କଟକ ଅଫିସ,୧୮ା୭-ରାଜ୍ୟର ଖୋର୍ଦ୍ଧା, ଗଞ୍ଜାମ, କଟକ, ଯାଜପୁର ପରି ୪ଟି ଜିଲା ଓ ରାଉରକେଲା ପୌରାଞ୍ଚଳକୁ ସରକାର ହଟ୍ସ୍ପଟ୍ ଭାବେ ଘୋଷଣା କରିଛନ୍ତି। ଏଠାରେ ଜୁଲାଇ ୩୧ ପର୍ଯ୍ୟନ୍ତ ଲକ୍ଡାଉନ ଜାରି କରାଯାଇଛି। ତେଣୁ ସେ ପର୍ଯ୍ୟନ୍ତ ଏହି ଅଞ୍ଚଳର ଜିଲା କୋର୍ଟ, ତଳକୋର୍ଟ ଓ ଟ୍ରିବ୍ୟୁନାଲ୍ଗୁଡ଼ିକ ବନ୍ଦ ରହିବ। ଶନିବାର ହାଇକୋର୍ଟର ଫୁଲ୍କୋର୍ଟରେ ଏହି ନିଷ୍ପତ୍ତି ହୋଇଛି। ଏହି ସମୟରେ କେବଳ ଅତି ଜରୁରୀ ମାମଲାର ଶୁଣାଣି ହୋଇପାରିବ। ଶୁଣାଣିର ଆବଶ୍ୟକତା ନେଇ ଜିଲାଜଜ୍ ନିଷ୍ପତ୍ତି ନେବେ। କେବଳ ଭର୍ଚୁଆଲ୍ ମୋଡ୍ (ଭିଡିଓ କନଫରେନ୍ସ) ଜରିଆରେ ଶୁଣାଣି ହେବ। ଏଥିପାଇଁ କୋର୍ଟର ସର୍ବନିମ୍ନ କର୍ମଚାରୀଙ୍କୁ ନିୟୋଜିତ କରାଯିବ। ଅନ୍ୟପକ୍ଷରେ ହାଇକୋର୍ଟରେ ମଧ୍ୟ କେବଳ ଜରୁରୀ ମାମଲାର ଶୁଣାଣି ହେବ। ସୀମିତ ସଂଖ୍ୟକ ବିଚାରପତି ନିୟୋଜିତ ହେବେ। ରୋଷ୍ଟର୍ ଡ୍ୟୁଟିରେ ଭର୍ଚୁଆଲ୍ ମୋଡ୍ରେ ଶୁଣାଣି ହେବ। ମୁଖ୍ୟ ବିଚାରପତି ଏ ନିଷ୍ପତ୍ତି ନେବେ। ଆଇନଜୀବୀ ଓ ମହକିଲଙ୍କୁ ଏଥିପାଇଁ ଡେପୁଟି ରେଜିଷ୍ଟ୍ରାର୍ (ଜୁଡିସିଆଲ୍)ଙ୍କ ନିକଟରେ ଆଗୁଆ ଆବେଦନ କରିବାକୁ ହେବ। ଲକ୍ଡାଉନରେ କେବଳ ଇ-ଫାଇଲିଂ ଏବଂ ଇ-ମେଲ୍ ଜରିଆରେ ହିଁ ନୂଆ ମାମଲା ପାଇଁ ଆବେଦନ ଗ୍ରହଣ କରାଯିବ। ହାଇକୋର୍ଟ, ଜିଲା କୋର୍ଟ, ତଳକୋର୍ଟ ଏବଂ ଟ୍ରିବ୍ୟୁନାଲର କାର୍ଯ୍ୟ ଅତି ସୀମିତ ରହୁଥିଲେ ମଧ୍ୟ କର୍ମଚାରୀଙ୍କୁ ମୁଖ୍ୟାଳୟ ଛାଡ଼ି ନ ଯିବା ପାଇଁ ନିର୍ଦ୍ଦେଶ ଦିଆଯାଇଛି। ଶନିବାର ରେଜିଷ୍ଟ୍ରାର୍ ଜେନେରାଲ ଏହି ନିର୍ଦ୍ଦେଶ ଜାରି କରିଛନ୍ତି।