ସିଡ୍ନୀ,୩୧।୧୨: ଚଳିତ ଆଶେସ ସିରିଜର ଆଗାମୀ ଟେଷ୍ଟରୁ ବାଦ୍ ପଡ଼ିଛନ୍ତି ଅଷ୍ଟ୍ରେଲିଆ ବ୍ୟାଟର ଟ୍ରାଭିସ୍ ହେଡ। ତାଙ୍କ କୋଭିଡ୍-୧୯ ରିପୋର୍ଟ ପଜିଟିଭ୍ ଆସିଥିବାରୁ ତାଙ୍କୁ ଆଇସୋଲେଶନରେ ରଖାଯାଇଛି। ତେବେ ଚଳିତ ସିରିଜ୍ରେ ସର୍ବାଧିକ ରନ୍ ସ୍କୋର କରିଥିବା ହେଡ୍ଙ୍କଠାରେ କୌଣସି ଲକ୍ଷଣ ଦେଖାଯାଉ ନାହିଁ। ଭିକ୍ଟୋରିଆ ସରକାରଙ୍କ ସ୍ବାସ୍ଥ୍ୟଗତ ନିୟମ ଅନୁଯାୟୀ ସେ ଏବେ ମେଲବୋର୍ନରେ ନିଜ ପାର୍ଟନରଙ୍କ ସହ ୭ ଦିନ ରହିବେ।
ଟେଷ୍ଟିଂ ନିୟମ ଅନୁଯାୟୀ ଖେଳାଳି, ସେମାନଙ୍କ ପରିବାର ଓ ସପୋର୍ଟ ଷ୍ଟାଫ୍ମାନଙ୍କର ଆରଟିପିସିଆର ପରୀକ୍ଷା ପ୍ରତିଦିନ କରାଯାଉଛି ବୋଲି କ୍ରିକେଟ ଅଷ୍ଟ୍ରେଲିଆ ତରଫରୁ କୁହାଯାଇଛି। ଦୁର୍ଭାଗ୍ୟବଶତଃ ହେଡ୍ଙ୍କ ରିପୋର୍ଟ ଶୁକ୍ରବାର ସକାଳେ ପଜିଟିଭ ଆସିଛି। ତାଙ୍କଠାରେ କୌଣସି ଲକ୍ଷଣ ଦେଖିବାକୁ ମିଳି ନ ଥିବାରୁ ବ୍ୟସ୍ତ ହେବାର ଆବଶ୍ୟକତା ନାହିଁ। ହୋବାର୍ଟରେ ଆୟୋଜନ ହେବାକୁଥିବା ପଞ୍ଚମ ଟେଷ୍ଟରେ ସେ ଖେଳିପାରନ୍ତି ବୋଲି କ୍ରିକେଟ ଅଷ୍ଟ୍ରେଲିଆ ପକ୍ଷରୁ କୁହାଯାଇଛି।
ହେଡ୍ ଏ ପର୍ଯ୍ୟନ୍ତ ଚଳିତ ସିରିଜରେ ୬୨ ରନ ହାରରେ ୨୪୮ ରନ ସଂଗ୍ରହ କରିଛନ୍ତି। ଗାବା ଟେଷ୍ଟରେ ସେ ଶତକ ହାସଲ କରିଥିଲେ। ବିକଳ୍ପ ବ୍ୟବସ୍ଥା ସ୍ବରୂପ ଚୟନକର୍ତ୍ତାମାନେ ମିଚେଲ ମାର୍ଶ, ନିକ ମାଡିନସନ ଓ ଜୋଶ ଇଙ୍ଗ୍ଲିସଙ୍କୁ ଦଳରେ ସାମିଲ କରିଛନ୍ତି। ଇଂଲଣ୍ଡ କ୍ୟାମ୍ପରେ ପୂର୍ବରୁ ଇଂଲଣ୍ଡ ହେଡ୍ କୋଚ୍ କ୍ରିସ୍ ସିଲଭରଉଡ କୋଭିଡ୍ ସଂକ୍ରମିତ ବ୍ୟକ୍ତିଙ୍କ ସଂସ୍ପର୍ଶରେ ଆସିଥିବାରୁ ମେଲବୋର୍ନରେ ରହିବେ। ଆଶେସ ସିରିଜର ପ୍ରଥମ ୩ଟି ଟେଷ୍ଟରେ ବିଜୟୀ ହୋଇ ଅଷ୍ଟ୍ରେଲିଆ ୩-୦ରେ ଅଗ୍ରଣୀ ହେବା ସହ ଆଗୁଆ ସିରିଜ ହାତେଇଛି।