ନୂଆଦିଲ୍ଲୀ,୮।୬: କୋଭିଡ୍ ଟିକାକରଣ ପାଇଁ ପ୍ରାଇଭେଟ ହସ୍ପିଟାଲ କେତେ ଚାର୍ଜ କରିପାରିବେ, ତା’ର ମୂଲ୍ୟ ମଙ୍ଗଳବାର ନିର୍ଦ୍ଧାରିତ କରିଛନ୍ତି କେନ୍ଦ୍ର ସରକାର। ଏହା ଅନୁଯାୟୀ, କୋଭିଶିଲ୍ଡ ଲାଗି ୭୮୦, କୋଭାକ୍ସିନ ପାଇଁ ୧,୪୧୦ ଏବଂ ରୁଷିଆ ଟିକା ସ୍ପୁଟନିକ ଭି’ ନିମନ୍ତେ ୧,୧୪୫ ଟଙ୍କା ଚାର୍ଜ କରିପାରିବେ। ଏଥିରେ ଟ୍ୟାକ୍ସ ଓ ସର୍ଭିସ ଚାର୍ଜ ବାବଦକୁ ୧୫୦ ଟଙ୍କା ସାମିଲ ରହିଛି।
୧୫୦ ଟଙ୍କାରୁ ଅଧିକ ସର୍ଭିସ ଚାର୍ଜ ଲାଗି ଅନୁମତି ନ ଦେବା ଲାଗି ରାଜ୍ୟ ସରକାରଙ୍କୁ କହିଛନ୍ତି କେନ୍ଦ୍ର ସରକାର। ଏହା ଉପରେ ରାଜ୍ୟ ସରକାର ତୀକ୍ଷ୍ଣ ନଜର ରଖିବେ। କୌଣସି ହସ୍ପିଟାଲ ଏହା ଉଲ୍ଲଂଘନ କଲେ କଡ଼ା କାର୍ଯ୍ୟାନୁଷ୍ଠାନ ନେବାକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି।
ସରକାରଙ୍କ ଦ୍ୱାରା ପରିଚାଳିତ ହସ୍ପିଟାଲରେ ଯୋଗ୍ୟ ବୟସ ବର୍ଗଙ୍କୁ ମାଗଣାରେ ଟିକା ଦିଆଯିବ ବୋଲି ପ୍ରଧାନମନ୍ତ୍ରୀ ରବିବାର ଘୋଷଣା କରିଥିଲେ।