ଖୁଣ୍ଟୁଣୀ,୧୬।୭ (ସଚ୍ଚିଦାନନ୍ଦ ପଣ୍ଡା)ଲଘୁଚାପଜନିତ ଲଗାଣ ବର୍ଷା ଯୋଗୁ ଶନିବାର ଅପରାହ୍ନରେ ଖୁଣ୍ଟୁଣୀ ଥାନା ଅଧୀନ ଡାଳୁଆ ଗ୍ରାମଠାରେ ନିର୍ମାଣାଧୀନ ରେଙ୍ଗାଲି ଦକ୍ଷିଣପାର୍ଶ୍ୱ କେନାଲର ଉଭୟ ପାର୍ଶ୍ୱରେ ୩୦ ଫୁଟ୍ ଲେଖାଏ ଘାଇ ସୃଷ୍ଟି ହୋଇଛି। ଉଦ୍ବୃତ୍ତ ବର୍ଷାଜଳ ମାଡିଯିବାରୁ କଣ୍ଡରେଇ, ଡାଳୁଆ, ବାଉଁଶଟାଙ୍ଗର ଓ ସାବିତ୍ରୀପୁର ଗ୍ରାମର ଚାଷୀଙ୍କ ୩୦୦ ଏକରରୁ ଊଦ୍ଧର୍ବ ଚାଷଜମି ଜଳମଗ୍ନ ହୋଇଛି। ଫଳରେ ଧାନତଳି ପକାଇଥିବା ଚାଷୀମାନେ ଏବେ ଚିନ୍ତାରେ ପଡିଛନ୍ତି।
ମିଳିଥିବା ସୂଚନା ଅନୁଯାୟୀ, ଶୁକ୍ରବାର ଓ ଶନିବାର ଦୁଇଦିନ ହେବ ବର୍ଷା ଲାଗି ରହିଛି। ଫଳରେ କପିଳାସ ମୁଣ୍ଡିଆରୁ ପାଣି ଆସି ଡାଳୁଆ ସମେତ ଖଣ୍ଡୁଆଳି ଗ୍ରାମ ପାର୍ଶ୍ୱ ବିଭିନ୍ନ ନାଳ ଓ ଜୋର ଦେଇ ରେଙ୍ଗାଲି କେନାଲରେ ପ୍ରବେଶ କରିଥିଲା। ଏହି କେନାଲ କାର୍ଯ୍ୟ ସମ୍ପୂର୍ଣ୍ଣ ହୋଇନାହିଁ। ଡେରା ପର୍ଯ୍ୟନ୍ତ ଖୋଳାଯାଇଥିବାରୁ ତଳମୁଣ୍ଡ ପର୍ଯ୍ୟନ୍ତ ପାଣି ଯାଇପାରି ନ ଥିଲା। ଡାଳୁଆ ଗ୍ରାମଠାରେ ରେଙ୍ଗାଲି କେନାଲର ବନ୍ଧ ସ୍ବାଭାବିକ ଉଚ୍ଚତାଠାରୁ କମ୍ ରହିଥିବାରୁ ଘାଇ ସୃଷ୍ଟି ହୋଇଥିବା କୁହାଯାଉଛି। ଗତବର୍ଷ ମଧ୍ୟ ଖଣ୍ଡୁଆଳିଠାରେ ଏହି ବନ୍ଧ ଭାଙ୍ଗି ୫୦୦ ଏକରରୁ ଊର୍ଦ୍ଧ୍ୱ ଚାଷଜମି ଜଳମଗ୍ନ ହୋଇଥିଲା। ଏପର୍ଯ୍ୟନ୍ତ ଚାଷୀମାନେ ସେମାନଙ୍କ କ୍ଷତିପୂରଣ ପାଇ ନ ଥିବାବେଳେ ଚଳିତବର୍ଷ ସମାନ ପରିସ୍ଥିତି ଦେଖିବାକୁ ମିଳିଛି। ଏ ସମ୍ପର୍କରେ ରେଙ୍ଗାଲି ଦକ୍ଷିଣ ପାର୍ଶ୍ୱ କେନାଲ ଜଗତପୁର ଡିଭିଜନର ସୁପରିଣ୍ଟେଣ୍ଡେଣ୍ଟ ବିନୟ ବିଶ୍ୱାଳ କହିଛନ୍ତି, ରବିବାର ଘଟଣାସ୍ଥଳ ପରିଦର୍ଶନ କରିବା ପରେ ଯାହା ପଦକ୍ଷେପ ନିଆଯିବ। କେନାଲ କାମ ସମ୍ପୂର୍ଣ୍ଣ ହୋଇଗଲେ ଆଉ ଏଭଳି ପରିସ୍ଥିତି ସୃଷ୍ଟି ହେବ ନାହିଁ ବୋଲି ସେ କହିଛନ୍ତି।