ଛତ୍ରପୁର,୨୪ା୯(ଡି.ଏନ୍.ଏ.): ଗଞ୍ଜାମ ଜିଲାରେ କରୋନା ସ୍ଥିତିରେ ସୁଧାର ଆସିଛି। ଏହି ପରିପ୍ରେକ୍ଷୀରେ କୋଭିଡ୍ ସପ୍ତାହ ପାଳନ କାର୍ଯ୍ୟକ୍ରମ ଗୁରୁବାରଠାରୁ ଆରମ୍ଭ ହୋଇଛି। ଏହା ଅକ୍ଟୋବର ୧ ପର୍ଯ୍ୟନ୍ତ ଚାଲିବ। ବର୍ତ୍ତମାନ ସମୟରେ ଜିଲାରେ କରୋନା ସଂକ୍ରମଣ କମିଆସିଛି ସତ କିନ୍ତୁ ଏହା ସମ୍ପୂର୍ଣ୍ଣରୂପେ ଲୋପ ହୋଇନାହିଁ। ଜିଲାବାସୀଙ୍କୁ ସତର୍କ କରାଇବା ପାଇଁ ଛତ୍ରପୁର ଗାଁରେ ଆୟୋଜିତ କୋଭିଡ୍ ସଚେତନତା ରାଲିକୁ ଜିଲାପାଳ ବିଜୟ ଅମୃତା କୁଲାଙ୍ଗେ ଶୁଭାରମ୍ଭ କରିଥିଲେ। ନିଜେ ଘରକୁ ଘର ଯାଇ ଲୋକଙ୍କୁ ସଚେତନ କରିଥିଲେ। ଲୋକଙ୍କୁ ମାସ୍କ ବଣ୍ଟନ ସହ ନିୟମିତ ମାସ୍କ ପିନ୍ଧିବା, ସାମାଜିକ ଦୂରତା ଓ କୋଭିଡ୍ ନିୟମ ପାଳନ କରିବାକୁ ସେ କହିଥିଲେ।
ପରେ ଛତ୍ରପୁରସ୍ଥିତ ଡିଆରଡିଏ କାର୍ଯ୍ୟାଳୟରେ ସାମାଜିକ ଦୂରତା ରଖି କୋଭିଡ୍ ନିୟମ ପାଳନ ନେଇ ଜିଲାପାଳ ଓ ସମସ୍ତ ଷ୍ଟାଫ୍ ଶପଥ ନେଇଥିଲେ। ପୂର୍ବପରି ସ୍ବାସ୍ଥ୍ୟ ଅଧିକାରୀ, ସ୍ବୟଂ ସହାୟିକା ଗୋଷ୍ଠୀ, ଆଶାକର୍ମୀ ଟିମ୍ ଦ୍ବାରା ଘରକୁ ଘର ବୁଲି ସ୍କ୍ରିନିଂ କରିବେ। କୋଭିଡ୍ ବିଷୟ ବସ୍ତୁକୁ ଆଧାର କରି ସ୍ଲୋଗାନ, ବକ୍ତୃତା, ଚିତ୍ରାଙ୍କନ, କବିତା ଇତ୍ୟାଦି ପ୍ରତିଯୋଗିତା ଅନୁଷ୍ଠିତ ହେବ। ବ୍ଲକ ଏବଂ ଜିଲାସ୍ତରରେ ଆସନ୍ତା ମାସ ୨ ତାରିଖରେ ଅନୁଷ୍ଠିତ ହେବାକୁ ଥିବା ଗାନ୍ଧୀ ଜୟନ୍ତୀରେ ବିଜୟ ହାସଲ କରିଥିବା ପ୍ରତିଯୋଗୀମାନଙ୍କୁ ପୁରସ୍କାର ପ୍ରଦାନ କରାଯିବ। ସପ୍ତାହ ବ୍ୟାପୀ ସମସ୍ତ ଅଞ୍ଚଳରେ କୋଭିଡ୍ ସଚେତନତା ରଥ ପରିଭ୍ରମଣ କରି ସଚେତନତା ବାର୍ତ୍ତା ପ୍ରଚାର ଓ ପ୍ରସାର କରିବ। ସପ୍ତାହ ବ୍ୟାପୀ ସମସ୍ତ ଦୋକାନରେ ୫ ସୂତ୍ରୀ ପାଳନ କରାଯାଉଛି ନା ନାହିଁ ତାହା କଡ଼ାକଡ଼ି କରାଯିବ ବୋଲି ଜିଲାପାଳ କହିଛନ୍ତି।
