ନୂଆଦିଲ୍ଲୀ,୧୧।୭: କୋଭିଡ୍-୧୯ ମହାମାରୀର ପ୍ରକୋପ୍ ଜାରି ରହିଥିବା ବେଳେ ଟେଷ୍ଟ କ୍ରିକେଟ ଆରମ୍ଭ ହୋଇଛି। ଏବେ ଆଉ ଏକ ହାଇପ୍ରୋଫାଇଲ ଟି୨୦ ଲିଗ୍ ଆରମ୍ଭ ହେବାକୁ ଯାଉଛି। ଅଗଷ୍ଟକ ୧୮ ତାରିଖରୁ ଆରମ୍ଭ ହେବାକୁ ଯାଉଛି କାରିବିୟାନ ପ୍ରିମିୟର ଲିଗ୍ (ଆଇପିଏଲ୍)। ଏ ନେଇ ଆୟୋଜକମାନେ ସୂଚନା ଦେଇଛନ୍ତି। ଏହି ଲିଗ୍ ତ୍ରିନିଦାଦ୍ ଆଣ୍ଡ ଟୋବାଗୋରେ ଖେଳାଯିବ। ସ୍ବାସ୍ଥ୍ୟଗତ ପ୍ରୋଟୋକଲକୁ ଧ୍ୟାନରେ ରଖି ଏହି ଲିଗ୍ ୩୪ ଦିନ ଧରି ଖେଳାଯିବ। କରୋନାର ଭାଇରସ ସଂକ୍ରମଣ ପାଇଁ ମ୍ୟାଚ୍ଗୁଡିକ ଫାଙ୍କା ଷ୍ଟାଡିୟମରେ ତଥା ବିନା ଦର୍ଶକରେ ଖେଳାଯିବ। ସ୍ଥାନୀୟ ପ୍ରସାଶନ ଓ ସରକାର ଏହି ଲିଗ୍ ଆୟୋଜନ କରିବାକୁ ଅନୁମତି ଦେଇଛନ୍ତି। ସେପ୍ଟେମ୍ବର ୨୦ ତାରିଖରେ ଟୁର୍ନାମେଣ୍ଟର ଫାଇନାଲ ଖେଳାଯିବ। ଏଥର ପୂରା ଲିଗ୍ ତ୍ରିନିଦାଦ ଆଣ୍ଡ ଟବାଗୋରେ ଖେଳାଯିବ ଓ ଏହାଦ୍ୱାରା କରୋନା ଭାଇରସ ସଂକ୍ରମଣକୁ ରୋକା ଯାଇପାରିବ ବୋଲି କୁହାଯାଇଛି।
ଲିଗ୍ ଖେଳିବାକୁ ତ୍ରିନିଦାଦ୍ ଓ ଟବାଗୋରେ ପହଞ୍ଚିବା ପରେ ଦଳଗୁଡିକୁ ଅଲଗା ଅଲଗା ହୋଟେଲ ହେଲ୍ଥ ପ୍ରୋଟୋକଲ ଅନୁସାରେ ରଖାଯିବ। ହୋଟେଲରେ ଖେଳାଳିମାନେ ଦୁଇ ସପ୍ତାହ କ୍ୱାରାଣ୍ଟାଇନ୍ରେ ରହିବେ। ପହଞ୍ଚିବା ପରେ ଖେଳାଳିମାନଙ୍କର କୋଭିଡ୍-୧୯ ପରୀକ୍ଷା କରାଯିବ। କୋଭିଡ୍-୧୯ ନେଇ ସବୁ ଗାଇଡ୍ଲାଇନର ପାଳନ କରାଯିବ। ଏହି ଲିଗ୍ରେ ଏଥର ଭାରତୀୟ ଅଭିଜ୍ଞ ସ୍ପିନର ପ୍ରବୀଣ ତାମ୍ବେ ପଦାର୍ପଣ କରିବାର କାର୍ଯ୍ୟକ୍ରମ ରହିଛି। ପ୍ରଥମ ଭାରତୀୟ ଖେଳାଳିଭାବେ ସେ ବିଦେଶୀ ଲିଗ୍ରେ ଖେଳିବାକୁ ଯାଉଛନ୍ତି। ତାମ୍ବେ ତ୍ରିନିବାଗୋ ନାଇଟ୍ ରାଇଡର୍ସ ପାଇଁ ଖେଳିବାକୁ ଚୁକ୍ତିବଦ୍ଧ ହୋଇଛନ୍ତି।