ଆଗ୍ରା, ୨୬।୧୨: ଚାଇନାରୁ ଉତ୍ତର ପ୍ରଦେଶ ଫେରିଥିବା ଯୁବକ କରୋନା ଆକ୍ରାନ୍ତ ହୋଇଥିବା ଜଣାପଡ଼ିଛି। କୋଭିଡ୍-୧୯ ଆକ୍ରାନ୍ତ ଜଣାପଡ଼ିବା ପରେ ସମ୍ପୃକ୍ତ ଯୁବକଙ୍କୁ ସଙ୍ଗରୋଧରେ ରଖାଯାଇଥିବା ମୁଖ୍ୟ ମେଡିକାଲ ଅଫିସର ଅରୁଣ ଶ୍ରୀବାସ୍ତବ କହିଛନ୍ତି। ଜିନୋମ ସିକ୍ୱେନ୍ସିଙ୍ଗ୍ ପାଇଁ ତାଙ୍କ ନମୁନା ଲକ୍ଷ୍ନୌ ଲ୍ୟାବ୍କୁ ପଠାଯାଇଛି। ତେବେ ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ଘରର ଅନ୍ୟ ସଦସ୍ୟଙ୍କ କୋଭିଡ୍ ଟେଷ୍ଟ୍ କରାଯାଇଛି। ଡିସେମ୍ବର ୨୩ରେ ଯୁବକ ଜଣକ ଚାଇନାରୁ ଦିଲ୍ଲୀ ଦେଇ ଆଗ୍ରାରେ ଥିବା ନିଜ ଘରେ ପହଞ୍ଚତ୍ଥିଲେ। ନଭେମ୍ବର ୨୫ ପରଠାରୁ ରାଜ୍ୟରେ କୌଣସି ଆକ୍ରାନ୍ତ ଚିହ୍ନଟ ହୋଇ ନ ଥିବାବେଳେ ଏହା ପ୍ରଥମ ମାମଲା ବୋଲି କୁହାଯାଉଛି।
ଚାଇନାରେ କରୋନା ସ୍ଥିତି ଉଦ୍ବେଗଜନକ ହୋଇପଡ଼ିଥିବାବେଳେ ଆଉ କିଛି ଦେଶରେ ମଧ୍ୟ ସଂକ୍ରମଣ ବୃଦ୍ଧି ପାଇବାରେ ଲାଗିଛି। ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାର କୋଭିଡ୍ ନିୟମ ପାଳନର ନିର୍ଦ୍ଦେଶ ଦେଇଛନ୍ତି। ଅନ୍ୟପକ୍ଷେ ଚାଇନା, ଜାପାନ, ଦକ୍ଷିଣ କୋରିଆ, ସିଙ୍ଗାପୁର ଏବଂ ଥାଇଲାଣ୍ଡରୁ ଆସୁଥିବା ଯାତ୍ରୀଙ୍କ ଆର୍ଟି-ପିସିଆର୍ ଟେଷ୍ଟ ବାଧ୍ୟତାମୂଳକ କରାଯାଇଛି। କୋଭିଡ୍ ଚିକିତ୍ସା ବ୍ୟବସ୍ଥା ସହିତ ଏ ନେଇ ଆବଶ୍ୟକ ଔଷଧ, ଅକ୍ସିଜେନ୍ ଏବଂ ଅନ୍ୟ ଉପକରଣ ସବୁ ପ୍ରସ୍ତୁତ ରଖିବାକୁ ସରକାର ଗାଇଡ୍ ଲାଇନ୍ ଜାରି କରିଛନ୍ତି। ଏ ନେଇ ଆସନ୍ତା ୨୭ରେ ରାଜ୍ୟଗୁଡ଼ିକ ପକ୍ଷରୁ ମକ୍ ଡ୍ରିଲ୍ କରାଯିବ।
