ନୂଆଦିଲ୍ଲୀ, ୧୭।୯(ପି.ଟି.): ଆଗମୀ ଦିନରେ କୋଭିଡ୍-୧୯ ଭ୍ୟାକ୍ସିନ୍ ଉପଲବ୍ଧ ହେବାର ସମ୍ଭାବନା ଦୃଢ ହେବାରେ ଲାଗିଛି। ଏପରିସ୍ଥଳେ ଅଲିମ୍ପିକ୍ସରେ ଅଂଶଗ୍ରହଣ କରିବାକୁ ଯାଉଥିବାର ଆଥଲେଟ୍ଙ୍କୁ ଏ ନେଇ ଅଗ୍ରାଧିକାର ଦେବାକୁ ଆଥଲେଟିକ୍ସ ଫେଡେରେଶନ ଅଫ୍ ଇଣ୍ଡିଆ (ଏଏଫ୍ଆଇ) ବୁଧବାର ସରକାରଙ୍କୁ ଅନୁରୋଧ କରିଛି।
ଭାରତ ସମେତ ଏକାଧିକ ଦେଶ କରୋନା ଭାଇରସ୍ ଭ୍ୟାକ୍ସିନ ବିକଶିତ କରିବାକୁ ପ୍ରୟାସ ଜାରି ରଖିଛନ୍ତି। ଯଦି ଭ୍ୟାକ୍ସିନ ବିକଶିତ ହୁଏ ତେବେ ଭାରତ ସରକାର ଆଗରେ ରହି କାର୍ଯ୍ୟକରୁଥିବା ବ୍ୟକ୍ତିବିଶେଷ, ସୈନ୍ୟ ବିଭାଗ କର୍ମଚାରୀ ଓ କେତେକ ନିର୍ଦ୍ଦିଷ୍ଟ ବିଭାଗର କର୍ମଚାରୀଙ୍କୁ ଅଗ୍ରାଧିକାର ଦେବେ ବୋଲି ବିଚାର କରୁଛନ୍ତି।
ଆମେ ସରକାରଙ୍କ ସହ ଏ ନେଇ ଆଲୋଚନା କରିଛୁ ବୋଲି ଏଏଫ୍ଆଇ ଅଧ୍ୟକ୍ଷ ଆଦିଲେ ସୁମରିଓ୍ବାଲା କହିଛନ୍ତି। ଅଲିମ୍ପିକ୍ସରେ ଅଂଶଗ୍ରହଣ କରିବାକୁ ଯାଉଥିବା ଆଥଲେଟଙ୍କ ପାଇଁ ଭ୍ୟାକ୍ସିନ୍ ଉପଲବ୍ଧ କରାଇବାରେ ଅଗ୍ରାଧିକାର ଦେବାକୁ ଆମେ ସରକାରଙ୍କୁ ଅନୁରୋଧ କରିଛୁ ବୋଲି ଏକ ଓ୍ବେବିନାରରେ ଯୋଗଦେଇ ସେ କହିଛନ୍ତି। ଯଦି ଭ୍ୟାକ୍ସିନ ବାହାରେ ତା’ହେଲେ ପ୍ରଥମ ପର୍ଯ୍ୟାୟରେ ଆଥଲେଟଙ୍କୁ ଦିଆଯିବ ବୋଲି ନିଶ୍ଚିତ ହେବା ପାଇଁ ଆମେ ସରକାରଙ୍କୁ କହିଛୁ। ଭ୍ୟାକ୍ସିନ ପାଇବାକୁ ଆଥଲେଟମାନେ ଅପେକ୍ଷା କରିଛନ୍ତି ବୋଲି ଜାତୀୟ ବ୍ୟାଡମିଣ୍ଟନ କୋଚ୍ ପୁଲେଲା ଗୋପୀଚାନ୍ଦ କହିଛନ୍ତି। ଭ୍ୟାକ୍ସିନ ପାଇଲେ ଆଥଲେଟଙ୍କ ଆତ୍ମବିଶ୍ୱାସ ବୃଦ୍ଧି ପାଇବ ବୋଲି ସେ କହିଛନ୍ତି।
ସାରା ବିଶ୍ୱ ଏହି ମହାମାରୀ ସହ ଲଢୁଛି। ତେଣୁ ମିଳିବାକୁ ଥିବା ଭ୍ୟାକ୍ସିନ ଆଥଲେଟ୍ଙ୍କ ପ୍ରଦର୍ଶନରେ ଉନ୍ନତି ଆଣିବାରେ ସହାୟ ହେବନି ବୋଲି ବିଶ୍ୱ ନିଶା ନିବାରଣ ସଂସ୍ଥା (ଓ୍ବାଡ଼ା) ହୃଦୟଙ୍ଗମ କରିଥିବ । ତେଣୁ ଡୋପ୍ କଣ୍ଟ୍ରୋଲ ନେଇ କୌଣସି ସମସ୍ୟା ରହିବା ଉଚିତ ନୁହେଁ ବୋଲି ସୁମରିଓ୍ବାଲା କହିଛନ୍ତି।