ଚମ୍ପୁଆ, ୨୩।୪ (ଡି.ଏନ.ଏ.)-ଦିନକୁ ଦିନ କରୋନା ଆକ୍ରାନ୍ତଙ୍କ ସଂଖ୍ୟା ଚମ୍ପୁଆରେ ବଢିବାରେ ଲାଗିଛି। ଏହାକୁ ଆଖି ଆଗରେ ରଖି ଜିଲାପ୍ରଶାସନର ନିର୍ଦ୍ଦେଶକ୍ରମେ ଚମ୍ପୁଆରେ ୫୦ ଶଯ୍ୟା ବିଶିଷ୍ଟ କୋଭିଡ ହସ୍ପିଟାଲ କାର୍ଯ୍ୟକ୍ଷମ ହେବ ବୋଲି ଉପଖଣ୍ଡ ଚିକିତ୍ସା ଅଧିକାରୀ ଉମାକାନ୍ତ ସାହୁ ସୂଚନା ଦେଇଛନ୍ତି। ଏନେଇ ଚମ୍ପୁଆ ଏନଏସି ଅଧିକାରୀ ଗୌରହରି ମହାନ୍ତ ଓ ଚିକିତ୍ସା ଅଧିକାରୀ ଉମାକାନ୍ତ ସାହୁ ଖୋଲିବାକୁ ଥିବା କୋଭିଡ ହସ୍ପିଟାଲର ଆନୁଷଙ୍ଗିକ ବ୍ୟବସ୍ଥା ତଦାରଖ କରିଛନ୍ତି। ସୂଚନା ଅନୁସାରେ ଚମ୍ପୁଆ ପ୍ରଶାସନ ପକ୍ଷରୁ କୋଭିଡ ମୁକାବିଲା ପାଇଁ ବହୁବିଧି ପଦକ୍ଷେପ ଗ୍ରହଣ କରାଯାଇ ସୀମାନ୍ତ ଚେକପୋଷ୍ଟ ଠାରୁ ଆରମ୍ଭ କରି ନିୟମିତ ଡାକବାଜି ଯନ୍ତ୍ର ସାହାଯ୍ୟରେ ଲୋକଙ୍କୁ ସଚେତନ କରାଯିବା ସହିତ ମାସ୍କ ଓ ସାମାଜିକ ଦୂରତାକୁ କଡାକଡି କରାଯାଇଛି। ଉପଖଣ୍ଡ ଚିକିତ୍ସାଳୟରେ ନିୟମିତ କୋଭିଡ ପରିକ୍ଷା କରାଯାଇ ସଂକ୍ରମିତଙ୍କୁ ଚିହ୍ନଟ କରାଯାଇ ଚିକିତ୍ସା ସେବା ପ୍ରଦାନ କରାଯାଇଥିବା ଯଣାଯାଇଛି। ମାତ୍ର ଦିନକୁ ଦିନ ସଂକ୍ରମଣ ସଂଖ୍ୟା ବୃଦ୍ଧି ପାଉଥିବାରୁ କୋଭିଡ ହସ୍ପିଟାଲ ଆସନ୍ତା ୨୪ ତାରିଖରେ ଖୋଲା ହେବ ବୋଲି ଅଧିକାରୀ ସୂଚନା ଦେଇଛନ୍ତି। ଏଥିପାଇଁ ୩ ଜଣ ଡାକ୍ତରଙ୍କ ସମେତ ଆବଶ୍ୟକ ଫାର୍ମାଶିଷ୍ଟ ଓ ନର୍ସ ନିୟୋଜିତ କରାଯିବ। ଫଳରେ ସଂକ୍ରମିତ ରୋଗୀ ସହଜରେ ସେବା ପାଇପାରିବେ ବୋଲି ଚିକିତ୍ସା ଅଧିକାରୀ ସାହୁ ସୂଚନା ଦେଇଛନ୍ତି। ଅନ୍ୟ ପକ୍ଷରେ ସରକାରଙ୍କ ଗାଇଡ ଲାଇନକୁ ସମସ୍ତ ଜନସାଧାରଣ ମାନିବାକୁ ଏନଏସି ପକ୍ଷରୁ ଅନୁରୋଧ କରାଯାଇଛି।