ଭୁବନେଶ୍ୱର,୨୪ା୧୨(ସୂର୍ଯ୍ୟକାନ୍ତ ବେହେରା)ନକଲି କାଗଜପତ୍ର ପ୍ରସ୍ତୁତ କରି ଲୋକଙ୍କ ଅଜାଣତରେ ତାଙ୍କ ନାଁରେ କ୍ରେଡିଟ୍ କାର୍ଡ ଇସ୍ୟୁ କରୁଥିଲେ। ପରେ ବିଭିନ୍ନ ହସ୍ପିଟାଲ, ଓମଫେଡ ବୁଥ୍ ଭଳି ବିଭିନ୍ନ ସ୍ଥାନରେ ସ୍ବାଇପ୍ କରି ନଗଦ ଟଙ୍କା ନେଉଥିଲେ। ଏଭଳି ଢଙ୍ଗରେ କୋଟିକୋଟି ଟଙ୍କା ଠକୁଥିବା ଏକ ରାକେଟର ୬ଜଣଙ୍କୁ ଭୁବନେଶ୍ୱର ସାଇବର ପୋଲିସ ଗିରଫ କରିଛି। ଅଭିଯୁକ୍ତମାନେ ହେଲେ ପୁରୀ ପିପିଲି ଅଞ୍ଚଳର ମାଷ୍ଟରମାଇଣ୍ଡ ବିଜୁ ତ୍ରିପାଠୀ ଓ ତାଙ୍କ ସହଯୋଗୀ ପ୍ରସନ୍ନଜିତ ଦାସ, ମୁକେଶ ମନ୍ତ୍ରୀ, ହସ୍ପିଟାଲ ବିଲିଂ ଏଜେଣ୍ଟ ଅବ୍ଦୁଲ ରହେମାନ, ରାଜେଶ ଦାସ ଏବଂ ଆଇସିଆଇସିଆଇ ବ୍ୟାଙ୍କର କର୍ମଚାରୀ ପ୍ରଦୀପ କୁମାର ସାମନ୍ତରାୟ। ସେମାନଙ୍କଠାରୁ ୩ଟି ବସ୍ତାରେ ଥିବା ନଗଦ ୭ଲକ୍ଷ ୭ ହଜାର ୮୦୦ ଟଙ୍କା, ୪୫୦ ଡେବିଟ ଓ କ୍ରେଡିଟ କାର୍ଡ, ୫୦ ଚେକ୍ ବୁକ୍, ୭୮ ପାସ୍ବୁକ, ୬ ମୋବାଇଲ, ୬ ସ୍ବାଇପ ମେଶିନ୍ ଜବତ ହୋଇଥିବା ଖବରଦାତା ସମ୍ମିଳନୀରେ ଡିସିପି ପ୍ରତୀକ ସିଂ ସୂଚନା ଦେଇଛନ୍ତି। ଏଥିସହ ଏହି ଗ୍ୟାଙ୍ଗ୍ରେ ଆଉ କେଉଁମାନଙ୍କ ସମ୍ପୃକ୍ତି ରହିଛି, ତାହା ଉପରେ ତଦନ୍ତ ଚାଲିଛି ବୋଲି ଡିସିପି ସିଂ କହିଛନ୍ତି। ଏନେଇ ପୋଲିସ ଏକ ମାମଲା (ନଂ ୧୩୧/୨୩) ରୁଜୁକରି ସମସ୍ତ ଅଭିଯୁକ୍ତଙ୍କୁ ଶନିବାର କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି।
ପୋଲିସ ସୂଚନାନୁସାରେ ଅଭିଯୋଗକାରୀ ରାକେଶ ପାତ୍ରପଡ଼ାରେ ଆଇସିଆଇସିଆଇ ବ୍ୟାଙ୍କରେ ଆକାଉଣ୍ଟ ଖୋଲି ୩୦ ହଜାର ଟଙ୍କା ଜମା କରିଛନ୍ତି। ତେବେ ଟଙ୍କା ଆବଶ୍ୟକ ପଡ଼ିବାରୁ ସେ ଋଣ ପାଇଁ ଆବେଦନକରିବା ସମୟରେ ସିଭିଲ ଖରାପ ଥିବାରୁ ଋଣ ମଞ୍ଜୁର ହୋଇପାରି ନ ଥିଲା। ପରେ ଖୋଳତାଡ଼ ପରେ ତାଙ୍କ ନାଁରେ କ୍ରେଡିଟ କାର୍ଡ ଥିବା ଜାଣିବାକୁ ପାଇବା ସହ ତାଙ୍କ କାର୍ଡରେ ଟଙ୍କା ଉଠାଯାଇଥିବା ଜାଣିବାକୁ ପାଇଥିଲେ। ଏନେଇ ସେ ସାଇବର ଥାନାର ଦ୍ୱାରସ୍ଥ ହୋଇ ତାଙ୍କ ନାମକୁ ବ୍ୟବହାର କରି ଠକମାନେ ଠକେଇ କରିଥିବା ଅଭିଯୋଗ କରିଥିଲେ। ପୋଲିସ ତଦନ୍ତ କରି ଅଭିଯୁକ୍ତ ବିଜୁଙ୍କ ଘରେ ଚଢାଉ କରି ଗିରଫ କରିଥିଲା। ପରେ ତାଙ୍କ ତଥ୍ୟ ଆଧାରରେ ପୋଲିସ ତାଙ୍କ ସହଯୋଗୀଙ୍କୁ ଧରିବାରେ ସକ୍ଷମ ହୋଇଥିଲେ। ଅଭିଯୁକ୍ତମାନେ ହସ୍ପିଟାଲ ବିଲିଂ ଏଜେଣ୍ଟଙ୍କ ସହ ମିଶି ଯୋଜନାବଦ୍ଧ ଭାବେ ଠକେଇ କରୁଥିଲେ। ହସ୍ପିଟାଲଗୁଡିକ ରୋଗୀ ବିଲିଂ କରିବା ସମୟରେ ବିଲିଂ ଏଜେଣ୍ଟ ଅଭିଯୁକ୍ତଙ୍କ ନିକଟରେ ଥିବା କ୍ରେଡିଟ କାର୍ଡ ମାଧ୍ୟମରେ ସ୍ବାଇପ କରି ଟଙ୍କା ନେଉଥିଲେ। ହେଲେ ଏହି ଟଙ୍କା ସବୁ ଠକ ଅଭିଯୁକ୍ତଙ୍କ ଆକାଉଣ୍ଟକୁ ଯାଉଥିଲା ବୋଲି ସାଇବର ପୋଲିସ ତଦନ୍ତ ବେଳେ ଜାଣିବାକୁ ପାଇଛି।