ଅକ୍ଲାଣ୍ଡ,୧୯।୯: ପାକିସ୍ତାନ ଗସ୍ତରୁ ନ୍ୟୁଜିଲାଣ୍ଡ କ୍ରିକେଟ ଦଳର ଓହରିବା ନିଷ୍ପତ୍ତିକୁ ସମର୍ଥନ କରିଛି ନ୍ୟୁଜିଲାଣ୍ଡ କ୍ରିକେଟ ଖେଳାଳିଙ୍କ ଆସୋସିଏଶନ୍ (ଏନ୍ଜେଡ୍ସିପିଏ)। ଦଳର ପ୍ରସ୍ଥାନ ପୂର୍ବରୁ କିଛି ଖେଳାଳିଙ୍କୁ ଜୀବନରୁ ମାରି ଦେବାକୁ ଧମକ ଦିଆଯାଇଥିଲା। କିନ୍ତୁ ଏହାକୁ ସେତେବେଳେ ଗୁରୁତ୍ୱ ଦିଆଯାଇ ନ ଥିବା ଏନ୍ଜେଡ୍ସିପିଏ କାର୍ଯ୍ୟକାରୀ ମୁଖ୍ୟ ହିଥ ମିଲ୍ସ କହିଛନ୍ତି।
“ଗସ୍ତ ଆରମ୍ଭ ହେବାର କିଛି ସପ୍ତାହ ପୂର୍ବରୁ ଦୁଇ ତିନି ଜଣ ଖେଳାଳିଙ୍କୁ ଧମକ ଆସିଥିଲା। ଏହା ଥିଲା ଆମ ପାଇଁ ଏକ ଅସାଧାରଣ ଘଟଣା। କିନ୍ତୁ ସୋସିଆଲ ମିଡିଆରେ ଧମକ ଦିଆଯାଇଥିଲା, ଯାହାକୁ ଆମ ସୁରକ୍ଷା ବିଶେଷଜ୍ଞ ଯାଞ୍ଚ କରିବା ପରେ ଗୁରୁତର ସମସ୍ୟା ନ ଥିବା କହିଥିଲେ। କିନ୍ତୁ ହଠାତ୍ ସବୁ କିଛି ବଦଳି ଗଲା। ଦେଶ ଛାଡ଼ି ଚାଲିଯିବାର ନିଷ୍ପତ୍ତି ପାକିସ୍ତାନର କ୍ରିକେଟ ପ୍ରଶଂସକଙ୍କୁ ନିରାଶ କରିଛି, ଆମେ ବୁଝୁଛୁ। ମାତ୍ର ଖେଳାଳିଙ୍କ ସୁରକ୍ଷା ସବୁଠୁ ଆଗରେ। ନ୍ୟୁଜିଲାଣ୍ଡ କ୍ରିକେଟର ନିଷ୍ପତ୍ତିକୁ ଆମେ ସମ୍ପୂର୍ଣ୍ଣ ସମର୍ଥନ କରୁଛୁ” ବୋଲି ମିଲ୍ସ କହିଛନ୍ତି।
ଉଲ୍ଲେଖଯୋଗ୍ୟ, ପାକିସ୍ତାନ ବିପକ୍ଷ ପ୍ରଥମ ଦିନିକିଆ ମ୍ୟାଚ୍ର କିଛି ସମୟ ପୂର୍ବରୁ ପୂରା ଗସ୍ତ ବାତିଲ କରିବା ପରେ ୩୪ ଜଣିଆ ନ୍ୟୁଜିଲାଣ୍ଡ ଦଳ ରବିବାର ଦୁଇବାରେ ପହଞ୍ଚିଛି। ଅଷ୍ଟ୍ରେଲିଆ, କାନାଡା, ନ୍ୟୁଜିଲାଣ୍ଡ, ୟୁକେ ଓ ଆମେରିକାର ମିଳିତ ଇଣ୍ଟେଲିଜେନ୍ସ ଫାଇଭ୍ ଆଇ ନ୍ୟୁଜିଲାଣ୍ଡର ସରକାରଙ୍କୁ ସୁରକ୍ଷା ସମ୍ପର୍କୀତ ତଥ୍ୟ ପ୍ରଦାନ କରିଥିଲା, ଯାହାକୁ ନ୍ୟୁଜିଲାଣ୍ଡ କ୍ରିକେଟ ସହ ଶେୟାର କରାଯାଇଥିଲା। ଫଳ ସ୍ବରୂପ ବାତିଲ ହୋଇଥିଲା ନ୍ୟୁଜିଲାଣ୍ଡ ଦଳର ପାକିସ୍ତାନ ଗସ୍ତ।