ନିଶ୍ଚିନ୍ତକୋଇଲି,୧୪ା୭(ଅଶୋକ କୁମାର ମହାପାତ୍ର): ଆଷାଢ ଯାଇ ଶ୍ରାବଣ ହେଲାଣି ଏହାସତ୍ତ୍ୱେ ବର୍ଷା ହେଉନାହିଁ। ଫଳରେ ଜ୍ୟେଷ୍ଠ ଓ ଆଷାଢରୁ ପଡ଼ିଥିବା ତଳି ଏବେ ନଷ୍ଟ ହେବାକୁ ବସିଲାଣି। ଅପରପକ୍ଷେ କେନାଲରେ ପାଣି ଆସୁ ନ ଥିବାରୁ ଏପର୍ଯ୍ୟନ୍ତ ଚାଷ କାର୍ଯ୍ୟ ଆରମ୍ଭ ହୋଇପାରିନାହିଁ। ପାଣିର ଅଭାବ ଫଳରେ ଚଳିତ ଖରିଫ ଋତୁରେ ଚାଷ କାର୍ଯ୍ୟ ପ୍ରଭାବିତ ହୋଇଛି। ଫଳରେ ନିଶ୍ଚିନ୍ତକୋଇଲି ବ୍ଲକରେ ମରୁଡି ଆଶଙ୍କା ସୃଷ୍ଟି ହୋଇଛି। ଅନେକ ସମୟରେ କଳା ହାଣ୍ଡିଆ ମେଘ ଘୋଟିଆସୁଥିଲେ ମଧ୍ୟ ବର୍ଷା ହେଉନାହିଁ। ଚାଷୀମାନେ କ୍ଷେତ ପ୍ରସ୍ତୁତି କରିଥିଲେ ମଧ୍ୟ ପାଣି ଅଭାବରୁ ରୁଆପୋତା କାର୍ଯ୍ୟ କରିବାକୁ ସାହସ ଜୁଟାଇ ପାରୁନାହାନ୍ତି। କିଛି ସ୍ଥାନରେ ଚାଷୀ ତଳି ବଞ୍ଚାଇବା ପାଇଁ ପାଣି ମୋଟର ସାହାଯ୍ୟରେ ପାଣି ମଡାଉଥିବା ଦେଖିବାକୁ ମିଳିଛି। ଏପରିକି ସଦର କେନାଲରେ ପାଣି ଆସିଥିଲେ ମଧ୍ୟ ଶାଖା କୋନାଲ ଏପର୍ଯ୍ୟନ୍ତ ସଫା ନ ହୋଇ ପଡ଼ି ରହିଛି। ଜଳସମ୍ପଦ ବିଭାଗର ଦାୟିତ୍ୱହୀନତା ଓ ଅବହେଳା ଯୋଗୁ ଏଭଳି ପରସ୍ଥିତି ସୃଷ୍ଟି ହୋଇଥିବା ଅଭିଯୋଗ ହୋଇଛି।
ନିଶ୍ଚିନ୍ତକୋଇଲି ଅଞ୍ଚଳର ବହୁ ଲୋକେ ମୁଖ୍ୟତଃ ଚାଷ ଉପରେ ନିର୍ଭରଶୀଳ। ଚଳିତ ବର୍ଷ ଧାନଚାଷ କରିବା ନିମନ୍ତେ ବହୁ ଚାଷୀ ଚଢା ଦରରେ ବିହନ ଆଣି ପକାଇଥିଲେ। ତେବେ ଚଳିତ ବର୍ଷ ମୌସୁମୀରେ ଅନିୟମିତତା ଦେଖାଦେଇଛି। ଶ୍ରାବଣରେ ବର୍ଷା ପରିବର୍ତ୍ତେ ଅସହ୍ୟ ଗୁଳୁଗୁଳି ଓ ପ୍ରଚଣ୍ଡ ରୌଦ୍ରତାପ ହେଉଛି। ଫଳରେ ଚାଷୀମାନେ ତଳି ନିମନ୍ତେ ପକାଇଥିବା ବିହନଗୁଡିକ ମଧ୍ୟରୁ ଅଧିକାଂଶ ମରିଗଲାଣି। ଏପରିକି କିଛି ବିଲରେ ତଳିଗୁଡ଼ିକ ପାଚି ହଳଦିଆ ପଡ଼ିଗଲାଣି। ବହୁ ସ୍ଥାନରେ ଜଳ ଅଭାବରୁ ବିଲ ଫାଟି ଆଁ କଲାଣି । ଚାଷୀମାନେ ବର୍ଷାକୁ ଅପେକ୍ଷା କରି ନିରାଶ ହୋଇପଡିଲେଣି। ଏପରିସ୍ଥିତିରେ ସ୍ଥାନୀୟ ଜଳ ସମ୍ପଦ ବିଭାଗ ଚାଷୀଙ୍କ ନିମନ୍ତେ କାଳ ସାଜିଛି। ସ୍ଥାନୀୟ କେନ୍ଦୁପାଟଣା,ଛତା, ନଗସପୁର ଓ ବ୍ୟାରେଜ ଡିଭିଜନ ଅଧୀନରେ ଥିବା ମୁଖ୍ୟ କେନାଲ ଓ ଶାଖା କେନାଲ ଗୁଡିକ ମଧ୍ୟରୁ ଅଧିକାଂଶ ଏପର୍ଯ୍ୟନ୍ତ ସଫେଇ ହୋଇନାହିଁ। କେନାଲ ଗୁଡିକ ଘାସ ଓ ଅଳିଆ ଆବର୍ଜନାରେ ଭରି ରହିଛି। ନାମକୁ ମାତ୍ର କିଛି ସ୍ଥାନରେ କେନାଲ ସଫେଇ ହୋଇଛି। ଫଳରେ କେନାଲର ଶେଷ ମୁଣ୍ଡକୁ ପାଣି ଯିବା ନେଇ ଆଶଙ୍କା ପ୍ରକାଶ ପାଇଛି। ଏସମ୍ପର୍କରେ କେନ୍ଦୁପାଟଣା ଜଳ ସମ୍ପଦ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ଅକ୍ଷୟ ମଲିକ କୁହନ୍ତି, ସଦର କେନାଲରେ ପାଣି ଛଡାଯାଇଛି। ବହୁ ଶାଖା କେନାଲର ଉନ୍ନୟନ କାର୍ଯ୍ୟ ଚାଲୁରହିଛି, ଖୁବ ଶୀଘ୍ର ସମସ୍ତ କେନାଲରେ ପାଣି ଛଡାଯିବ।
