ମୁମ୍ବାଇ,୧୪ା୮: ବର୍ଷକ ତଳେ ମହାରାଷ୍ଟ୍ରର ବୁଲଧାନାରେ ଏକ ଗଣବଳାତ୍କାର ହୋଇଥିଲା। ଗୁରୁବାର ବୁଲଧାନାର ସ୍ବତନ୍ତ୍ର ଜିଲା ଏବଂ ଅଧିବେଶନ କୋର୍ଟ ଏହି ମାମଲାରେ ଦୁଇ ଅଭିଯୁକ୍ତଙ୍କୁ ମୃତ୍ୟୁଦଣ୍ଡ ଦେଇଛନ୍ତି। କୋର୍ଟଙ୍କ ନିଷ୍ପତ୍ତି ପରେ, ଚିଖାଲି ପୋଲିସ ଷ୍ଟେଶନର କର୍ମଚାରୀମାନେ ପୂରା ପୋଲିସ ଷ୍ଟେଶନକୁ ବଧୂବେଶରେ ସଜାଇ ବାଣ ଫୁଟାଇଥିଲେ।
୨୬ ଏପ୍ରିଲ ୨୦୧୯ ରାତିରେ ଚିଖାଲି ସହରରେ ୨ ଜଣ ଯୁବକ ୯ ବର୍ଷର ନାବାଳିକାଙ୍କୁ ବଳାତ୍କାର କରିଥିଲେ। ନାବାଳିକା ଜଣକ ତାଙ୍କ ମାତାପିତାଙ୍କ ସହ ଶୋଇଥିବା ବେଳେ ତାଙ୍କୁ ଉଠାଇ ନେଇ ଏକ ନିର୍ଜନ ସ୍ଥାନରେ ଯୁବକ ଦ୍ୱୟ ବଳାତ୍କାର କରିଥିଲେ।
ପୀଡ଼ିତାଙ୍କ ପିତାଙ୍କ ଅଭିଯୋଗରେ ଅଭିଯୁକ୍ତ ସାଗର ବିଶ୍ୱନାଥ ବୋରକର ଏବଂ ନିଖିଲ ଶିବାଜୀ ଗୋଲିତଙ୍କ ବିରୋଧରେ ବଳାତ୍କାର, ପକ୍ସୋ ଏବଂ ଅତ୍ୟାଚାର ମାମଲା ରୁଜୁ ହୋଇଥିଲା।
ଏହି ଜଘନ୍ୟ ଅପରାଧ ହେତୁ ସମଗ୍ର ଜିଲାରେ କ୍ରୋଧର ବହ୍ନି ଜଳୁଥିଲା। ଚିଖଲି ସହରରେ ନାଗରିକମାନେ ଅଭିଯୁକ୍ତଙ୍କୁ ଯଥାଶୀଘ୍ର ଧରିବା ପାଇଁ ଦାବି କରିଥିଲେ। ଏପରିକି ସହରକୁ ଗୋଟିଏ ଦିନ ପାଇଁ ସମ୍ପୂର୍ଣ୍ଣ ବନ୍ଦ କରାଯାଇଥିଲା।
ଏହି ଘଟଣା ପରେ ନାବାଳିକାଙ୍କ ଚିକିତ୍ସା କରିଥିବା ମହିଳା ଡାକ୍ତର କହିଛନ୍ତି ଯେ, ଔରଙ୍ଗାବାଦରେ ପୀଡ଼ିତାଙ୍କ ଦୁଇଟି ବଡ଼ ଅପରେଶନ କରାଯାଇଛି। ସେ କହିଛନ୍ତି ଯେ, ମୁଁ ଭଗବାନଙ୍କ ନିକଟରେ ପ୍ରାର୍ଥନା କରୁଛି ଏମିତି ଘଟଣା କାହା ସହ ନ ଘଟୁ।
ଚିଖାଲି ପୋଲିସ ଷ୍ଟେଶନର ଇନ୍ସପେକ୍ଟର ଗୁଲାବ୍ରାଓ ବାଗ୍ କହିଛନ୍ତି ଯେ, ପୀଡ଼ିତାଙ୍କ ମା’ଙ୍କ ମାନସିକ ଅବସ୍ଥା ଭଲ ନାହିଁ। ଚିଖାଲି ପୋଲିସର ସମସ୍ତ କର୍ମଚାରୀ ଏହି ପୀଡ଼ିତା ପରିବାରକୁ ସମସ୍ତ ସମ୍ଭାବ୍ୟ ସାହାଯ୍ୟ ସହଯୋଗ ପାଇଁ ଚେଷ୍ଟା କରିଥିଲେ। ଅଭିଯୁକ୍ତ ଦ୍ୱୟଙ୍କୁ ମୃତ୍ୟୁଦଣ୍ଡରେ ଦଣ୍ଡିତ କରିଥିବାରୁ ଖୁସିରେ ଚିଖାଲି ପୋଲିସ ଷ୍ଟେଶନର କର୍ମଚାରୀମାନେ ଏହାକୁ ବଧୂ ବେଶରେ ସଜାଇ ବାଣ ଫୁଟାଇଥିଲେ। ଭାରତ ଇତିହାସରେ ଏହା ପ୍ରଥମ ପୋଲିସ ଷ୍ଟେଶନ ହେବ ବୋଲି ସେ କହିଛନ୍ତି।