ନୂଆଦିଲ୍ଲୀ,୨୨।୬: ଭାରତୀୟ ସ୍ବଦେଶୀ ଟିକା କୋଭାକ୍ସିନ୍ର ତୃତୀୟ ପର୍ଯ୍ୟାୟ ପରୀକ୍ଷଣ ସମୀକ୍ଷା ବୈଠକର ତଥ୍ୟ ସାମ୍ନାକୁ ଆସିଛି। ଏହି ସମୀକ୍ଷା ବୈଠକରେ ପ୍ରକାଶ ପାଇଛି ଯେ, ଭାରତ ବାୟୋଟେକର ଟିକା କୋଭାକ୍ସିନ ୭୭.୮ ପ୍ରତିଶତ ପ୍ରଭାବଶାଳୀ ଅଟେ। ୨୫,୮୦୦ ଲୋକଙ୍କ ଉପରେ ପ୍ରଥମ ପର୍ଯ୍ୟାୟ ପରୀକ୍ଷା କରାଯାଇଥିଲା। ପରୀକ୍ଷାରେ ଏହି ଟିକା କରୋନାଠାରୁ କେତେ ରକ୍ଷାକାରୀ ତାହା ପରୀକ୍ଷଣ କରାଇଥିଲା। କୋଭିଡ ଟିକା ପାଇଁ ଭାରତ ବାୟୋଟେକର ଏକ୍ସପ୍ରେସନ ଅଫ ଇଣ୍ଟରେଷ୍ଟ (ଇଓଆଇ) ପ୍ରସ୍ତାବକୁ ବିଶ୍ୱ ସ୍ବାସ୍ଥ୍ୟ ସଂଗଠନ ଗ୍ରହଣ କରିଛି ଏବଂ ଟିକା ଅନୁମୋଦନ ସମ୍ବନ୍ଧରେ ଡକ୍ୟୁମେଣ୍ଟ ହସ୍ତାନ୍ତର ହେବା ପୂର୍ବରୁ ୨୩ ଜୁନ୍ରେ ଡବ୍ଲୁଏଚ୍ଓ ସହିତ ଏକ ବୈଠକ ଅନୁଷ୍ଠିତ ହେବ। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲୁଏଚ୍ଓ ) ଅନୁଯାୟୀ ଏହି ବୈଠକରେ ଉତ୍ପାଦର ସବିଶେଷ ସମୀକ୍ଷା କରାଯିବ ନାହିଁ, କିନ୍ତୁ ଟିକା ଉତ୍ପାଦନକାରୀଙ୍କ ନିକଟରେ ଟିକା ଗୁଣର ସଂକ୍ଷିପ୍ତ ବର୍ଣ୍ଣନା ଉପସ୍ଥାପନ କରିବାର ସୁଯୋଗ ମିଳିବ।