କେନ୍ଦୁଝର, ୨୮।୭ (ସ୍ବ.ପ୍ର.): କେନ୍ଦୁଝର ଜିଲା ମୁଖ୍ୟ ଡାକ୍ତରଖାନା ପରିସରରେ କଡ଼ା ସୁରକ୍ଷା ବ୍ୟବସ୍ଥା ସତ୍ତ୍ୱେ କୋଭିଡ୍ ନିୟମର ଖୋଲାଖୋଲି ଉଲ୍ଲଂଘନ ହେଉଛି। ମେଡିକାଲ ଭିତରକୁ ପ୍ରବେଶ କରୁଥିବା ଲୋକଙ୍କ ତାପମାତ୍ରା ରେକର୍ଡ କରିବା ସହ ଆବଶ୍ୟକତା ନ ଥିଲେ ସମସ୍ତଙ୍କୁ ଭିତରକୁ ଛଡ଼ାଯାଉ ନାହିଁ। ତେବେ ମଙ୍ଗଳବାର ମେଡିକାଲରେ ହଜାର ହଜାର ସଂଖ୍ୟାରେ ଲୋକ ପ୍ରବେଶ କରିବା ଓ ସମସ୍ତ କୋଭିଡ୍ ନିୟମକୁ ଉଲ୍ଲଂଘନ କରିଛନ୍ତି। ଏହି ଘଟଣାକୁ ନେଇ ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ତେବେ ନର୍ସ ଚାକିରି ପାଇଁ ସାକ୍ଷାତକାର ନିମନ୍ତେ ଭିଡ ଜମିଥିବା ଜଣାପଡ଼ିଛି। ଜିଲାର ବିଭିନ୍ନ ସ୍ଥାନରୁ ଲୋକେ ଆସିଥିବାରୁ କରୋନା ସଂକ୍ରମଣ ଆଶଙ୍କାକରି ଡାକ୍ତରଖାନା କର୍ମଚାରୀ, ଡାକ୍ତର, ରୋଗୀ ତଥା ସେମାନଙ୍କ ସମର୍କୀୟମାନେ ଭୟଭୀତ ହୋଇପଡିଛନ୍ତି। ଅନେକ ମାସ୍କ ପିନ୍ଧି ନ ଥିଲାବେଳେ କେତେକ ଛୋଟ ଛୋଟ ପିଲାଙ୍କୁ ଧରି ଆସିଥିବା ମଧ୍ୟ ଦେଖିବାକୁ ମିଳିଛି। ଏଭଳି ସାକ୍ଷାତକାର ମେଡିକାଲ ବାହାରେ ଆୟୋଜନ ନ କରି କିପରି ସମ୍ବେଦନଶୀଳ ମେଡିକାଲ ପରିସରରେ କରାଗଲା ତାହାକୁ ନେଇ ଅନେକ ପ୍ରଶ୍ନ ଉଠୁଛି। ତେବେ ଖବର ପାଇବା ପରେ ଜିଲାପାଳ ଆଶୀଷ ଥାକ୍ରେ ତୁରନ୍ତ ପଦକ୍ଷେପ ନେଇ କାର୍ଯ୍ୟାନୁଷ୍ଠାନ ଗ୍ରହଣ ନିମନ୍ତେ ପୋଲିସକୁ ଜଣାଇଥିବା କହିଛନ୍ତି ।
