ନୂଆଦିଲ୍ଲୀ,୩୧ ।୧୨: ଚାଇନାରେ ବଢି ଚାଲିଥିବା କରୋନା ସଂକ୍ରମଣକୁ ଦେଖି ଏବେ ବିଶ୍ୱର ପ୍ରାୟ ସମସ୍ତ ଦେଶ ସଜାଗ ହୋଇଯାଇଛନ୍ତି । ଆମ ଦେଶରେ ମଧ୍ୟ କରୋନାକୁ ନେଇ ଗାଇଡଲାଇନ ଜାରି କରାଗଲାଣି । କେନ୍ଦ୍ର ସ୍ୱାସ୍ଥ ମନ୍ତ୍ରଣାଳୟ ପକ୍ଷରୁ ବିଦେଶରୁ ଫେରୁଥିବା ଯାତ୍ରୀଙ୍କ ପାଇଁ ବିମାନ ବନ୍ଦରରେ କରୋନା ଟେଷ୍ଟ କରିବାର ବ୍ୟବସ୍ଥା କରାଯାଇଛି । ହେଲେ ମନ୍ତ୍ରଣାଳୟ ପକ୍ଷରୁ କୁହାଯାଇଛି କି ୧୨ ବର୍ଷରୁ କମ୍ ବୟସର ପିଲାମାନେ ଯେଉଁମାନେ ବିଦେଶରୁ ଫେରୁଛନ୍ତି ସେମାନଙ୍କର ବିମାନ ବନ୍ଦରରେ କରୋନା ଟେଷ୍ଟ କରିବା ଅନିର୍ବାର୍ଯ୍ୟ ନୁହେଁ । ସୂଚନାଯୋଗ୍ୟ, ଗୋଟିଏ ଦିନ ପୂର୍ବରୁ ମନ୍ତ୍ରଣାଳୟ ଚାଇନା ସମେତ ୬ଟି ଦେଶରୁ ଆସୁଥିବା ଯାତ୍ରୀଙ୍କ ପାଇଁ ଆରଟିପିସିଆର ଯାଞ୍ଚର ନେଗେଟିଭ ରିପୋର୍ଟ ଅନିର୍ବାର୍ଯ୍ୟ କରିଥିଲା ।
ଶୁକ୍ରବାର ମନ୍ତ୍ରଣାଳୟର ଜଣେ ଅଧିକାରୀ କହିଛନ୍ତି, ଯେଉଁ ପିଲାମାନଙ୍କର ବୟସ ୧୨ ବର୍ଷରୁ କମ ଓ ସେମାନେ ମାତାପିତା ବା ଅନ୍ୟ ଅଭିଭାବକଙ୍କ ସହିତ ବିଦେଶରୁ ଆସୁଛନ୍ତି ବା ବିଦେଶ ଯାଉଛନ୍ତି ସେମାନେ କୌଣସି ପ୍ରକାର ଯାଞ୍ଚରେ ସାମିଲ ହେବା ଅନିର୍ବାର୍ଯ୍ୟ ନୁହେଁ । ଯଦି ପିଲାମାନଙ୍କ ନିକଟରେ କରୋନା ଲକ୍ଷଣ ଦେଖାଯାଉଛି ତେବେ ବୟସ୍କଙ୍କ ଭଳି ସେମାନଙ୍କ ପାଇଁ ବି ନିୟମ ଲାଗୁ କରାଯିବ ।