ମୁମ୍ବାଇ, ୪ା୪ (ପି.ଟି.): ସହରରେ କରୋନା ସଂକ୍ରମଣ ବଢ଼ି ଚାଲିଥିଲେ ସୁଦ୍ଧା ମୁମ୍ବାଇରେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ମ୍ୟାଚ ଆୟୋଜନ କରିବା ନେଇ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଆଶାବାଦୀ। ମୁମ୍ବାଇରେ ଏପ୍ରିଲ ୧୦ରୁ ୨୫ ମଧ୍ୟରେ ୧୦ ଆଇପିଏଲ୍ ମ୍ୟାଚ ଆୟୋଜନର ଯୋଜନା ରହିଛି। ତେବେ ପରିସ୍ଥିତି ଯଦି ଆହୁରି ବିଗିଡ଼ି ଯାଏ ତେବେ ସେଥିପାଇଁ ବିଳଳ୍ପ ଭେନ୍ୟୁ ଭାବେ ହାଇଦ୍ରାବାଦ ଓ ଇନ୍ଦୋରକୁ ବାୟୋବବଲ ବ୍ୟବସ୍ଥା ସହ ଆଗୁଆ ପ୍ରସ୍ତୁତ ରଖାଯାଇଛି। ଚଳିତବର୍ଷର ଆଇପିଏଲ୍ ଏପ୍ରିଲ ୯ରୁ ଆରମ୍ଭ ହେବାର କାର୍ଯ୍ୟକ୍ରମ ରହିଥିବାବେଳେ ଦିଲ୍ଲୀ କ୍ୟାପିଟାଲ୍ସର ସ୍ପିନ ଅଲରାଉଣ୍ଡର ଅକ୍ଷର ପଟେଲ, ଓ୍ବାଙ୍ଖଡେ ଷ୍ଟାଡିୟମର ୧୦ ଗ୍ରାଉଣ୍ଡ ଷ୍ଟାଫ୍ ସଦସ୍ୟ ଏବଂ ବିସିସିଆଇ ଦ୍ୱାରା ମୁତୟନ ହୋଇଥିବା ୬ ଇଭେଣ୍ଟ ମ୍ୟାନେଜର କରୋନା ପଜିଟିଭ ଚିହ୍ନଟ ହୋଇଛନ୍ତି। ଆୟୋଜକଗଣଙ୍କୁ ଏହା ଚିନ୍ତାରେ ପକାଇ ଦେଇଛି। ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଏକ ବିବୃତିରେ କୁହାଯାଇଛି ଯେ, ମାର୍ଚ୍ଚ ୨୮ରେ ମୁମ୍ବାଇରେ ଟମ୍ ହୋଟେଲରେ ପ୍ରବେଶ ପୂର୍ବରୁ ଅକ୍ଷର ପଟେଲଙ୍କର ହୋଇଥିବା କୋଭିଡ୍ ଟେଷ୍ଟରେ ଫଳାଫଳ ନେଗେଟିଭ ଆସିଥିଲା। ମାତ୍ର ତାଙ୍କର ଦ୍ୱିତୀୟ ଥର ହୋଇଥିବା ଟେଷ୍ଟରେ ଫଳାଫଳ ପଜିଟିଭ ଆସିଥିଲା। ସେ ବର୍ତ୍ତମାନ ଆଇସୋଲେଶନରେ ଅଛନ୍ତି। ଦିଲ୍ଲୀ କ୍ୟାପିଟାଲ ମେଡିକାଲ ଟିମ୍ ତାଙ୍କ ସହ ଯୋଗାଯୋଗରେ ରହିଛି। ମହାରାଷ୍ଟ୍ରରେ ଯେପରି ଭାବେ କରୋନା ସଂକ୍ରମଣ ବୃଦ୍ଧି ପାଇବାରେ ଲାଗିଛି ସ୍ଥାନୀୟ ସରକାରଙ୍କ ପାଇଁ ଏହା ଚିନ୍ତାର କାରଣ ହୋଇଛି। ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ ଆଗକୁ ମିନି ଲକ୍ଡାଉନ ହୋଇପାରେ ବୋଲି ଚେତାଇ ଦେଇଛନ୍ତି। ବିସିସିଆଇର ଜଣେ ବରିଷ୍ଠ କର୍ମକର୍ତ୍ତା କହିଛନ୍ତି, ଟିମ୍ଗୁଡ଼ିକ ଯେହେତୁ ବାୟୋବବଲରେ ଅଛନ୍ତି, ଯଦି ଲକ୍ଡାଉନ୍ ଲାଗୁ କରାଯାଏ ବିନା ଦର୍ଶକରେ ମ୍ୟାଚ ଆୟୋଜନ କରାଯାଇପାରିବ ବୋଲି ଆମର ଦୃଢ଼ବିଶ୍ୱାସ ରହିଛି। ଆଇପିଏଲ୍ର କାର୍ଯ୍ୟସୂଚୀ ଅନୁସାରେ ଟୁର୍ନାମେଣ୍ଟର ଦ୍ୱିତୀୟ ମ୍ୟାଚ ଏପ୍ରିିଲ ୧୦ରେ ଦିଲ୍ଲୀ କ୍ୟାପିଟାଲ୍ସ ଓ ଚେନ୍ନାଇ ସୁପର କିଙ୍ଗ୍ସ ମଧ୍ୟରେ ହେବ।