ପୋଲସରା,୧୦ା୪: ଗରିବ ଅସହାୟ ଲୋକଙ୍କ ପାଇଁ ବିଭିନ୍ନ ଯୋଜନା କରି ବାଃ ବାଃ ନେଉଛନ୍ତି ରାଜ୍ୟ ସରକାର। ହେଲେ ସ୍ବାସ୍ଥ୍ୟ ସେବାରୁ ବଞ୍ଚିତ ହୋଉଛନ୍ତି ମଦନଙ୍କ ପରିବାର। ପୋଲସରା ବିଜ୍ଞାପିତ ଅଞ୍ଚଳ ପରିଷଦ ୫ ନମ୍ବର ୱାର୍ଡ ବାଲିଘାଇ ଗ୍ରାମରେ ବସବାସ କରନ୍ତି ମଦନ ଗୌଡଙ୍କ ପରିବାର। ପରିବାର କହିଲେ ୭ ଜଣ। ମଦନ ତଳ ଦିନେ ଦିନ ମଜୁରିଆ ଭାବେ କାମ କଲେ ଚଳୁଥିଲା ପରିବାର। ଏବେ କାମ କରିବାକୁ ସକ୍ଷମ ହେଉ ନାହାଁନ୍ତି ମଦନ। ୭ ବର୍ଷ ହେଲା ମଦନ ଓ ତାଙ୍କ ସ୍ତ୍ରୀ ଝୁନୁ ଉଭୟ ଏବେ ପାରାଲିସ ରୋଗରେ ପୀଡିତ। ସାନ ଝିଅ କୁନି ଅନ୍ଧ। ବଡ଼ ଝିଅ ଅନିତା ଯାହା କାମ କରେ ସେତିକିରେ ଚଳେ ପରିବାର। ଓଳିଏ ଖାଇଲେ ଆଉ ଓଳିଏ ଭୋକ ଉପାସରେ ବିତେ ଜୀବନ। ହେଲେ ବୃଦ୍ଧ ଦମ୍ପତିଙ୍କ ଚିକିତ୍ସା ଲାଗି ନାହିଁ ପାଖରେ ଟଙ୍କା। ଯାହା ଥିଲା ବିକି ଭାକି ଚିକିତ୍ସା କରାଇଲେ। କିନ୍ତୁ ଏବେ ଆଉ ଚିକିତ୍ସା କରି ପାରୁନାହାନ୍ତି। ଅନ୍ୟପଟେ ଏହି ଅସହାୟ ଗରିବ ପରିବାରକୁ ମିଳି ପାରିଲା ନାହିଁ ବିଜୁ ସ୍ବାସ୍ଥ୍ୟ କାର୍ଡ ଖଣ୍ଡେ। କୁନି ପଢ଼ିବାକୁ ଆଶା କରିଥିଲେ ମଧ୍ୟ ପାଖରେ ଟଙ୍କା ନଥିବାରୁ ତାହା ବାଧକ ସାଜୁଛି। କେବଳ ସରକାରୀ ସହାୟତାକୁ ଅପେକ୍ଷା କରିଛନ୍ତି ଏହି ଅସହାୟ ପରିବାର। ଯଦି ସରକାରୀ ଚିକିତ୍ସା ମିଳି ପାରନ୍ତା ତା’ହେଲେ ଭଲ ହୋଇ କାମ କରି ପରିବାରକୁ ଦୁଇ ମୁଠା ଖାଇବାକୁ ଦେଇପାରିଥାନ୍ତି ବୋଲି ମଦନ କୋହଭରା କଣ୍ଠରେ କହିଛନ୍ତି ।