ଗୋପ,୧୦।୨(ଡି.ଏନ୍.ଏ.): ରାଜ୍ୟ ସରକାର ଶିକ୍ଷାକୁ ଅଧିକ ମାତ୍ରାରେ ଗୁରୁତ୍ୱ ଦେଇ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ସ୍ମାର୍ଟ ସ୍କୁଲ କରୁଥିବା ବେଳେ ନିମ୍ନମାନର କାର୍ଯ୍ୟ ଯୋଗୁ ଅଳ୍ପଦିନ ମଧ୍ୟରେ ବିଦ୍ୟାଳୟର ବିଭିନ୍ନ ସାମଗ୍ରୀ ଭାଙ୍ଗି ଯାଉଥିବା ଦେଖିବାକୁ ମିଳୁଛି। ଏହି ପରିପ୍ରେକ୍ଷୀରେ ପୁରୀ ଜିଲା ଗୋପ ବ୍ଲକ ଅଞ୍ଚଳର ୧୯୪୪ ମସିହାରେ ସ୍ଥାପିତ ଗୋପ ନିଗମାନନ୍ଦ ସ୍ମାର୍ଟ ସ୍କୁଲ ଠିକ୍ ଭାବେ ମରାମତି କାର୍ଯ୍ୟ ହୋଇ ନ ଥିବାରୁ ଏବେ ଭୁଶୁଡିବା ଆଶଙ୍କା ଦେଖାଦେଇଛି। ସ୍କୁଲରେ ନାନା ସମସ୍ୟା ଦେଖାଦେଇଥିବାରୁ ପ୍ରଧାନଶିକ୍ଷକ ମନୋରଞ୍ଜନ ପଟ୍ଟନାୟକ ଏ ସମ୍ପର୍କରେ ୩ଟି ବିଭାଗକୁ ଚିଠି ଲେଖିଛନ୍ତି। ପ୍ରକାଶ ଯେ, ଗୋପ ନିଗମାନନ୍ଦ ସ୍କୁଲ ଏ ଅଞ୍ଚଳର ଏକ ପୁରାତନ ସ୍କୁଲ ଭାବରେ ପରିଚିତ। ଏହି ସ୍କୁଲ ଏବେ ୭୯ ବର୍ଷରେ ପହଞ୍ଚିଛି। ମନ୍ତ୍ରୀ ସମୀର ରଞ୍ଜନ ଦାଶ ପ୍ରଥମ ପର୍ଯ୍ୟାୟରେ ଏହି ସ୍କୁଲକୁ ସ୍ମାର୍ଟ ସ୍କୁଲ ଯୋଜନାରେ ସାମିଲ କରିଥିଲେ। ମାତ୍ର ଏବେ ଏହି ସ୍ମାର୍ଟ ସ୍କୁଲ କାନ୍ଥରେ ବଡ଼ ଫାଟ ସୃଷ୍ଟି ହୋଇଥିବା ବେଳେ ଛାତରୁ ଅତଡ଼ା ଖସୁଛି। ବାରମ୍ବାର ଏପରି ଅବସ୍ଥା ଦେଖାଯିବାରୁ ପ୍ରଧାନଶିକ୍ଷକ ପଟ୍ଟନାୟକ ସ୍କୁଲ ଚିଠି ନମ୍ବର ୩୯/୪୩/ଓ ୪୪ରେ ତା. ଫେବୃୟାରୀ ୪ ଓ ୭ ତାରିଖରେ ୩ଟି ବିଭାଗକୁ ଅଭିଯୋଗ କରିଛନ୍ତି। ଏହି ପୁରାତନ ସ୍କୁଲରେ ଏବେ ପ୍ରଥମ ଶ୍ରେଣୀରୁ ୧୦ ମ ଶ୍ରେଣୀ ପର୍ଯ୍ୟନ୍ତ ୮ଶହ ଛାତ୍ରୀଛାତ୍ର ଅଧ୍ୟୟନ କରୁଥିବା ବେଳେ ସେମାନଙ୍କ ଭବିଷ୍ୟତ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ଗତବର୍ଷ ଏହି ସ୍କୁଲକୁ ସ୍ମାର୍ଟ ସ୍କୁଲ ଅଭିଯାନ ଯୋଜନାରେ ୫୦ଲକ୍ଷ ଟଙ୍କାରୁ ଅଧିକ ଟଙ୍କା ଖର୍ଚ୍ଚ କରାଯାଇ ଥିବାବେଳେ ଏବେ ସ୍କୁଲର ଅବସ୍ଥାକୁ ନେଇ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇଛି। ନିମ୍ନମାନର କାର୍ଯ୍ୟ ସହ ଠିକାଦାରଙ୍କ ମନ ମୁତାବକ କାର୍ଯ୍ୟ ଯୋଗୁ ଏଭଳି ଅବସ୍ଥା ହୋଇଥିବା ନେଇ ସାଧାରଣରେ ଅଭିଯୋଗ ହେଉଛି। ତେଣୁ ଏହାର ତୁରନ୍ତ ମରାମତି ଦାବି କରାଯାଇଛି। ଏ ନେଇ ପ୍ରଧାନଶିକ୍ଷକ ପଟ୍ଟନାୟକ କହିଛନ୍ତି, ସ୍କୁଲରେ ବାରମ୍ବାର ଅତଡ଼ା ଖସିବା ସହ ଫାଟ ସୃଷ୍ଟି ହେବାରୁ ଘଟଣା ସମ୍ପର୍କରେ ବିଡିଓ, ଗ୍ରାମ୍ୟ ଉନ୍ନୟନ ବିଭାଗ ସହ ଜିଲା ଶିକ୍ଷା ଅଧିକାରୀଙ୍କୁ ଅବଗତ କରିଛି। ଛାତ୍ରୀଛାତ୍ରଙ୍କ ସୁରକ୍ଷାକୁ ଦୃଷ୍ଟିରେ ରଖି ପାଠପଢ଼ା ହେଉଛି ବୋଲି କହିଥିଲେ।