ନୂଆଦିଲ୍ଲୀ,୧୬।୭(ପି.ଟି.): ଇଂଲଣ୍ଡ ବିପକ୍ଷରେ ଖେଳାଯିବାକୁ ଥିବା ୬ ମ୍ୟାଚ୍ ବିଶିଷ୍ଟ ଘରୋଇ ସୀମିତ ଓଭର ସିରିଜ ବାତିଲ ହେବା ନିଶ୍ଚିତ ହୋଇଛି। କୋଭିଡ୍-୧୯ ମହାମାରୀ କାରଣରୁ ସେପ୍ଟେମ୍ବରରେ ଆୟୋଜନ ହେବାକୁ ଥିବା ଏହି ସିରିଜ ବାତିଲ ହେବ ଏକପ୍ରକାର ସ୍ପଷ୍ଟ ହୋଇଛି। ସେହିପରି ଆସନ୍ତାମାସରେ ଭାରତ ଆସିବାକୁ ଥିବା ନ୍ୟୁଜିଲାଣ୍ଡ ଏ’ ଦଳର ଗସ୍ତ ମଧ୍ୟ ବାତିଲ ହେବ। ତେବେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଏ ନେଇ ଆନୁଷ୍ଠାନିକ ଘୋଷଣା କରିନାହିଁ। କିନ୍ତୁ ଏହି ସିରିଜ ଗୁଡିକ ବାତିଲ ହେବା ଆଶା କରାଯାଉଛି।
ସେପ୍ଟେମ୍ବରରେ ଭାରତ ଗସ୍ତରେ ଆସିବାକୁ ଥିବା ଇଂଲଣ୍ଡ ୩ଟି ଲେଖାଏ ଦିନିକିଆ ଓ ଟି୨୦ ମ୍ୟାଚ୍ ଖେଳିବାର କାର୍ଯ୍ୟକ୍ରମ ରହିଛି। ବର୍ତ୍ତମାନର ପରିସ୍ଥିତିରେ ଇଂଲଣ୍ଡ ଭାରତ ଗସ୍ତ କରିବାକୁ ଚାହିଁବନି ବୋଲି ବିସିସିଆଇର ଜଣେ ବରିଷ୍ଠ ଅଧିକାରୀ ସ୍ପଷ୍ଟ କରିଛନ୍ତି। ଶୁକ୍ରବାର ବସିବାକୁ ଥିବା ବୋର୍ଡ ଆପେକ୍ସ କାଉନ୍ସିଲ ବୈଠକରେ ଭାରତର ଫ୍ୟୁଚର ଟୁର୍ସ ଆଣ୍ଡ୍ ପ୍ରୋଗ୍ରାମ ନେଇ ଆଲୋଚନା ହେବ। ଆଲୋଚନା ହେବା ପରେ ଏ ନେଇ ଏକ ଔପଚାରିକ ଘୋଷଣା କରାଯିବ। ଅଗଷ୍ଟରେ ଭାରତ ଗସ୍ତରେ ଆସିବାକୁଥିବା ନ୍ୟୁଜିଲାଣ୍ଡ ଏ’ ଗସ୍ତ ମଧ୍ୟ ବାତିଲ ହେବାର ସମ୍ଭାବନା ରହିଛି ବୋଲି ଅଧିକାରୀ ଜଣକ କହିଛନ୍ତି। ବ୍ରିଟେନର ଗଣମାଧ୍ୟମଗୁଡିକ ମଧ୍ୟ ଏ ନେଇ ଖବର ପ୍ରକାଶ କରିଛନ୍ତି। ଭାରତରେ ଏପର୍ଯ୍ୟନ୍ତ ୯ ଲକ୍ଷ ସଂକ୍ରମିତ ହୋଇଛନ୍ତି ଓ ପାଖାପାଖି ୨୫,୦୦୦ ମୃତ୍ୟୁବରଣ କରିଛନ୍ତି। ଯଦି ସେପ୍ଟେମ୍ବରରେ ପରସ୍ଥିତିରେ ସୁଧାର ଆସେ ତା’ହେଲେ ଇଂଲଣ୍ଡ ଭାରତ ଆସିବାର ସମ୍ଭାବନା ସୃଷ୍ଟି ହେବ। ଏଭଳି ପରସ୍ଥିତିରେ ମ୍ୟାଚ୍ ଆୟୋଜନ ହେବାର ସମ୍ଭାବନା କମ୍ ରହିଛି। ପୁଣି ଅଷ୍ଟ୍ରେଲିଆରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ମଧ୍ୟ ବାତିଲ ହେବା ନିଶ୍ଚିତ ମନେ ହେଉଛି। ଏପରିସ୍ଥଳେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆୟୋଜନ ହେବାର ସୁଯୋଗ ସୃଷ୍ଟି ହୋଇଛି। ଗତ ମାର୍ଚ୍ଚରେ ଭାରତ ଶେଷଥର ପାଇଁ ଦକ୍ଷିଣ ଆଫ୍ରିକା ବିପକ୍ଷରେ ସିରିଜ ଖେଳିଥିଲା। ତେବେ କରୋନା ଭାଇରସ୍ କାରଣରୁ ଏହାକୁ ଅଧାରୁ ବାତିଲ କରାଯାଇଥିଲା।
