ଭବାନୀପାଟଣା,୩।୪(ସ୍ବ.ପ୍ର.): କଳାହାଣ୍ଡି ଜିଲା ଜୁନାଗଡ଼ ବ୍ୟାଡ୍ମିଣ୍ଟନ ଆସୋସିଏଶନରେ ଏବେ ଫାଟ ଦେଖିବାକୁ ମିଳିଛି। ଏକାଥରକେ ସମ୍ପାଦକ, କାର୍ଯ୍ୟକାରୀ ସଭାପତି, ଉପସଭାପତି ଓ ସହସମ୍ପାଦକ ସମେତ ୪ଜଣ ଇସ୍ତଫା ଦେବା ଘଟଣା ଏବେ ଚର୍ଚ୍ଚାର ବିଷୟ ହୋଇଛି। ବର୍ତ୍ତମାନ ପ୍ରତ୍ୟକ୍ଷ ହେଉ କିମ୍ବା ପରୋକ୍ଷ ଭାବେ ସମ୍ପାଦକ ସମୀର ସାହୁ, କାର୍ଯ୍ୟକାରୀ ସଭାପତି ସରୋଜ ପଣ୍ଡା, ଉପସଭାପତି ଜଲି ପରାଭୋଇ ଓ ସହସମ୍ପାଦକ ରଶ୍ମିତା ଶବର ପ୍ରମୁଖ ମାର୍ଚ୍ଚ ୧୩ ତାରିଖରେ ଘରୋଇ ଅସୁବିଧା କିମ୍ବା ଅନ୍ୟ କୌଣସି ଅସୁବିଧାରୁ ନିଜ ପଦପଦବୀରୁ ଇସ୍ତଫା ଦେଇଛନ୍ତି। ଅନ୍ୟପକ୍ଷରେ ସେମାନଙ୍କ ଇସ୍ତଫାପତ୍ର ଆଜି ପର୍ଯ୍ୟନ୍ତ ଗ୍ରହଣ କରାଯାଇ ନ ଥିବା ଜଣାପଡିଛ।
ପ୍ରାପ୍ତ ସୂଚନାରୁ ପ୍ରକାଶ ଯେ, ଜୁନାଗଡ଼ ଅଞ୍ଚଳରେ ଖେଳର ବିକାଶ ଓ ବହୁ ମାତ୍ରାରେ ଜିଲାସ୍ତରୀୟ, ରାଜ୍ୟସ୍ତରୀୟ ତଥା ଅନ୍ତର୍ଜାତିକ ଖେଳାଳି ସୃଷ୍ଟି କରିବା ପାଇଁ ଜୁନାଗଡ଼ ସହରସ୍ଥିତ ବିଜୁ ପଟ୍ଟନାୟକ କ୍ରିକେଟ ଷ୍ଟାଡିୟମ ପରିସରରେ ଅଢେଇ କୋଟିରୁ ଊଦ୍ଧର୍ବ ଟଙ୍କାରେ ଉଡେନ ସିନ୍ଥେଟିକ ବ୍ୟାଡମିଣ୍ଟନ ଇଣ୍ଡୋର ଷ୍ଟାଡିୟମ ନିର୍ମାଣ କରାଯାଇଛି। ଏଥିରେ ଏକା ସାଙ୍ଗରେ ୩ଟି ମ୍ୟାଚ ମଧ୍ୟ ଅନୁଷ୍ଠିତ ହୋଇପାରିବ। ଏହି ବ୍ୟାଡମିଣ୍ଟନ ଆସୋସିଏଶନ ସଭାପତି ଭାବେ ଜୁନାଗଡ଼ ବିଧାୟକ ଦିବ୍ୟଶଙ୍କର ମିଶ୍ର ଅଛନ୍ତି। ଗତ ଏକ ବର୍ଷ ହେବ କୌଣସି ମିଟିଂ କିମ୍ବା କୌଣସି ଟୁର୍ନାମେଣ୍ଟ ହୋଇନାହିଁ। ଫଳରେ ଅନେକ ଖେଳାଳିଙ୍କୁ କିଛି ଶିଖିବାକୁ ମିଳୁନାହିଁ। ଅନେକ ଖେଳାଳି କେବଳ ଶରୀରକୁ ଫିଟ ରଖିବା ଭଳି ବ୍ୟାୟାମ କରି ଚାଲିଯାଉଛନ୍ତି। କିଛି ସଭ୍ୟ ଅଛନ୍ତି ନିଜ ନିଜକୁ ସୁହାଇଲା ଭଳି କାମ କରୁଛନ୍ତି। କମିଟି ନିର୍ଦ୍ଦେଶ ମଧ୍ୟ ପାଳନ କରୁନାହାନ୍ତି। ଏ ନେଇ ସଭାପତି ମଧ୍ୟ ଏଦିଗରେ କୌଣସି ପଦକ୍ଷେପ ନେଉ ନ ଥିବା ଅଭିଯୋଗ ହୋଇଛି। କୋଟି କୋଟି ଟଙ୍କାରେ ଇନ୍ଣ୍ଡୋର ଷ୍ଟାଡିୟମ ନିର୍ମାଣ ହୋଇଥଲେ ସୁଦ୍ଧା ଇଛାଶକ୍ତି ଅଭାବରୁ କୌଣସି ଟୁର୍ନାମେଣ୍ଟ ନ ହେବା ଖେଳାଳିଙ୍କ ମଧ୍ୟରେ ଉଦବେଗ ପ୍ରକାଶ ପାଇଛି। ସେହିଭଳି ଏହାର ରକ୍ଷଣାବେକ୍ଷଣ ମଧ୍ୟ ହୋଇପାରୁନାହିଁ। ଏଥିରେ ଲାଗିଥିବା କିଛି ବିଦ୍ୟୁତ୍ ବଲ୍ ମଧ୍ୟ ଖରାପ ହୋଇଗଲାଣି। ତାହା ମଧ୍ୟ ଲାଗି ପାରୁନାହିଁ। ଏ ନେଇ ସମ୍ପାଦକ ସମୀର ସାହୁଙ୍କୁ ପଚାରିବାରୁ ସେ କହିଥିଲେ ଯେ, ମୁଁ ବ୍ୟକ୍ତିଗତ ଭାବେ ମୋ ପରିବାରକୁ ସମୟ ଦେଇ ପାରୁ ନ ଥିବା ଯୋଗୁ ସମ୍ପାଦକ ପଦବୀରୁ ଇସ୍ତଫା ଦେଇଛି ବୋଲି କହିଥିଲେ।
