ଛତ୍ରପୁର,୧୬।୭(ଡି.ଏନ୍.ଏ.): ଗଞ୍ଜାମ ଜିଲା ହିଞ୍ଜିଳିକାଟୁର ଶିକ୍ଷୟିତ୍ରୀ ତଥା କରୋନା ଯୋଦ୍ଧା ସଙ୍ଗୀତା ପାଣିଗ୍ରାହୀ କରୋନାରୁ ସୁସ୍ଥ ହୋଇ ପୁଣି କାର୍ଯ୍ୟରେ ଯୋଗ ଦେଇଛନ୍ତି। ଏ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁବାର ଟୁଇଟ କରି କହିଛନ୍ତି ଯେ, କୋଭିଡ ଯୁଦ୍ଧରେ ଆଗଧାଡ଼ିର ଯୋଦ୍ଧାଙ୍କ ତ୍ୟାଗ ଓ ନିଷ୍ଠା ଅସୀମ। ଲୋକଙ୍କ ଜୀବନ ସୁରକ୍ଷା ପାଇଁ ଦିନରାତି ଏକ କରି କାର୍ଯ୍ୟ କରୁଛନ୍ତି। କୋଭିଡ ସଂକ୍ରମିତ ହୋଇ ସୁସ୍ଥ ହେବା ପରେ ବି’ ସେ ନିଜ ଦାୟିତ୍ୱରୁ ଓହରି ନାହାନ୍ତି। ହିଞ୍ଜିଳିକାଟୁର ସଙ୍ଗୀତା ପାଣିଗ୍ରାହୀ ସମସ୍ତଙ୍କ ପାଇଁ ଉଦାହରଣ।
ସୂଚନାଯୋଗ୍ୟ, ସଙ୍ଗୀତା କ୍ୱାରାଣ୍ଟାଇନ ସେଣ୍ଟରରେ କାର୍ଯ୍ୟ କରୁଥିଲେ। ତାଙ୍କର ସ୍ବାବ ପରୀକ୍ଷା ହୋଇ, ରିପୋର୍ଟ ପଜିଟିଭ ଆସିଥିଲା। ପରେ ତାଙ୍କୁ ଶିତଳାପଲିସ୍ଥିତ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଥିବାବେଳେ ମୁଖ୍ୟମନ୍ତ୍ରୀ, ୫ ଟି ସଚିବ ଓ ଗଞ୍ଜାମ ଜିଲାପାଳ ଫୋନ କରି ତାଙ୍କ ସହ କଥା ହୋଇଥିଲେ, ଏବଂ ତାଙ୍କର ଆରୋଗ୍ୟ କାମନା କରିଥିଲେ।
