କରିଥିବା ପୋଲିସ କହିଛି। ତେବେ ଠକେଇ ହୋଇଥିବା ସମସ୍ତ ଟଙ୍କା ଉଦ୍ଧାର କରିବାକୁ ପୋଲିସ ସକ୍ଷମ ହୋଇଥିବା ବେଳେ ଅଭିଯୁକ୍ତ ଦ୍ୱୟଙ୍କର ଦୁଇଟି ମୋବାଇଲକୁ ପୋଲିସ ଜବତ କରିଥିବା ଜଣାପଡ଼ିଛି। ଏ ନେଇ ବୁଧବାର ସନ୍ଧ୍ୟାରେ ବଡ଼ବିଲ ଏସ୍ଡିପିଓ ପ୍ରିୟରଞ୍ଜନ ଛୋଟରାୟ ପ୍ରେସ୍ ବିବୃତି ଦେଇ କହିଛନ୍ତି ଯେ, ଅଭିଯୁକ୍ତ ଦ୍ୱୟଙ୍କୁ କୋର୍ଟ ଚାଲାଣ କରାଯାଇଛି ଓ ଏହି ଘଟଣାର ତଦନ୍ତ ଏବେବି ଜାରି ରହିଛି। ଟଙ୍କା ଟ୍ରାନ୍ସଫର ହୋଇଥିବା ଆକାଉଣ୍ଟ ଦ୍ୱୟ କାହାର ତାହା ତଦନ୍ତାଧିନ ରହିଛି। ପ୍ରେସ ବିବୃତି ସମୟରେ ବଡ଼ବିଲ ଥାନା ଇନ୍ସପେକ୍ଟର ରମାକାନ୍ତ ମୁଦୁଲି ଉପସ୍ଥିତ ରହିଥିଲେ।