ଖୋର୍ଦ୍ଧା ଅଫିସ,୧୨ା୮: ସରକାର ଲୋକଙ୍କ ଗମନାଗମନର ସୁବିଧା ପାଇଁ ବିଭିନ୍ନ ଯୋଜନା କରିଛନ୍ତି। ହେଲେ କେତେଜଣ ବିଭାଗୀୟ କର୍ମଚାରୀ ଓ ଠିକାଦାରଙ୍କ ମଧ୍ୟରେ ମଧୁଚନ୍ଦ୍ରିକା ଯୋଗୁ ରାସ୍ତା କାର୍ଯ୍ୟ ନିମ୍ନମାନର କରାଯାଉଛି। ପରବର୍ତ୍ତୀ ସମୟରେ ରାସ୍ତାରେ ଖାଲଖମା ସୃଷ୍ଟି ହେବା ସହ ଦୁର୍ଘଟଣା ଘଟୁଛି। ଏଭଳି ଦୃଶ୍ୟ ଖୋର୍ଦ୍ଧା ସହରରେ ଦେଖିବାକୁ ମିଳିଛି।
ପ୍ରକାଶ ଯେ, ନୂଆବସ୍ଷ୍ଟାଣ୍ଡଠାରୁ ଚଣ୍ଡିଚୁଆ ଛକ ପର୍ଯ୍ୟନ୍ତ ଗତବର୍ଷ ଆର ଆଣ୍ଡ ବି ପକ୍ଷରୁ ରାସ୍ତା ମରାମତି କରାଯାଇଥିଲା। ତେବେ ନିମ୍ନମାନର କାମ ଯୋଗୁ ରାସ୍ତା ସାରା ଖାଲଖମାରେ ପରିଣତ ହୋଇଛି ବୋଲି ସାଧାରଣରେ ଅଭିଯୋଗ ହୋଇଛି। ଏହି ରାସ୍ତା ଦେଇ ଆମ୍ବୁଲାନ୍ସ, ଘରୋଇ ବସ୍ ଯାତାୟାତ କରୁଛି। ଜାତୀୟ ରାଜପଥ ନଂ. ୫୭କୁ ସଂଯୋଗ କରୁଥିବାରୁ ମାଲବାହୀ ଟ୍ରକ୍, ଯାତ୍ରୀବାହୀ ବସ୍ ଯାତାୟାତ କରିଥାଏ। ତେବେ ଏହି ରାସ୍ତାର ମରାମତି ପ୍ରତି ଗୁରୁତ୍ୱ ଦିଆଯାଉ ନାହିଁ ବୋଲି ପିସିସି ସଭ୍ୟ ଶିଶିର ପରିଡା କହିଛନ୍ତି। ସେହିପରି ନୂଆବସ୍ଷ୍ଟାଣ୍ଡଠାରୁ ପଲ୍ଲା ଛକ ମଧ୍ୟରେ ବଡ଼ ବଡ଼ ଗର୍ତ୍ତ ସୃଷ୍ଟି ହୋଇଛି। ସପ୍ତାହକ ମଧ୍ୟରେ ଏହି ଗର୍ତ୍ତରେ ପଡି ଅନେକେ ଆହତ ହୋଇଛନ୍ତି। ବର୍ଷା ଯୋଗୁ ପାଣି ଭର୍ତ୍ତି ହୋଇ ରହୁଥିବାରୁ ବାଇକ୍ ଚାଳକମାନେ ଜାଣି ନ ପାରି ଖାଲରେ ପଡି ଆହତ ହେଉଛନ୍ତି। ଦଳେଇପୁଟର ବ୍ୟବସାୟୀ ମୀନକେତନ ସୁବୁଦ୍ଧି ବୁଧବାର ବାଇକ୍ରେ ଆସୁଥିବା ବେଳେ ଖାଲରେ ପଡି ଆହତ ହୋଇଥିଲେ। ଫଳରେ ସ୍ଥାନୀୟ ଲୋକେ ପ୍ରଥମେ ଏହାର ଚାରିପଟେ ଟାୟାର ପରେ ମାଟି ପକାଇଥିଲେ। ବର୍ଷାରେ ଧୋଇଯିବା ପରେ ବଡ ପଥର ଥୋଇ ଗାତକୁ ବନ୍ଦ କରିଛନ୍ତି। ସେହିପରି ସହରରେ ଅନେକ ସାହି ଗଳିକନ୍ଦିରେ ସୃଷ୍ଟି ହୋଇଥିବା ଖାଲଗୁଡିକୁ ମରାମତି କରାଯାଉନାହିଁ। ଫଳରେ ବର୍ଷାଦିନେ ଅନେକ ଦୁର୍ଘଟଣା ଘଟୁଥିବା ସାମାଜିକ କର୍ମୀ ଶୁଭ୍ରରଞ୍ଜନ ଦାସ କହିଛନ୍ତି। ସେହିପରି ଟିଏଲ୍ସି ରୋଡଠାରୁ ନୂଆବସ୍ଷ୍ଟାଣ୍ଡ ପର୍ଯ୍ୟନ୍ତ ରାସ୍ତାର ଉଭୟ ପାର୍ଶ୍ୱରେ ଖାଲଖମା ରହିଛି। ଡାକ୍ତର୍ସ ଲେନ୍ଠାରୁ ଗୁରୁଜଙ୍ଗକୁ ସଂଯୋଗ କରୁଥିବା ରାସ୍ତାର ବିଭିନ୍ନ ସ୍ଥାନରେ ବଡ଼ ବଡ଼ ଗର୍ତ୍ତ ସୃଷ୍ଟି ହୋଇଛି। ସଦର ଏସ୍ଡିପିଓଙ୍କ କାର୍ଯ୍ୟାଳୟ ମେଡିକାଲ ପଛପଟ ସମ୍ମୁଖ ରାସ୍ତା ଖାଲଖମାରେ ପରିଣତ ହୋଇଛି। ଏହି ରାସ୍ତା ଦେଇ ଦୈନିକ ଆମ୍ବୁଲାନ୍ସ, ରୋଗୀମାନେ ଯାତାୟାତ କରୁଛନ୍ତି। ଏକ ଗୁରୁତ୍ୱପୂର୍ଣ୍ଣ ରାସ୍ତା ହୋଇଥିବା ସତ୍ତ୍ୱେ ଏହାର ମରାମତି ପ୍ରତି ଗୁରତ୍ୱ ଦିଆଯାଉନାହିଁ। ଅନ୍ୟପକ୍ଷରେ ଏ ସମ୍ପର୍କରେ ପୌର ଉପାଧ୍ୟକ୍ଷ ଶୌର୍ଯ୍ୟରଞ୍ଜନ ମହାନ୍ତି କୁହନ୍ତି, ସହରର ବିଭିନ୍ନ ସ୍ଥାନରେ ଥିବା ଖାଲଖମା ମରାମତି ଲାଗି ଗୁରୁତ୍ୱ ଦିଆଯାଉଛି। ଏବେ ବର୍ଷାଦିନ ରହିଛି। ବର୍ଷା ଋତୁ ଯିବା ପରେ ଏଥିପ୍ରତି ଦୃଷ୍ଟି ଦିଆଯିବ।