ନୂଆଦିଲ୍ଲୀ,୨୫।୪: ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ବିରୋଧରେ ଦାଖଲ ହୋଇଥିବା ମାନହାନି ମାମଲାରେ ଦିଲ୍ଲୀ ପୋଲିସକୁ ତଦନ୍ତ ପାଇଁ ରୌଜ ଏଭେନ୍ୟୁ କୋର୍ଟ ଏକ ମାସ ସମୟ ଦେଇଛନ୍ତି। ଏହି ମାମଲାରେ ତଦନ୍ତ ଚାଲିଛି ବୋଲି ଦିଲ୍ଲୀ ପୋଲିସ କୋର୍ଟରେ କହିଛି। କେତେକ କ୍ଷେତ୍ରରେ ଏହାର ଉତ୍ତର ଏ ପର୍ଯ୍ୟନ୍ତ ଆସିନାହିଁ, ତେଣୁ ଦିଲ୍ଲୀ ପୋଲିସ କୋର୍ଟରୁ ସମୟ ମାଗିଥିଲା। ତେବେ କୋର୍ଟ ମେ’୨୫ରେ ଏହି ମାମଲାର ଶୁଣାଣି କରିବେ।
ସୂଚନାଯୋଗ୍ୟ, ମୁଖ୍ୟମନ୍ତ୍ରୀ ଗେହଲଟ ସଞ୍ଜୀବନୀ ଦୁର୍ନୀତିରେ କେନ୍ଦ୍ର ମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ ସମ୍ପୃକ୍ତ ଥିବା ଅଭିଯୋଗ ଆଣିଥିଲେ। ଯାହାପରେ ଶେଖାୱତ ଏହା ବିରୋଧରେ ମାନହାନି ମକଦ୍ଦମା ଦାୟର କରିଥିଲେ। ଶେଖାୱତ ଅଭିଯୋଗ କରିଛନ୍ତି,ଗେହଲଟ ତାଙ୍କ ନାମ ସଞ୍ଜୀବନୀ ସ୍କାମରେ ଯୋଡି ତାଙ୍କୁ ବଦନାମ କରିଛନ୍ତି। ରାଜନୈତିକ ଦୃଷ୍ଟିରୁ ମୋର ଭାବମୂର୍ତ୍ତିକୁ ଅପବିତ୍ର କରିବା ପାଇଁ ଏହା ଏକ ଷଡଯନ୍ତ୍ର।
