ଭଞ୍ଜନଗର,୧୨।୫(ଡି.ଏନ୍.ଏ.): ବର୍ତ୍ତମାନ ଏମିତି ଅନେକ ଘଟଣା ଦେଖିବାକୁ ମିଳୁଛି, କୋଭିଡ୍ କିମ୍ବା କୋଭିଡ ସନ୍ଦିଗ୍ଧଙ୍କ ମୃତ୍ୟୁ ପରେ ପରିବାର ଲୋକ ମୁହଁ ଫେରାଇ ନେଉଛନ୍ତି। ମଙ୍ଗଳବାର ସେମିତି ଏକ ଘଟଣା ଗଞ୍ଜାମ ଜିଲା ଭଞ୍ଜନଗରସ୍ଥିତ ଉତ୍ସର୍ଗୀକୃତ କୋଭିଡ୍ କେୟାର ସେଣ୍ଟର ବା ଡିସିଏଚସିରେ ଦେଖିବାକୁ ମିଳିଛି। ଭଞ୍ଜନଗର ଲଣ୍ଡେଇ ସାହି ବାସିନ୍ଦା କାଳୀ ଚରଣ ସାହୁ, (୬୫) କୋଭିଡ୍ ସନ୍ଦିଗ୍ଧଙ୍କ ମୃତ୍ୟୁ ଘଟିଛି। ମୃତ୍ୟୁପରେ ପରିବାର ଲୋକ ମୃତଦେହ ନେବାକୁ ମନା କରିଦେଲେ। ମୃତଦେହ ପଡ଼ି ରହିଥିବା ଖବର ପାଇ ଉପଜିଲାପାଳ ରାଜେନ୍ଦ୍ର ମିଞ୍ଜ ଏବଂ ଉପଖଣ୍ଡ ସୂଚନା ଓ ଲୋକ ସମ୍ପର୍କ ଅଧିକାରୀ ଫକୀର ମୋହନ ମାଝି, ଉପଜିଲାପାଳଙ୍କ କାର୍ଯ୍ୟାଳୟର ବରିଷ୍ଠ ରାଜସ୍ବ ସହାୟକ ବିଶ୍ୱଜିତ ସେଠୀ, ଫକୀର ମୋହନ ସ୍ବାଇଁ ପ୍ରମୁଖ ମୃତଦେହ ଉଠାଇ ଶ୍ମଶାନ ନେଇ ସତ୍କାର କରିଥିଲେ। ପରିବାରବର୍ଗ କରୋନା ସନ୍ଦେହ କରି ମୃତଦେହ ପାଖ ମାଡି ନ ଥିବା ବେଳେ ଖୋଦ ଉପଜିଲାପାଳ, ଉପଖଣ୍ଡ ସୂଚନା ଓ ଲୋକ ସମ୍ପର୍କ ଅଧିକାରୀଙ୍କ ଏପରି ମାନବିକତା ପାଇଁ ତାଙ୍କୁ ପ୍ରଶଂସାର ସୁଅ ଛୁଟିଛି।