ପଟାଙ୍ଗି,୨୨ା୧୧(ଶରତ ଧଳ): କଳାହାଣ୍ଡି ଜିଲା ଭବାନୀପାଟଣାରୁ ଦେଓମାଳି ପର୍ଯ୍ୟଟନସ୍ଥଳୀ ବୁଲିବାକୁ ଆସି ଏକ କାର୍ ଦୁର୍ଘଟଣା ହୋଇ ଅଳ୍ପକେ ପର୍ଯ୍ୟଟକମାନେ ବଞ୍ଚି ଯାଇଥିବାବେଳେ ୩ ପର୍ଯ୍ୟଟକ ଗୁରୁତର ହୋଇ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି।
ଏହି ଦୁର୍ଘଟଣା କୋରାପୁଟ ଜିଲା ପଟ୍ଟାଙ୍ଗି ଥାନା ଅନ୍ତର୍ଗତ କୋଟିଆ ପଞ୍ଚାୟତ ଅଧୀନରେ ରହିଥିବା ଦେଓମାଳି ପର୍ଯ୍ୟଟନସ୍ଥଳୀ ଘାଟିରେ ଘଟିଛି।
ସୂଚନା ମୁତାବକ, ଗୁରୁବାର ଭବାନୀପାଟଣାର ଜୟପଟଣାରୁ ୯ ଯୁବ ପର୍ଯ୍ୟଟକ ଏକ କାର୍ ନଂ ଓଡି ୩୩ ଏଲ୍ ୮୯୭୮ ଯୋଗେ ଦେଓମାଳି ପର୍ଯ୍ୟଟନସ୍ଥଳୀ ବୁଲିବାକୁ ଯାଇଥିଲେ। ସେଠାରେ ପହଞ୍ଚି ରାତ୍ରିଯାପନ କରି ଭୋର୍ରୁ ଉକ୍ତ ପର୍ଯ୍ୟଟନସ୍ଥଳୀରେ ସୂର୍ଯ୍ୟ ଉଦୟର ମଜା ଉଠାଇ ଘାଟି ରାସ୍ତାରେ କାର୍ ନେଇ ଫେରୁଥିଲେ। ଏହି ସମୟରେ କାର୍ର ଚକା ଫାଟି ଯିବାରୁ କାର୍ଟି ଭାରସାମ୍ୟ ହରାଇ ଘାଟି ରାସ୍ତାର ଏକ ଖାଲକୁ ଖସିପଡ଼ିଥିଲା। ଯାହାଫଳରେ ୯ ପର୍ଯ୍ୟଟକ କାର୍ ଭିତରେ ଫସି ରହିଯାଇଥିଲେ।
ଏହି ସମୟରେ ଦୁର୍ଘଟଣା ସ୍ଥଳ ଦେଇ କୋଟିଆରୁ ପଟ୍ଟାଙ୍ଗି ଅଭିମୁଖେ ଆସୁଥିବା ଲକ୍ଷ୍ମୀ ବସ୍ ଘଟଣାସ୍ଥଳରେ ଅଟକି ବସ୍ ଚଲାଉଥିବା ଓଡ଼ିଶା ମୋଟର ଚାଳକ ସଂଘର ପଟ୍ଟାଙ୍ଗି ଶାଖାର ଉପସଭାପତି ତଥା ଡ୍ରାଇଭର କିଶୋର ମାଛଙ୍କ ସମେତ ବସ୍ର ଅନ୍ୟ କର୍ମଚାରୀ କାର ଭିତରେ ଫସି ରହିଥିବା ସମସ୍ତ ପର୍ଯ୍ୟଟକଙ୍କୁ ଉଦ୍ଧାର କରି ଗୁରୁତର ନେତ୍ର ରାଉତ, ବିନୋଦ ରାଉତ ଏବଂ ଲକି ରାଉତଙ୍କୁ ବସ୍ ଯୋଗେ ପଟ୍ଟାଙ୍ଗି ସ୍ବାସ୍ଥ୍ୟକେନ୍ଦ୍ରରେ ପହଞ୍ଚାଇ ପ୍ରାଥମିକ ଚିକିତ୍ସା କରିବାରେ ସହଯୋଗ କରିଥିଲେ। ଅନ୍ୟପକ୍ଷରେ ଦୁର୍ଘଟଣା ସ୍ଥାନଟି କୋଟିଆ ଥାନା ଅଧୀନରେ ଯାଉଥିବାବେଳେ କୋଟିଆ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।