କ୍ରେଡିଟ୍ କାର୍ଡରୁ ସିମ୍ କାର୍ଡ ଯାଏ… ଜୁଲାଇ ପହିଲାରୁ ବଦଳିଯିବ ଏସବୁ ନିୟମ, ଜାଣି ରଖନ୍ତୁ…
06 ନୂଆଦିଲ୍ଲୀ,୩୦।୬: ଶେଷ ହେବାକୁ ଯାଉଛି ଜୁନ୍। ସୋମବାରଠାରୁ ଆରମ୍ଭ ହେବ ଜୁଲାଇ। ଏହି ମାସରୁ ଅନେକ ପରିବର୍ତ୍ତନ ହେବାକୁ ଯାଉଛି, ଯାହାର ସିଧା ପ୍ରଭାବ ପକେଟ ଉପରେ ପଡ଼ିବ। ଇ-ଓ୍ବାଲେଟ୍ଠାରୁ ଆରମ୍ଭ କରି କ୍ରେଡିଟ୍ କାର୍ଡ ଏବଂ ଇନ୍କମ୍ ଟ୍ୟାକ୍ସ ରିଟର୍ନ ଦାଖଲ ଆଦି ଯାଏ, ଅନେକ ଆର୍ଥିକ ନିୟମରେ ପରିବର୍ତ୍ତନ ହେବ। ଏହାଛଡ଼ା ରନ୍ଧନ ଗ୍ୟାସ ଦର ବଦଳିବା ସହ ସିମ କାର୍ଡ ସହ ଜଡ଼ିତ ନିୟମ ଲାଗୁ ହେବ। ଆସନ୍ତୁ ସବିଶେଷ ସୂଚନା ଜାଣିବା:-
କ୍ରେଡିଟ୍ କାର୍ଡ ବିଲିଂ:
ଜୁଲାଇ ପହିଲାରୁ କ୍ରେଡିଟ୍ କାର୍ଡ ବିଲ୍ ପେମେଣ୍ଟ ସହ ଜଡ଼ିତ ନିୟମ ପରିବର୍ତ୍ତନ ହେବାକୁ ଯାଉଛି, ଏହି କାରଣରୁ କିଛି ପେମେଣ୍ଟ ଆପ୍ ଜରିଆରେ ୟୁଟିଲିଟି ଅର୍ଥାତ୍ ବିଜୁଳି ଏବଂ ପାଣି ବିଲ୍ ଭଳି ଅନ୍ୟ ବିଲ୍ ପୈଠକ କରିବା ସମୟରେ ଅସୁବିଧା ଉପୁଜିପାରେ। କାରଣ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ଜୁଲାଇରୁ କ୍ରେଡିଟ୍ କାର୍ଡ ବିଲ୍ ପେମେଣ୍ଟ ସିଷ୍ଟମ୍(ବିବିପିଏସ୍) ଜରିଆରେ ପୈଠ କରିବାକୁ କହିଛନ୍ତି। ଅର୍ଥାତ ଜୁଲାଇ ପହିଲାରୁ ସମସ୍ତ ବ୍ୟାଙ୍କକୁ ଭାରତ ବିଲ୍ ପେମେଣ୍ଟ ସିଷ୍ଟମ ଜରିଆରେ ବିଲ୍ ପ୍ରୋସେସ କରିବାକୁ ହେବ।
ଆଇସିଆଇସିଆଇ ବ୍ୟାଙ୍କ କ୍ରେଡିଟ୍ କାର୍ଡ ଚାର୍ଜ:
ଆଇସିଆଇସିଆଇ ବ୍ୟାଙ୍କ ଜୁଲାଇ ପହିଲାରୁ ଅନେକ କ୍ରେଡିଟ୍ କାର୍ଡ ସେବାଗୁଡ଼ିକରେ ପରିବର୍ତ୍ତନ କରିବାକୁ ଘୋଷଣା କରିଛନ୍ତି। ଏମରାଲ୍ଡ ପ୍ରାଇଭେଟ୍ ମେଟାଲ କ୍ରେଡିଟ୍ କାର୍ଡକୁ ଛାଡ଼ି ବାକି ସମସ୍ତ କାର୍ଡ ଉପରେ ରିପ୍ଲେସମେଣ୍ଟ ଚାର୍ଜକୁ ୧୦୦ଟଙ୍କାରୁ ବଢ଼ାଇ ୨୦୦ ଟଙ୍କା କରାଯାଇପାରେ। ଏହାଛଡ଼ା ବ୍ୟାଙ୍କ ଅନେକ ଚାର୍ଜ ବି ସମାପ୍ତ କରିବାକୁ ଯାଉଛନ୍ତି। ଏଥିରେ ଚେକ୍ କିମ୍ବା କ୍ୟାସ୍ ପିକ୍ ଅପ୍ ଚାର୍ଜ, ଚାର୍ଜ ସ୍ଲିପ୍ ରିକ୍ୱେଷ୍ଟ ଉପରେ ଲାଗିଥିବା ଚାର୍ଜ, ଡାଏଲ-ଏ-ଡ୍ରାଫ୍ଟ(ଟ୍ରାନ୍ଜାକ୍ସନ ଫିସ୍), ଆଉଟ୍ଷ୍ଟେଶନ ଚେକ୍ ପ୍ରୋସେସିଂ ଫିସ୍ ଏବଂ ଡୁପ୍ଲିକେଟ୍ ଷ୍ଟେଟ୍ମେଣ୍ଟ ରିକୁଏଷ୍ଟ(୩ ମାସରୁ ଅଧିକ) ସାମିଲ ଅଛି।
ଏସ୍ବିଆଇ ରିଓ୍ବାର୍ଡ ପଏଣ୍ଟ:
ଏସ୍ବିଆଇ କାର୍ଡ ପକ୍ଷରୁ ଘୋଷଣା କରିଛି ଯେ, ଜୁଲାଇ ପହିଲାରୁ କିଛି କ୍ରେଡିଟ୍ କାର୍ଡ ଲାଗି ସରକାରୀ ନେଣଦେଣ ଉପରେ ରିଓ୍ବାର୍ଡ ପଏଣ୍ଟ ମିଳିବା ବନ୍ଦ ହୋଇଯିବ। ଏହି କାର୍ଡରେ ଏୟାର ଇଣ୍ଡିଆ ଏସ୍ବିଆଇ ପ୍ଲାଟିନମ୍ କାର୍ଡ, ଏୟାର ଇଣ୍ଡିଆ ଏସ୍ବିଆଇ ସିଗ୍ନେଚର କାର୍ଡ, ସେଣ୍ଟ୍ରାଲ ଏସ୍ବିଆଇ ସିଲେକ୍ଟ ପ୍ଲସ କାର୍ଡ, ଚେନ୍ନାଇ ମେଟ୍ରୋ ଏସ୍ବିଆଇ କାର୍ଡ, କ୍ଲବ୍ ବିସ୍ତାରା ଏସ୍ବିଆଇ କାର୍ଡ, କ୍ଲବ ବିସ୍ତାରା ଏସ୍ବିଆଇ କାର୍ଡ ପ୍ରାଇମ୍ ଏବଂ ଦିଲ୍ଲୀ ମେଟ୍ରୋ ଏସ୍ବିଆଇ କାର୍ଡ ସାମିଲ ଅଛି।
ମୋବାଇଲ ନମ୍ବର ପୋର୍ଟେବିଲିଟି ଏବଂ ମହଙ୍ଗା ଚାର୍ଜ:
ଜୁଲାଇ ପହିଲାରୁ ମୋବାଇଲ ନମ୍ବର ପୋର୍ଟେବିଲିଟି ନିୟମରେ ପରିବର୍ତ୍ତନ ହେବ। ଯଦି ସିମ୍ କାର୍ଡ ଚୋରି ନଚେତ ଖରାପ ହୋଇଯିବ, ତେବେ ତୁରନ୍ତ ଆପଣ ନୂଆ ସିମ୍ ନେଇପାରିବେ ନାହିଁ। ଏଥିପାଇଁ ସମୟସୀମା ୭ ଦିନର ରହିବ। ଏହାଛଡ଼ା ଟେଲିକମ୍ ସର୍ଭିସ ପ୍ରୋଭାଇଡର କମ୍ପାନୀ ଜିଓ, ଏୟାରଟେଲ, ବିଆଇ ନିଜର ପ୍ଲାନ୍ ମହଙ୍ଗା କରିଦେଇଛନ୍ତି। ଆସନ୍ତା ମାସରୁ ମୋବାଇଲ ରିଚାର୍ଜ ମହଙ୍ଗା ହୋଇଯିବ।
ସିଲିଣ୍ଡର ଦାମ: ପ୍ରତି ମାସର ପହିଲାରୁ ଏଲ୍ପିଜି ସିଲିଣ୍ଡର ନୂଆ ଦାମ ଜାରି ହୋଇଥାଏ। ଏହା ବଢ଼ିପାରେ ନଚେତ କମିପାରେ।
ପେଟିଏମ୍ ଓ୍ବାଲେଟ୍: ପେଟିଏମ୍ ପେମେଣ୍ଟସ୍ ବ୍ୟାଙ୍କ ଘୋଷଣା କରିଛି ଯେ ଜୁଲାଇ ୨୦ରେ ଜିରୋ ବାଲାନ୍ସ ଏବଂ ଗତ ବର୍ଷ ନଚେତ ଅଧିକ ସମୟରୁ ନେଣଦେଣ କରିନଥିବା ଇନାକ୍ଟିଭ୍ ଓ୍ବାଲେଟ୍ ବନ୍ଦ କରି ଦିଆଯିବ। ଏମିତିରେ ସମସ୍ତ ପ୍ରଭାବିତ ବ୍ୟବହାରକାରୀଙ୍କୁ ମେସେଜ୍ ପଠାଯିବ। ସେମାନଙ୍କୁ ନିଜର ଓ୍ବାଲେଟ୍ ବନ୍ଦ କରିବା ପୂର୍ବରୁ ୩୦ ଦିନର ନୋଟିସ୍ ପିରିୟଡ ଦିଆଯିବ।
ଆଇଟିଆର୍ ଡେଡ୍ଲାଇନ୍: ଆର୍ଥିକ ବର୍ଷ ୨୦୨୩-୨୪ ପାଇଁ ଆଇଟିଆର୍ ଫାଇଲ୍ କରିବା ସମୟସୀମାକୁ ଜୁଲାଇ ୩୧, ୨୦୨୪ ରହିଛି। ଯଦି ଏହି ସମୟସୀମା ଯାଏ ଜମା କରିବାରେ ବିଫଳ ହୋଇଯାଆନ୍ତି ତେବେ ଆପଣ ଡିସେମ୍ବର ୩୧ ଯାଏ ଲେଟ୍ ରିଟର୍ନ ଫାଇଲ କରିପାରିବେ।