କେନ୍ଦୁଝର,୫ା୧୦(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସଦର ଥାନା ଅଧୀନ ୨୦ ନମ୍ବର ଜାତୀୟ ରାଜପଥ ବାଲିଆଗୋଡ଼ା ନିକଟ ରାସ୍ତା ପାର୍ଶ୍ୱରେ ଅଟକି ରହିଥିବା ଟ୍ରକ ପଛପଟେ ଏକ ବାଇକ୍ ପିଟି ହୋଇଯାଇଥିଲା। ଫଳରେ ଦମ୍ପତି ଗୁରୁତର ହୋଇଛନ୍ତି। ସେମାନେ ହେଲେ ବାଲିଆଗୋଡ଼ା ଗ୍ରାମର ଅଜୟ ମହାରଣା ଏବଂ ତାଙ୍କ ସ୍ତ୍ରୀ ହେମଲତା ମହାରଣା।
ମିଳିଥିବା ସୂଚନା ମୁତାବକ, ଅଜୟ ସ୍ତ୍ରୀଙ୍କ ସହ କୌଣସି କାମରେ ବାଇକ୍ ଯୋଗେ ରାଇସୁଆଁ ଆସୁଥିବା ବେଳେ ଏସାର ପେଟ୍ରଲ ପମ୍ପ ନିକଟ ରାସ୍ତାରେ ଅଟକି ରହିଥିବା ଏକ ଟ୍ରକ ପଛପଟେ ପିଟି ହୋଇଯାଇଥିଲେ। ଫଳରେ ଦୁହେଁ ରାସ୍ତାରେ ଛିଡିକି ପଡ଼ି ଗୁରୁତର ହୋଇଥିଲେ। ଏନେଇ ସ୍ଥାନୀୟ ଲୋକେ ଆମ୍ବୁଲାନ୍ସକୁ ଜଣାଇଥିଲେ। ହେଲେ ଆମ୍ବୁଲାନ୍ସ ପହଞ୍ଚିବାରେ ବିଳମ୍ବ ହୋଇଥିଲା। ଫଳରେ ଲୋକେ ଦମ୍ପତିଙ୍କୁ ଗୁରୁତର ଉଦ୍ଧାର କରି କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ସେଠାରେ ମଧ୍ୟ ଚିକିତ୍ସାରେ ବିଳମ୍ବ ହେବାରୁ ହେମଲତା ଗୁରୁତର ହୋଇପଡିଥିଲେ। ପରେ ତାଙ୍କୁ କଟକ ବଡ଼ମେଡିକାଲ ସ୍ଥାନାନ୍ତର କରାଯାଇଛି। ଅଜୟ ସେଠାରେ ଚିକିତ୍ସିତ ହେଉଛନ୍ତି। ହେଲମତାଙ୍କ ମୁଣ୍ତ ପଛ ପଟେ ଗଭୀର ଆଘାତ ଲାଗିଥିଲେ ହେଁ ଚିକିତ୍ସାରେ ବିଳମ୍ବ ହେବାରୁ ଅତ୍ୟଧିକ ରକ୍ତସ୍ରାବ ହୋଇ ପୁତୁରାବୋହୂ ସଙ୍କଟାପନ୍ନ ହୋଇପଡିଥିବା କାକା କୁନାଲ ମହାରଣା ଅଭିଯୋଗ କରିଛନ୍ତି। ଏଥିପ୍ରତି ଜଲା ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।