କରଞ୍ଜିଆ,୨୫।୯- ମୟୂରଭଞ୍ଜ ଜିଲାର ସର୍ବ ପୁରାତନ ଖିଚିଂସ୍ଥିତ କିଚକେଶ୍ୱରୀ ମନ୍ଦିରର ବିଭିନ୍ନ ସ୍ଥାନରେ ଫାଟ ସୃଷ୍ଟି ହୋଇଛି। ବର୍ଷା ହେଲେ ମା’ଙ୍କ ମନ୍ଦିର ଚଟାଣରେ ପାଣି ଝରି ପଡ଼ୁଛି। ପାଣି ଝରୁଥିବା ସ୍ଥାନରେ ଶିଉଳି ଲାଗିଥିବା ଦେଖିବାକୁ ମିଳିଛି। ଫଳରେ କଳା ମୁଗୁନି ପଥରରେ ନିର୍ମିତ ଏହି ମନ୍ଦିର ପ୍ରତି ବିପଦ ଦେଖାଦେଇଛି। କିଛି ଦିନ ପୂର୍ବେ ଏହି ମନ୍ଦିର ପରିସରରେ ଥିବା କୁଟେଇ ତୁଣ୍ଡି ଏବଂ ଚନ୍ଦ୍ରଶେଖର ମନ୍ଦିର ମରାମତି ପ୍ରତ୍ନତତ୍ତ୍ୱ ବିଭାଗ କରିଥିଲେ ମଧ୍ୟ ଏହି ଦୁଇ ମନ୍ଦିରରୁ ପାଣି ଗଳିବା ବନ୍ଦ ହେଉ ନାହିଁ। ଚନ୍ଦ୍ରଶେଖର ମନ୍ଦିରରେ ପାଣି ଝରୁଥିବାରୁ ଭିତରେ ବସି ପୂଜାର୍ଚ୍ଚନା କରିବା ସମ୍ଭବ ହେଉ ନ ଥିବା ସେବାୟତମାନେ ପ୍ରକାଶ କରିଛନ୍ତି। ଏହି ମନ୍ଦିରର ପୁନଃ ମରାମତି ଯଥାଶୀଘ୍ର କରାଯିବା ଦରକାର ବୋଲି ପୂଜକ ସୁବାଷ ପାଣିଗ୍ରାହୀ କହିଛନ୍ତି। ରାଜ୍ୟ ସରକାର ଏଥିପ୍ରତି ଗୁରୁତ୍ୱ ଦେବା ଆବଶ୍ୟକ ବୋଲି ପୂଜକ ଦିଲ୍ଲୀପ ପାଣିଗ୍ରାହୀ ପ୍ରକାଶ କରିଛନ୍ତି। ଅଭିଜ୍ଞ କାରିଗରଙ୍କ ଦ୍ୱାରା ପୁନର୍ବାର ମନ୍ଦିର ମରାମତି କରିବା ଜରୁରୀ ହୋଇପଡ଼ିଛି। ଏସଂକ୍ରାନ୍ତରେ କରଞ୍ଜିଆ ଉପଜିଲାପାଳ ତଥା ମନ୍ଦିର ଟ୍ରଷ୍ଟି ଡ. ରଜନୀକାନ୍ତ ବିଶ୍ୱାଳଙ୍କୁ ପଚାରିବାରୁ ଖୁବ ଶୀଘ୍ର ଦେବୋତ୍ତର ଏବଂ ପ୍ରତ୍ନତତ୍ତ୍ୱ ବିଭାଗକୁ ଚିଠି ଲେଖି ସମାଧାନ ପାଇଁ ଚେଷ୍ଟା କରାଯିବ ବୋଲି କହିଛନ୍ତି।