TAROUBA, TRINIDAD AND TOBAGO - AUGUST 18: Sunil Narine of Trinbago Knight Riders hits 4 during the Hero Caribbean Premier League match 1 between Trinbago Knight Riders and Guyana Amazon Warriors at Brian Lara Cricket Academy on August 18, 2020 in Tarouba, Trinidad And Tobago. (Photo by Randy Brooks - CPL T20/CPL T20 via Getty Images)
ଟାରୌବା, ୨୦।୮- କାରିବିୟନ ପ୍ରିମିୟର ଲିଗ୍(ସିପିଏଲ) ମଙ୍ଗଳବାରଠାରୁ ଆରମ୍ଭ ହୋଇଛି। ପ୍ରଥମ ଦିବସରେ ଅନୁଷ୍ଠିତ ୨ଟି ମ୍ୟାଚରେ ଟ୍ରିନବାଗୋ ନାଇଟ ରାଇଡର୍ସ ଓ ବାର୍ବାଡୋସ ଟ୍ରାଇଡେଣ୍ଟ୍ସ ବିଜୟ ହାସଲ କରିଛନ୍ତି। ୩୦ଟି ଲିଗ୍ ମ୍ୟାଚ ପରେ ଦୁଇ ସେମିଫାଇନାଲ ସେପ୍ଟେମ୍ବର ୮ ଓ ୯ ଏବଂ ଫାଇନାଲ ୧୦ ତାରିଖରେ ଅନୁଷ୍ଠିତ ହେବ।
ନାରିନଙ୍କ ଅଲରାଉଣ୍ଡ ପ୍ରଦର୍ଶନ
ପ୍ରଥମ ମ୍ୟାଚରେ ଟ୍ରିନବାଗୋ ୪ ଉଇକେଟରେ ଗୁୟାନା ଆମାଜନ ଓ୍ବାରିୟର୍ସକୁ ପରାସ୍ତ କରିଛି। ବର୍ଷା ଯୋଗୁ ମ୍ୟାଚ ୧୭ ଓଭର ବିଶିଷ୍ଟ ହୋଇଥିଲା। ଟସ୍ ହାରି ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା ଓ୍ବାରିୟର୍ସ ୧୭ ଓଭରରେ ୫ ଉଇକେଟ ହରାଇ ୧୪୪ ରନ କରିଥିଲା। ଦଳ ପକ୍ଷରୁ ସିମରନ ହେଟମେର ସର୍ବାଧିକ ୬୩(୪୪ ବଲ, ୨ ଚୌକା, ୨ ଛକା), ରସ୍ ଟେଲର ୩୩(୨୧ ବଲ, ୨ ଚୌକା, ୨ ଛକା) ଓ ନିକୋଲାସ ପୁରନ ୧୮ ରନ କରିଥିଲେ। ପ୍ରତିପକ୍ଷ ଦଳର ସୁନୀଲ ନାରିନ ୨ଟି ଏବଂ ଅଲୀ ଖାନ୍, ଜାଡେନ ସିଲେସ ଓ ଡ୍ବେନ ବ୍ରାଭୋ ଗୋଟିଏ ଲେଖାଏ ଉଇକେଟ ନେଇଥିଲେ। ଜବାବରେ ଟ୍ରିନବାଗୋ ୧୬.୪ ଓଭରରେ ୬ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ଇନିଂସ ଓପନ କରିଥିବା ନାରିନ ୨୮ ବଲ୍ରୁ ୨ ଚୌକା ଓ ୪ ଛକା ସହାୟତାରେ ସର୍ବାଧିକ ୫୦ ଏବଂ ଡାରେନ ବ୍ରାଭୋ ୩୦(୨୭ ବଲ, ୨ ଛକା) ରନ କରିଥିଲେ। ପରାଜିତ ଦଳ ପକ୍ଷରୁ ଇମ୍ରାନ ତାହିର ଓ ନଭୀନ-ଉଲ-ହକ୍ ୨ଟି ଲେଖାଏ ଏବଂ ରୋମାରିଓ ସେଫର୍ଡ ଓ କେମୋ ପଲ୍ ଗୋଟିଏ ଲେଖାଏ ଉଇକେଟ ନେଇଥିଲେ। ଅଲରାଉଣ୍ଡ ପ୍ରଦର୍ଶନ ପାଇଁ ନାରିନ୍ ମ୍ୟାନ ଅଫ ଦି ମ୍ୟାଚ ବିବେଚିତ ହୋଇଥିଲେ।
ସାଣ୍ଟନରଙ୍କ ପ୍ରଭାବୀ ବୋଲିଂ
ଦ୍ୱିତୀୟ ମ୍ୟାଚଟି ୨୦ ଓଭର ବିଶିଷ୍ଟ ହୋଇଥିଲା। ଏଥିରେ ବାର୍ବାଡୋସ ଟ୍ରାଇଡେଣ୍ଟ୍ସ ୬ ରନରେ ସେଣ୍ଟ କିଟ୍ସ ଆଣ୍ଡ ନେଭିସ ପାଟ୍ରିଅଟ୍ସକୁ ହରାଇ ଦେଇଥିଲା। ଟସ୍ ଜିତି ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲା ସେଣ୍ଟ କିଟ୍ସ। ବାର୍ବାଡୋସ ଦଳ ୨୦ ଓଭରରେ ୯ ଉଇକେଟ ହରାଇ ୧୫୩ ରନ କରିଥିଲା। ମାତ୍ର ୮ ରନରେ ୩ଟି ଉଇକେଟ ହରାଇ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିବାବେଳେ ଅଧିନାୟକ ଜାସନ ହୋଲ୍ଡର ସର୍ବାଧିକ ୩୮(୨୨ ବଲ, ୨ ଚୌକ, ୩ ଛକା), କାଏଲ ମେୟର୍ସ ୩୭(୨୦ ବଲ, ୨ ଚୌକା, ୩ ଛକା), ରଶିଦ ଖାଁ ୨୬(୨୦ ବଲ, ୨ ଚୌକା, ୧ ଛକା) ଓ ମିଚେଲ ସାଣ୍ଟନର ୨୦(୧୮ ବଲ, ୨ ଚୌକା) ରନ କରି ଦଳକୁ ସମ୍ମାନଜନକ ସ୍କୋର ପ୍ରଦାନ କରିଥିଲେ। ବିପକ୍ଷ ଦଳର ସୋହେଲ ତନଭୀର, ରାୟାଡ ଏମ୍ରିଟ ଓ ଶେଲଡନ କଟ୍ରେଲ ୨ଟି ଲେଖାଏ ଏବଂ ଆଲଜାରି ଜୋଶେଫ ଓ ଇଶ୍ ସୋଧି ଗୋଟିଏ ଲେଖାଏ ଉଇକେଟ ନେଇଥିଲେ। ଜବାବରେ ସେଣ୍ଟ କିଟ୍ସ ପୂରା ୨୦ ଓଭର ଖେଳିଥିଲେ ହେଁ ୫ ଉଇକେଟ ହରାଇ ୧୪୭ ରନ କରିବାକୁ ସକ୍ଷମ ହୋଇଥିଲା। ଜୋଶୁଆ ଡା ସିଲ୍ଭା ସର୍ବାଧିକ ୪୧(୪୧ ବଲ, ୩ ଚୌକା) ରନ କରି ଅପରାଜିତ ରହିଥିଲେ ହେଁ ଦଳକୁ ବିଜୟୀ କରିପାରି ନ ଥିଲେ। ବେନ୍ ଡୁଙ୍କ୍ ୩୪(୨୧ ବଲ, ୩ ଚୌକା, ୧ ଛକା) ରନ କରିଥିଲେ। ସାଣ୍ଟନର ଚମତ୍କାର ପ୍ରଦର୍ଶନ କରି ନିଜ ୪ ଓଭର ସ୍ପେଲରେ ଗୋଟିଏ ମେଡେନ ନେଇ ୧୮ ରନ ବିନିମୟରେ ୨ଟି ଉଇକେଟ ନେଇଥିଲେ। ତେଣୁ ତାଙ୍କୁ ପ୍ଲେୟର ଅଫ୍ ଦି ମ୍ୟାଚ ପୁରସ୍କାର ପ୍ରଦାନ କରାଯାଇଥିଲା। ରଶିଦ ଖାଁ ୨୭ ରନ ଦେଇ ୨ଟି ଉଇକେଟ ନେଇଥିଲେ।