ଭୁବନେଶ୍ୱର,୨୯।୯: ବ୍ୟାଙ୍କ ଅଫ୍ ମହାରାଷ୍ଟ୍ର (ବିଓଏମ୍) ପକ୍ଷରୁ ନିକଟରେ ସ୍ଥାନୀୟ ଲକ୍ଷ୍ମୀସାଗରଠାରେ ବ୍ୟାଙ୍କର ୩୬ତମ ଶାଖା ତଥା ଭୁବନେଶ୍ୱରର ୬ଷ୍ଠ ଶାଖାର ଶୁଭାରମ୍ଭ କରାଯାଇଛି। ଏହି ଅବସରରେ ବିଓଏମ୍ର କାର୍ଯ୍ୟନିର୍ବାହୀ ନିର୍ଦ୍ଦେଶକ ଆଶିଷ ପାଣ୍ଡେ ମୁଖ୍ୟ ଅତିଥି ଭାବେ ଯୋଗଦେଇ ଏହାର ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ବ୍ୟାଙ୍କର ଜୋନାଲ ମ୍ୟାନେଜର ବିନୟ କୁମାର, ଡେପୁଟି ଜୋନାଲ ମ୍ୟାନେଜର ଶଶାଙ୍କ ଶେଖର ସାହୁ ଓ ଚିଫ୍ ମ୍ୟାନେଜର (ସିପିସି) ରବିଶଙ୍କର କୁମାର ଉପସ୍ଥିତ ଥିଲେ। ଏହି ପରିପ୍ରେକ୍ଷୀରେ ବ୍ୟାଙ୍କ ପକ୍ଷରୁ ଏକ ଆଉଟ୍ରିଚ୍ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯାଇଥିଲା। ସେହିଭଳି ବ୍ୟାଙ୍କ ପକ୍ଷରୁ ୩୮ ଜଣ ଗ୍ରାହକଙ୍କୁ ୪୦.୬୮ କୋଟି ଟଙ୍କା ଋଣ ମଞ୍ଜୁର କରାଯାଇଥିଲା ବୋଲି ବ୍ୟାଙ୍କ ପକ୍ଷରୁ କୁହାଯାଇଛି।
ଅପରପକ୍ଷରେ ଚଳିତ ଆର୍ଥିକ ବର୍ଷରେ ବିଓଏମ୍ ରାଜ୍ୟରେ ୧୪ଟି ନୂଆ ଶାଖା ଖୋଲିବାକୁ ଯୋଜନା ରଖିଛି ବୋଲି ଆଶିଷ ପାଣ୍ଡେ ସୂଚନା ଦେଇଛନ୍ତି। ସେହିପରି ଓଡ଼ିଶାରେ ବ୍ୟାଙ୍କ ୫୦୦୦ କୋଟି ଟଙ୍କାର କାରବାର କରିବାକୁ ଲକ୍ଷ୍ୟ ରଖିଥିବା ବେଳେ ଆଗାମୀ ଦିନରେ ସେଥିପ୍ରତି ଗୁରୁତ୍ୱ ଦିଆଯାଉଥିବା ସେ ମତବ୍ୟକ୍ତ କରିଛନ୍ତି। ବର୍ତ୍ତମାନ ରାଜ୍ୟରେ ବ୍ୟାଙ୍କର ୩୬ଟି ଶାଖା ଥିବା ବେଳେ ତାହାକୁ ୫୦ରେ ପହଞ୍ଚାଇବାର ଯୋଜନା ମଧ୍ୟ ରହିଛି।
