ନୂଆଦିଲ୍ଲୀ,୧୬।୪(ପି.ଟି.): ଭାରତର କେତେକ ସହରରେ କୋଭିଡ୍ ସଂକ୍ରମଣ ପୁଣିଥରେ ବଢ଼ିବା ଆରମ୍ଭ କରିଛି। ୯୪୯ ନୂଆ ମାମଲା ସହ ଦେଶରେ ସକ୍ରିୟ ମାମଲା ସଂଖ୍ୟା ୧୧,୧୯୧କୁ ବୃଦ୍ଧି ପାଇଥିବା ସ୍ବାସ୍ଥ୍ୟ ମନ୍ତ୍ରଣାଳୟ ତଥ୍ୟରୁ ଜଣାପଡ଼ିଛି। ଦିଲ୍ଲୀରେ ଦୈନିକ ସଂକ୍ରମଣ ଓ ପଜିଟିଭିଟି ହାର ସାମାନ୍ୟ ବଢ଼ିଥିବାବେଳେ ହୋମ୍ ଆଇସୋଲେଶନ ମାମଲା ସଂଖ୍ୟା ପାଖାପାଖି ୪୮ ପ୍ରତିଶତ ବୃଦ୍ଧି ପାଇଛି। ଗୁରୁବାର ୩୨୫ ନୂଆ ମାମଲା ସହ ଦିଲ୍ଲୀରେ ହୋମ୍ ଆଇସୋଲେଶନ ମାମଲା ସଂଖ୍ୟା ୫୭୪ରେ ପହଞ୍ଚତ୍ଥିଲା। ଏପ୍ରିଲ ୧ରେ ଦିଲ୍ଲୀରେ କୋଭିଡ୍ ପଜିଟିଭିଟି ହାର ୦.୫୭ ପ୍ରତିଶତ ଥିବାବେଳେ ୧୪ ତାରିଖରେ ତାହା ୨.୩୯ ପ୍ରତିଶତକୁ ବୃଦ୍ଧି ପାଇଛି। ଦିଲ୍ଲୀ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ପିଲାମାନଙ୍କ ପାଇଁ ଶୁକ୍ରବାର ଗାଇଡ୍ଲାଇନ ଜାରି ହୋଇଛି। ଆବଶ୍ୟକ ହେଲେ ଶିକ୍ଷାନୁଷ୍ଠାନ ଆଂଶିକ ବନ୍ଦ ହୋଇପାରେ। ସ୍କୁଲ୍ ବନ୍ଦ ଶେଷ ବିକଳ୍ପ ବୋଲି ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ କହିଛନ୍ତି। ପାଠ୍ୟକ୍ରମ ଶେଷ ଲାଗି ଗ୍ରୀଷ୍ମାବକାଶ ସମୟରେ ମଧ୍ୟ ପାଠପଢ଼ା ଜାରି ରହିବ ବୋଲି ସେ କହିଛନ୍ତି।
