ପୁଣେ,୧୨ ।୧: ସାରା ଦେଶର ଜନତାଙ୍କ ଅପେକ୍ଷାର ଅନ୍ତ ଘଟାଇ ଏବେ ଉପଲବ୍ଧ ହୋଇଛି କରୋନା ଭ୍ୟାକ୍ସିନ । ଆସନ୍ତା ୧୬ ତାରିଖରୁ ଟିକାକରଣ କାର୍ଯ୍ୟକ୍ରମ ଆରମ୍ଭ କରାଯିବ । ହେଲେ ପ୍ରଥମ ପର୍ଯ୍ୟାୟରେ କେବଳ ୩ କୋଟି ଲୋକଙ୍କୁ ଏହା ମିଳିବ । କରୋନା ଟିକାକୁ ନେଇ ସିରମ ଇନଷ୍ଟିଚୁୃଟ ଅଫ୍ ଇଣ୍ଡିଆର ସିଇଓ ଅଦର ପୁନାୱାଲା କହିଛନ୍ତି ସରକାରଙ୍କ ଅନୁରୋଧ କ୍ରମେ ଆମେ ପ୍ରଥମ ୧୦୦ ମିଲିୟନ ଡୋଜର ଦାମ ରଖିଛୁ ମାତ୍ର ୨୦୦ଟଙ୍କା । କାରଣ ଆମେ ସାଧାରଣ ଜନତା, ଗରିବ ଓ ସ୍ୱାସ୍ଥ୍ୟକର୍ମୀଙ୍କୁ ସହଯୋଗ କରିବାକୁ ଚାହୁଁଛୁ । ହେଲେ ଏହାପରେ ଘରୋଇ ବଜାରରେ ଏହା ୧୦୦୦ ଟଙ୍କାରେ ବିକ୍ରି କରାଯିବ ବୋଲି ପୁନାୱାଲା କହିଛନ୍ତି । ସୂଚନାଯୋଗ୍ୟ, ସିରମ ଇନଷ୍ଟିଚ୍ୟୁଟ ଦ୍ୱାରା ପ୍ରସ୍ତୁତ କୋଭିସିଲ୍ଡ ଟିକାକୁ ମଞ୍ଜୁରୀ ମିିଳିବା ପରେ ଏହା ଆସନ୍ତା ୧୬ ତାରିଖରୁ ଦେଶର ବିଭିନ୍ନ ସ୍ଥାନରେ ସ୍ୱାସ୍ଥ୍ୟକର୍ମୀ, ଫ୍ରଣ୍ଟଲାଇନ୍ ୱାରିୟର୍ସଙ୍କୁ ଦିଆଯିବାର ବ୍ୟବସ୍ଥା କରାଯାଇଛି । ଏଥିପାଇଁ ମଙ୍ଗଳବାର ସକାଳୁ ପୁଣେ ସ୍ଥିତ ସିରମ ଇନଷ୍ଟିଚ୍ୟୁଟରୁ ବିଭିନ୍ନ ରାଜ୍ୟକୁ ଭ୍ୟାକ୍ସିନ ପଠାଯିବା କାମ ଆରମ୍ଭ କରାଯାଇଛି । ପ୍ରଥମେ ଏହାକୁ କୋଲ୍ଡ ଷ୍ଟୋରେଜରେ ରଖାଯିବ । ଏହାପରେ ୧୬ ତାରିଖ ଦିନ ଏହାକୁ ଟିକାକରଣ କେନ୍ଦ୍ରକୁ ପଠାଇ ଦିଆଯିବ ।
