କୋକସରା,୧୬ା୪(ଡି.ଏନ୍.ଏ.): କଳାହାଣ୍ଡି ଜିଲା ଦେଇ ଯାଇଥିବା ୨୬ ନମ୍ବର ଜାତୀୟ ରାଜପଥ ଭବାନୀପାଟଣାରୁ ଜୟପୁରକୁ ସଂଯୋଗ କରୁଥିବା ରାସ୍ତାର କୋକସରା ବ୍ଲକ ରେଙ୍ଗାଳପାଲି ଛକ ନିକଟରେ ଥିବା ମୁଣ୍ଡରା ନଦୀ ବ୍ରିଜ୍ରେ ଫାଟ ସୃଷ୍ଟି ହୋଇଛି। ବ୍ରିଜ୍ର ଜଏଣ୍ଟରେ ଅନେକ ମାସ ହେବ ଫାଟ ହୋଇ ରଡ୍ ସବୁ ବାହାରକୁ ଦେଖାଯାଉଛି। ଧିରେ ଧିରେ ଏହି ବ୍ରିଜ୍ ଫାଟ ଦୁର୍ବଳ ହେବା ସହ ସିମେଣ୍ଟ ଖଣ୍ଡ ଛାଡୁଛି। ଏହି ଜାତୀୟ ରାଜପଥ ଏକ ପ୍ରମୁଖ ରାସ୍ତା ହୋଇଥିବାରୁ ଦିନରାତି ରାସ୍ତାରେ ଶହ ଶହ ଗାଡ଼ିମୋଟର ଯିବା ଆସିବା କରୁଛନ୍ତି। ଅନେକ ସମୟରେ ଦୁର୍ଘଟଣା ହେଉଥିବା ମଧ୍ୟ ଦେଖିବାକୁ ମିଳୁଛି। ବ୍ରିଜରେ ଫାଟ ବିପଦ ସଙ୍କୁଳ ରହିଥିବା ନେଇ ପ୍ରତି ୨/୩ ମାସ ଅନ୍ତରାଳରେ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଉଛି। ଖବର ପରେ ନାମକୁ ବିଭାଗ କେବେ ସିମେଣ୍ଟ ମିଶା ଗୁଣ୍ଡ ଆଣି ମରାମତି କରୁଥିବା ବେଳେ କିଛିଦିନ ପରେ ପୁଣି ସେହି ଅବସ୍ଥା ଦେଖିବାକୁ ମିଳୁଛି। ଏ ନେଇ କେସିଙ୍ଗା ଜାତୀୟ ରାଜପଥ ବିଭାଗର ସହକାରୀ ଯନ୍ତ୍ରୀ ଏସ. ଆର୍ ମଲ୍ଲିକଙ୍କୁ ପଚାରିବାରୁ, ସ୍ଥିତି ଅନୁଧ୍ୟାନ କରିଛି ଓ ଏନେଇ ବିଭାଗ ମରାମତି ପାଇଁ ଆଲର୍ଟମେଣ୍ଟ ପାଇଁ ପଠାଯାଇଛି। ଆସନ୍ତା ୩/୪ ଦିନ ମଧ୍ୟରେ ମରାମତି ହେବ ବୋଲି ସେ କହିଛନ୍ତି।
