ନୂଆଦିଲ୍ଲୀ, ୪ା୮ (ପି.ଟି.)-ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଏକ କୋଭିଡ୍-୧୯ ଟାସ୍କଫୋର୍ସ ଗଠନ କରିବ। ପୂର୍ବତନ ଅଧିନାୟକ ରାହୁଲ ଡ୍ରାଭିଡ ଜାତୀୟ କ୍ରିକେଟ ଏକାଡେମୀ (ଏନସିଏ) ମୁଖ୍ୟ ହୋଇଥିବାରୁ ତାଙ୍କୁ ଏହି ଟାସ୍କ ଫୋର୍ସର ଅଧ୍ୟକ୍ଷ କରାଯିବା ସମ୍ଭାବନା ରହିଛି। ବିସିସିଆଇ ସୋମବାର ରାଜ୍ୟ ଆସୋସିଏଶନଗୁଡ଼ିକ ଲାଗି ଏସ୍ଓପି (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡ୍ୟୁଅର୍) ଘୋଷଣା କରିଛି। ବେଙ୍ଗାଲୁରୁସ୍ଥିତ ଏନସିଏରେ ଟ୍ରେନିଂ କାର୍ଯ୍ୟ ପୁନଃ ଆରମ୍ଭ କରାଯିବାକୁ ଥିବାରୁ କୋଭିଡ୍ ଟାସ୍କ ଫୋର୍ସ ଗଠନ କରାଯାଇଛି। ଏଥିରେ ଡ୍ରାଭିଡଙ୍କ ବ୍ୟତୀତ ଜଣେ ମେଡିକାଲ ଅଫିସର, ଜଣେ ହାଇଜିନ୍ ଅଫିସର ଏବଂ ବିସିସିଆଇ ଏଜିଏମ୍ (କ୍ରିକେଟ ଅପରେଶନ)ଙ୍କୁ ସାମିଲ କରାଯିବ। ଟାସ୍କ ଫୋର୍ସ ନିୟମିତ ଭାବେ ଖେଳାଳିମାନଙ୍କ ଯୋଗାଯୋଗରେ ରହିବ। କୋଭିଡ୍-୧୯ ସମ୍ପର୍କିତ ସୂଚନା ଓ ପରାମର୍ଶ ଦେବ। ଏହାଛଡ଼ା ଆବଶ୍ୟକ ପଦକ୍ଷେପ ନେବ। ଏସ୍ଓପି ଅନୁସାରେ ଟ୍ରେନିଂ ଆରମ୍ଭ ପୂର୍ବରୁ ଏନସିଏର ପ୍ରଶାସନିକ ଷ୍ଟାଫ୍ ସହିତ ସମସ୍ତ ଖେଳାଳିଙ୍କର କରୋନା ଭାଇରସ ଟେଷ୍ଟ ହେବ। କୋଭିଡ୍-୧୯କୁ ନେଇ ଏସଓପିରେ ଦର୍ଶାଯାଇଥିବା ସମସ୍ତ ପ୍ରୋଟୋକଲ ଏବଂ ସରକାରଙ୍କ ସମସ୍ତ ନିର୍ଦ୍ଦେଶାବଳୀ ମାନି ଚଳିବା କ୍ଷେତ୍ରରେ ଏକ ଅଣ୍ଡରଟେକିଂ ସମସ୍ତ ଖେଳାଳିଙ୍କୁ ଲିଖିତ ଭାବେ ଦେବାକୁ ପଡ଼ିବ।