ରସୁଲପୁର,୪ା୮(ଡି.ଏନ.ଏ.): ରସୁଲପୁର ବ୍ଲକ ସୀମା ଦେଇ ପ୍ରବାହିତ ବ୍ରାହ୍ମଣୀ ନଦୀର ପୁରଣା ପୋଲରେ ବଡ଼ ଫାଟ ସୃଷ୍ଟି ହୋଇଛି। ୧୬ନଂ. ଜାତୀୟ ରଜାପଥ ସମ୍ପ୍ରସାରଣ ଓ ମରାମତି ଦାୟିତ୍ୱରେ ଥିବା ଠିକା ସଂସ୍ଥା ଏହି ପୋଲକୁ ସପ୍ତାହକ ତଳେ ମରାମତି କରିଥିଲା। ମରାମତି ପାଇଁ ପୋଲରେ ମାସାଧିକ କାଳ ଗାଡି ଚଳାଚଳ ବନ୍ଦ ରହିଥିଲା। ମରାମତି ଶେଷ ହେବା ପରେ ଗାଡି ଚଳାଚଳ ସ୍ବାଭାବିକ ହୋଇଥିଲା। ତେବେ ଗାଡି ଚାଲିବାକୁ ମାତ୍ର ସପ୍ତାହେ ନ ପୁରୁଣୁ ପୋଲର ଯୋଡେଇ ମୁଣ୍ଡରେ ଫାଟ ସୃଷ୍ଟି ହୋଇଛି। ଏଥିଯୋଗୁ ଗାଡି ଚଳାଚଳରେ ବାଧା ଉପୁଜୁଛି। ଫାଟ ସ୍ଥାନରେ ଲୁହା ଆଙ୍ଗେଲଗୁଡିକ ପଦାକୁ ବାହାରି ଯାତ୍ରୀଙ୍କ ପାଇଁ ବିପଦ ସୃଷ୍ଟି କରିଛି। ସାଇକେଲ ଓ ବାଇକ ଚାଳକମାନଙ୍କ ପାଇଁ ଅଧିକ ସମସ୍ୟା ସୃଷ୍ଟି ହୋଇଛି। ଏହିଭଳି ସ୍ଥିତି ପୋଲର ଏକାଧିକ ସ୍ଥାନରେ ସୃଷ୍ଟି ହେଲାଣି। ଏହାକୁ ତୁରନ୍ତ ମରାମତି କରା ନ ଗଲେ ଆଗକୁ ବଡ଼ ଦୁର୍ଘଟଣା ଘଟିବା ସମ୍ଭାବନାକୁ ଏଡ଼ାଇ ଦିଆଯାଇ ନ ପାରେ।
ପ୍ରକାଶଯୋଗ୍ୟ, ପୋଲ ନିକଟସ୍ଥ ବାରବାଟୀଠାରେ ଦୈନିକ ପରିବାହାଟ ଚାଲିଛି। ଏହି ପୋଲ ଦେଇ ଧର୍ମଶାଳା ବ୍ଲକର କୁମାରୀ, ଦେଉଳି, ଚହଟା, ମଙ୍ଗଳପୁର, ଚୋରମୁହାଁ, ଭୂବନ, ଜାରକା ଆଦି ଅଞ୍ଚଳରୁ ଶତାଧିକ ପରିବା ଚାଷୀ ଓ ବ୍ୟବସାୟୀ ବାରବାଟୀ ହାଟକୁ ଆସନ୍ତି। ପ୍ରତ୍ୟହ ହାଟଟି ବଢି ଭୋରୁ ବସୁଛି। ଅଧିକାଂଶ ଚାଷୀ ସେମାନଙ୍କ ଉପତ୍ାଦିତ ଦ୍ରବ୍ୟକୁ ସାଇକେଲ ଓ ମଟର ସାଇକେଲରେ ପରିବହନ କରୁଛନ୍ତି। ରାତ୍ର ବେଳା ହାଟକୁ ଆସିବା ସମୟରେ ଚାଷୀ ପୋଲ ଉପରିସ୍ଥ ଖାଲରେ ପଡି ଦୁର୍ଘଟଣାର ଶିକର ହେଉଛନ୍ତି। ପୋଲ ମରାମତି କାର୍ଯ୍ୟ ନିମ୍ନମାନର ହୋଇଥିବାରୁ ଏଭଳି ହେଉଛି ବୋଲି ପଥିକମାନେ ଅଭିଯୋଗ କରିଛନ୍ତି। ପୋଲକୁ ବାରମ୍ବାର ମରାମତି କରାଯାଉଛି। ହେଲେ ସମସ୍ୟାରେ ସୁଧାର ଆସି ପାରୁନାହିଁ। ଏନେଇ ରାଜପଥ ନିର୍ମାଣ ଓ ସମ୍ପ୍ରସାରଣ ଦାୟିତ୍ୱରେ ଥିବା ଠିକାସଂସ୍ଥା ଡିବିଏଲ କମ୍ପାନୀର ପ୍ରକଳ୍ପ ମ୍ୟାନେଜର ହରିହର ସିଂଙ୍କୁ ପଚାରିବାରୁ ସେ କହିଛନ୍ତି, ପୋଲ ନିକଟକୁ ଯାଇ ସ୍ଥିତି ପରଖିବା ପରେ ଇଞ୍ଜିନିୟରଙ୍କ ସହିତ ଆଲୋଚନା କରିଛନ୍ତି। ଉକ୍ତ ଖାଲକୁ ତୁରନ୍ତ ମରାମତି କରାଯିବ। ତେବେ ପୋଲଟି ପୁରୁଣା ହୋଇଯାଇଥିବାରୁ ଯୋଡେଇ ସ୍ଥାନରେ ଫାଟ ସୃଷ୍ଟି ହେଉଛି ବୋଲି ସେ ପ୍ରକାଶ କରିଛନ୍ତି।