ମେଲବୋର୍ନ, ୩୧।୫: ସେପ୍ଟେମ୍ବର ୧୮ରୁ ଅକ୍ଟୋବର ୧୦ ମଧ୍ୟରେ ୟୁଏଇଠାରେ ଆଇପିଏଲର ବଳକା ମ୍ୟାଚ୍ ଖେଳାଯିବ। ଏହି ମ୍ୟାଚ୍ରେ ଅଂଶଗ୍ରହଣ କରିବା ପାଇଁ ଅଷ୍ଟ୍ରେଲିଆ ଖେଳାଳିଙ୍କ ସହ ଏପର୍ଯ୍ୟନ୍ତ କୌଣସି ଆଲୋଚନା କରାଯାଇ ନାହିଁ। ଆଇପିଏଲ ଅଂଶଗ୍ରହଣ କରିଥିବା ଖେଳାଳିମାନେ ବାଧ୍ୟତାମୂଳକ ୨ ସପ୍ତାହ ହୋଟେଲ କ୍ୱାରେଣ୍ଟିନ ଶେଷ କରି ସୋମବାର ଘରକୁ ଫେରିଛନ୍ତି। ଏଣୁ ଆଇପିଏଲରେ ସେମାନେ ଖେଳିବେ କି ନାହିଁ ଜାଣିବା ପାଇଁ ଅପେକ୍ଷା କରିବାକୁ ପଡ଼ିବ ବୋଲି କ୍ରିକେଟ ଅଷ୍ଟ୍ରେଲିଆର (ସିଏ) କାର୍ଯ୍ୟକାରୀ ମୁଖ୍ୟ ନିକ ହକଲେ କହିଛନ୍ତି।
ଖେଳାଳି, କୋଚ୍, ମ୍ୟାଚ୍ ଅଫିସିଆଲ ଓ ଭାଷ୍ୟକାରଙ୍କୁ ମିଶାଇ ପ୍ରାୟ ୪୦ ଜଣ ଆଇପିଏଲରେ ଅଂଶଗ୍ରହଣ କରିଥିଲେ। ବିଭିନ୍ନ ଫ୍ରାଞ୍ଚାଇଜର ବାୟୋ ବବଲରେ ଖେଳାଳିମାନେ କୋଭିଡ୍ ସଂକ୍ରମିତ ହେବା ପରେ ମେ’ ୪ରେ ଆଇପିଏଲକୁ ସ୍ଥଗିତ ଘୋଷଣା କରାଯାଇଥିଲା।
”ଆମେ ଏକତ୍ରିତ ହେବା ପରେ ଆଇପିଏଲ ସମ୍ପର୍କରେ ଆଲୋଚନା କରିବୁ। ଆଇପିଏଲରୁ ଫେରିଥିବା ଖେଳାଳିମାନଙ୍କ ହୋଟେଲ କ୍ୱାରେଣ୍ଟିନ ସୋମବାର ଶେଷ ହୋଇଛି। ଏଣୁ ଖେଳାଳିଙ୍କ ଘରକୁ ଫେରିବାକୁ ଆମେ ପ୍ରାଥମିକତା ଦେଉଛୁ। ଆମକୁ ଓ୍ବେଷ୍ଟଇଣ୍ଡିଜ ଗସ୍ତ ଲାଗି ପ୍ରସ୍ତୁତ ହେବାର ଅଛି“ ବୋଲି ହକଲେ କହିଛନ୍ତି। ଆସନ୍ତା ଦୁଇ ସପ୍ତାହରେ ଖେଳାଳିମାନେ ବ୍ରିସବେନସ୍ଥିତ ଏନ୍ସିଏରେ ଏକତ୍ରିତ ହେବେ।
ଆଇପିଏଲର ବଳକା ମ୍ୟାଚ୍ ଖେଳାଯିବାକୁ ଥିବା ସମୟରେ ଅଷ୍ଟ୍ରେଲିଆର କୌଣସି ଅନ୍ତର୍ଜାତୀୟ ସିରିଜ୍ ଖେଳିବାର ନାହିଁ। କିନ୍ତୁ ଚିନ୍ତାର ବିଷୟ ହେଲା, ଗୋଟିଏ ବବଲରୁ ଅନ୍ୟ ବବଲକୁ ଯିବାଦ୍ୱାରା ଖେଳାଳିଙ୍କ ମାନସିକ ସ୍ବାସ୍ଥ୍ୟ ଉପରେ ଚାପ ବଢ଼ିପାରେ।