ମୁମ୍ବାଇ,୩।୧୧: ଭାରତ ମାଟିରେ ଇତିହାସ ରଚିଲା ନ୍ୟୁଜିଲାଣ୍ଡ ଟିମ୍। ସିରିଜର ଅନ୍ତିମ ଟେଷ୍ଟ ମ୍ୟାଚ୍କୁ ୨୫ ରନ୍ରେ ଜିତି ଦଳ ୩-୦ରେ କ୍ଲିନ୍ସୁଇପ୍ କରିଛି। ଅପରପକ୍ଷେ ଭାରତୀୟ ଟିମ୍ ୨୪ ବର୍ଷ ପରେ ନିଜ ଘରେ ଲଜ୍ଜାଜନକ ପରାଜୟର ସମ୍ମୁଖୀନ ହୋଇଛି। ତେବେ ଦ୍ୱିତୀୟ ଇନିଂସରେ ନ୍ୟୁଜିଲାଣ୍ଡ ୧୪୭ ରନ୍ର ଟାର୍ଗେଟ ଦେଇଥିଲା। ହେଲେ ମାତ୍ର ୧୨୧ ରନ୍ କରି ଟିମ୍ ଇଣ୍ଡିଆ ଅଲଆଉଟ୍ ହୋଇଛି।
ଟିମ୍ ଇଣ୍ଡିଆ ବ୍ୟାଟିଂ ଦେଖିଲେ ଋଷଭ ପନ୍ତ ୬୪ ରନ୍ର ଇନିଂସକୁ ଛାଡ଼ିଦେଲେ ଅନ୍ୟ କେହି ବ୍ୟାଟ୍ସମ୍ୟାନ୍ ସଫଳ ହୋଇନାହାନ୍ତି। ଦଳର ୮ ବ୍ୟାଟ୍ସମ୍ୟାନ୍ ୧୦ରୁ କମ୍ ରନ୍ କରିଥିଲେ। ନ୍ୟୁଜିଲାଣ୍ଡ ପକ୍ଷରୁ ଏଜାଜ ପଟେଲ ଏବଂ ଗ୍ଲେନ୍ ଫିଲିପ୍ସ ଜବରଦସ୍ତ ବୋଲିଂ ନିଦର୍ଶନ ଦେଇଥିଲେ।
ନ୍ୟୁଜିଲାଣ୍ଡ ମୁମ୍ବାଇ ଟେଷ୍ଟ ଜିତି ନୂଆ ଅଧ୍ୟାୟ ଲେଖିଛି। ଓ୍ବାଙ୍ଖଡେରେ ଦଳ ଦ୍ୱିତୀୟ ସର୍ବନିମ୍ନ ସ୍କୋରରେ ବିଜେତା ହୋଇଛି। ଏହାପୂର୍ବରୁ ନ୍ୟୁଜିଲାଣ୍ଡ ୧୯୭୮ରେ ଇଂଲଣ୍ଡ ବିପକ୍ଷରେ ୧୩୭ ରନ୍ କରି ଜିତିଥିଲା। ତେବେ ଭାରତୀୟ ଟିମ୍ ଟେଷ୍ଟ କ୍ରିକେଟର ୯୨ ବର୍ଷର ଇତିହାସରେ ଘରେ ସବୁଠାରୁ ବଡ଼ ପରାଜୟ। କେବଳ ଏତିକି ନୁହେଁ ୩ ନଚେତ ତଦ୍ଦୁର୍ଦ୍ଧ ମ୍ୟାଚ୍ର ଟେଷ୍ଟ ସିରିଜରେ ଭାରତକୁ କ୍ଲିନ୍ ସୁଇପ୍ କରିଥିବା ନ୍ୟୁଜିଲାଣ୍ଡ ପ୍ରଥମ ଟିମ୍ ପାଲଟିଛି।