ଦାରିଙ୍ଗବାଡ଼ି,୫ା୨(ଡି.ଏନ୍.ଏ.): କରୋନା ଭୂତାଣୁ ପ୍ରତିହତ ପାଇଁ ଜିଲା ପ୍ରଶାସନ ପକ୍ଷରୁ ସରକାରଙ୍କ ମାଗଣା ଟିକାକରଣ ବ୍ୟବସ୍ଥାକୁ ଗୁରୁତ୍ୱ ଦିଆଯାଉଛି। ଏହି ଟିକାକରଣରେ ୧୫ରୁ ୧୭ବର୍ଷଙ୍କ ପାଇଁ ଯେଉଁ ଟିକାକରଣ ବ୍ୟବସ୍ଥା କରାଯାଇଛି ତାହା ଜିଲାର ଦାରିଙ୍ଗବାଡ଼ି ବ୍ଲକରେ ସବୁଠାରୁ କମ୍ ପ୍ରତିଶତ ରହିଛି। ଏବେ ବିଦ୍ୟାଳୟ ଏବଂ ମହାବିଦ୍ୟାଳୟଗୁଡ଼ିକ ଖୋଲାଯିବାକୁ ରହିଥିବା ବେଳେ ଟିକାକରଣ ବ୍ୟବସ୍ଥା ସମ୍ପୂର୍ଣ୍ଣ ହୋଇପାରିନାହିଁ। ବେଳ ଥାଉ ଥାଉ ଏହି ଟିକାକରଣ ସମ୍ପୂର୍ଣ୍ଣ କରାଯିବା ଆବଶ୍ୟକତା ରହିଛି।
ଅନ୍ୟପକ୍ଷରେ ବୟସ୍କମାନଙ୍କ ଟିକକରଣ ପାଇଁ ଯେଉଁ ଲକ୍ଷ୍ୟ ରହିଥିଲା ତାହା ଠାରୁ ଅଧିକ ସଫଳତାର ସହ ଟିକାକରଣ ହୋଇପାରିଛି। ରିପୋର୍ଟ ଅନୁସାରେ, ଦାରିଙ୍ଗବାଡ଼ିର ମୋଟ ଜନସଂଖ୍ୟା ୧ ଲକ୍ଷ ୨୫ ହଜାର ୭୦୧। ସେମାନଙ୍କ ମଧ୍ୟରୁ ୧୮ରୁ ଊର୍ଦ୍ଧ୍ୱ ମୋଟ୍ ୮୫ ହଜାର ୩୧୮ ଜଣଙ୍କୁ ଟିକାକରଣ କରାଯିବା ପାଇଁ ଲକ୍ଷ୍ୟଧାର୍ଯ୍ୟ ରହିଥିବା ବେଳେ ସେମାନଙ୍କ ମଧ୍ୟରୁ ୮୭ ହଜାର ୭୨ ଜଣଙ୍କୁ ପ୍ରଥମ ଡୋଜ୍ ଟିକାକରଣ କରାଯାଇଛି। ଯାହାକି ୧୦୨ ପ୍ରତିଶତ ସଫଳତାର ସହ ଦିଆଯାଇପାରିଛି। କିନ୍ତୁ ଦ୍ୱିତୀୟ ଡୋଜ୍ ଟିକାକରଣ ସେମାନଙ୍କ ମଧ୍ୟରୁ ସମୟର ବ୍ୟବଧାନ ଅନୁସାରେ ଏବେ ସୁଦ୍ଧା ୩୯ ହଜାର ୧୭୬ ଜଣଙ୍କୁ ଦିଆଯାଇଛି ଯାହାକି ଦ୍ୱିତୀୟ ଡୋଜ୍ ମାତ୍ର ୪୬ ପ୍ରତିଶ୍ରତ ଲୋକ ନେଇପାରିଛନ୍ତି। ଏହା ଜିଲାର ସବୁଠାରୁ କମ୍ ସଂଖ୍ୟକ ଲୋକ ଉକ୍ତ ବ୍ଲକ ଅଞ୍ଚଳରେ ଦ୍ୱିତୀୟ ଡୋଜ୍ ନେଇଥିବା ରିପୋର୍ଟରୁ ଜଣାପଡ଼ିଛି। ସେହିପରି ୧୫ ବର୍ଷରୁ ୧୭ ବର୍ଷଙ୍କ ମଧ୍ୟରୁ ମୋଟ୍ ୬ ହଜାର ୧୯୯ ଜଣଙ୍କୁୁ ଏହି ଟିକାକରଣ ବ୍ୟବସ୍ଥା ପାଇଁ ଲକ୍ଷ୍ୟ ରଖାଯାଇଥିବା ବେଳେ ପ୍ରଥମ ଡୋଜ୍ ମାତ୍ର ୨ ହଜାର ୨୨୧ ଜଣଙ୍କୁ ଦିଆସରିଛି ଏବଂ ଦ୍ୱିତୀୟ ଡୋଜ୍ ମାତ୍ର ୩୫ ଜଣଙ୍କୁ ଦିଆଯାଇଥିବା ରିପୋର୍ଟରୁ ଜଣାପଡ଼ିଛି। ଏହା ମୋଟାମୋଟି ଭାବେ ମାତ୍ର ୩୬ ପ୍ରତିଶତଙ୍କୁ ଟିକାକରଣ କରାଯାଇଛି। ଯାହାକି ଉଦ୍ବେଗ ଜନକ ରହିଛି। ଏହି ଟିକାକରଣକୁ ବ୍ୟାପକ ସଚେତନ କରାଗଲେ ଯାଇ ୧୫ ବର୍ଷରୁ ୧୭ ବର୍ଷଙ୍କୁ ଦିଆଯାଇପାରିବ ବୋଲି ବୁଦ୍ଧିଜୀବୀ ମହଲରେ କୁହାଯାଉଛି। ତେବେ ଏନେଇ ଦାରିଙ୍ଗବାଡ଼ି ଗୋଷ୍ଠି ସ୍ବାସ୍ଥ୍ୟକେନ୍ଦ୍ରର ଅଧିକାରୀ ଡାକ୍ତର ଜାକେଶ ସାମନ୍ତରାୟ କହିଛନ୍ତି, ଯେ ଜିଲାର ସର୍ଭେ ରିପୋର୍ଟ ଅନୁସାରେ ୧୫ରୁ ୧୭ ବର୍ଷଙ୍କ ସଂଖ୍ୟା ଯାହା ରହିଛି ତା’ଠାରୁ କମ୍ ସେହି ବୟସର ରହିଥିବା ଦାରିଙ୍ଗବାଡ଼ି ସମନ୍ବିତ ଶିଶୁ ବିକାଶ ଯୋଜନା ବିଭାଗର ରିପୋର୍ଟ ଅନୁସାରେ ମାତ୍ର ୪ ହଜାର ୫୬୦ ଜଣ ରହିଛନ୍ତି। ଯଦି ଏହି ରିପୋର୍ଟ ଅନୁସାରେ ଦେଖାଯାଏ ତେବେ ପ୍ରଥମ ଡୋଜ ପ୍ରାୟ ୫୦ ପ୍ରତିଶତ ନେଇସାରିଥିବା ସେ କହିଛନ୍ତି।
ସୂଚନାଯୋଗ୍ୟ, ତ୍ରିସ୍ତରୀୟ ପଞ୍ଚାୟତ ନିର୍ବାଚନ ରହିଥିବାବେଳେ ସେଠାରେ ନିୟୋଜିତ ହେବାକୁ ରହିଥିବା ସମସ୍ତ ସରକାରୀ କର୍ମଚାରୀଙ୍କୁ ବୁଷ୍ଟର ଡୋଜ୍ ଟିକାକରଣ କରାଯାଉଛି।