ଟୋକିଓ, ୨୯ା୮: ଟୋକିଓ ପାରାଲିମ୍ପିକ ଗେମ୍ସରେ ଗ୍ରେଟ୍ ବ୍ରିଟେନର ଦମ୍ପତି ନିଲ୍ ଓ ଲୋରା ଫାଚି ସ୍ବର୍ଣ୍ଣ ପଦକ ଜିତିଛନ୍ତି। ତାହା ପୁଣି ୧୬ ମିନିଟ୍ର ବ୍ୟବଧାନରେ। ଦୁହେଁ ଟ୍ରାକ୍ ସାଇକ୍ଲିଂ ରେସ୍ରେ ହାତେଇଛନ୍ତି ଶୀର୍ଷ ସଫଳତା।
ନିଲ୍ ଓ ତାଙ୍କ ପାଇଲଟ ମ୍ୟାଟ୍ ରୋଥରହାମ୍ ବି ୧,୦୦୦ ମିଟର ଟାଇମ୍ ଟ୍ରାଏଲ୍ରେ ସାଥି ଆଥ୍ଲେଟ ଜେମ୍ସ ବଲ୍ ଓ ଲୁଇସ ଷ୍ଟିଓ୍ବାର୍ଟଙ୍କୁ ପଛରେ ପକାଇ ଏକ ନୂଆ ବିଶ୍ୱ ରେକର୍ଡ କରିଛନ୍ତି। କିଛି ମିନିଟ୍ ପରେ ଲୋରା ତାଙ୍କ ଟିମ୍ମେଟ୍ କୋରିନେ ହଲ୍ଙ୍କ ସହ ମିଶି ୩,୦୦୦ ମିଟର ପରସୁଟ୍ ଇଭେଣ୍ଟରେ ଟାଇଟଲ ଜିତିଥିଲେ। ନିଲ୍ ଏକ ସାକ୍ଷାତ୍କାରରେ କହିଛନ୍ତି, ଏହି ସଫଳତାକୁ ଦୁହେଁ ଭୁଲି ପାରିବି ନାହିଁ। ରିଓ ସଂସ୍କରଣରେ ମଧ୍ୟ ଆମେ ପଦକ ଜିତିଥିଲୁ। ସେଠାରେ ଲୋରା ସ୍ବର୍ଣ୍ଣ ଜିତିଥିବା ବେଳେ ମୁଁ ରୌପ୍ୟ ପାଇଥିଲି। ଏଥର ଦୁହେଁ ସ୍ବର୍ଣ୍ଣ ପଦକ ଜିତିଥିବାରୁ ଆମେ ଖୁବ୍ ଖୁସୀ।