କୋକସରା,୬ା୪(ଡି.ଏନ୍.ଏ.): କିଛିଦିନ ହେବ କୋକସରା ବ୍ଲକ ଅଞ୍ଚଳରେ ଅପରାହ୍ନରେ ଝଡ଼ ତୋଫାନ ସହ ତୁହାକୁତୁହା ବର୍ଷା ଲାଗି ରହିଛି। ଗୁରୁବାର ଅପରାହ୍ନରେ ବ୍ଲକର ଆମପାଣି, ବଡ଼ ପୋଡ଼ାଗୁଡ଼ା,ବରାଡଙ୍ଗା ପଞ୍ଚାୟତ ଅଞ୍ଚଳରେ ପ୍ରବଳ ଝଡ଼ ସହ କୁଆପଥର ବର୍ଷା ହୋଇଛି। ଆମପାଣି ଦେଇ ଯାଇଥିବା ୨୬ ନମ୍ବର ଜାତୀୟ ରାଜପଥରେ ଥିବା ବଡ଼ ବଡ଼ ଗଛ ଭାଙ୍ଗି ଯିବାରୁ କିଛି ସମୟ ପାଇଁ ଗାଡ଼ିମୋଟର ଚଳାଚଳ ବାଧାପ୍ରାପ୍ତ ହୋଇଥିଲା। ଏମିତି କୁଆପଥର ବର୍ଷା ବିଗତ କିଛି ବର୍ଷ ମଧ୍ୟରେ କେବେ ହୋଇ ନ ଥିବା ନେଇ ଗ୍ରାମବାସୀ କହିଛନ୍ତି।
ଅନ୍ୟପକ୍ଷରେ ଆମପାଣି ପଞ୍ଚାୟତ କନ୍ଦାଗଡ଼ ଗ୍ରାମର କେତୁଚନ୍ଦ୍ର ମାଝି, ଅଖିଳ ମାଝି, ଅଭିନ ମାଝି, ଋଷିମଣି ମାଝି, କୁମଚନ୍ଦ୍ର ମାଝିଙ୍କ ଘର କୁଆପଥର ମାଡ଼ରେ ବର୍ଷା ଚାଳ ଛପର ଓ ଆଜବେଷ୍ଟସ୍ ଘର ମଧ୍ୟ କ୍ଷତିଗ୍ରସ୍ତ ହୋଇଥିବା ନେଇ ଆମପାଣି ନାଏବ ସରପଞ୍ଚ ଭବାନୀ ଶଙ୍କର ପୁରୋହିତ ଅଭିଯୋଗ କରିବା ସହ ସେମାନଙ୍କୁ ପ୍ରଶାସନ ପକ୍ଷରୁ ସହାୟତା ଯୋଗାଇ ଦେବାକୁ କହିଛନ୍ତି। ତେବେ ରାସ୍ତାରେ ବିଛାଇ ପଡ଼ିଥିବା କୁଆପଥର ଆସ୍ତରଣ ଦେଖି ସ୍ଥାନୀୟ ଲୋକେ କିଛି ସମୟ ପାଇଁ ମଜା ମଧ୍ୟ ଉଠାଇଥିବା ଦେଖିବାକୁ ମିଳିଛି।