ନୂଆଦିଲ୍ଲୀ,୧୫।୨: ପ୍ରଦର୍ଶନ ସତ୍ତ୍ୱେ ଭାରତୀୟ ଟିମ୍ରୁ ବାଦ୍ ପଡ଼ିଛନ୍ତି ଓପନର୍ ଶିଖର ଧାଓ୍ବନ। ରୋହିତ ଶର୍ମା ଏବଂ କେ ଏଲ୍ ରାହୁଲଙ୍କୁ ବିଶ୍ରାମ ଦିଆଯିବା ସମୟରେ ନଭେମ୍ବରରେ ତାଙ୍କୁ ଟିମ୍ ଇଣ୍ଡିଆ ଅଧିନାୟକ କରାଯାଇଥିଲା। ହେଲେ ଏହାପରେ ତାଙ୍କୁ ସୁଯୋଗ ମିଳିନାହିଁ। ତାଙ୍କର ଏଭଳି ଦଳରୁ ବାହାରେ ରହିବାକୁ ନେଇ ମୁହଁ ଖୋଲିଛନ୍ତି କ୍ରିକେଟର।
୩୭ ବର୍ଷୀୟ ଧାଓ୍ବନ ଏକ ସାକ୍ଷାତକାରରେ କହିଛନ୍ତି, ଉତ୍ଥାନ-ପତନ ଜୀବନର ଏକ ଅଂଶ। ସମୟ ସହ ଅଭିଜ୍ଞତା ସହ ଜଣେ ତାକୁ ସହଜରେ ପରିଚାଳନା କରିବା ଶିଖିଯାଏ। ଏହା ଦ୍ୱାରା ମୋତେ ବହୁତ ଶକ୍ତି ମିଳିଛି। ମୁଁ ନିଜର ସର୍ବଶ୍ରେଷ୍ଠ ଦେଇଛି। ଯଦି କେହି ମୋ’ଠାରୁ ଭଲ କରୁଛି ତେବେ କୌଣସି ଅଭିଯୋଗ ନାହିଁ। କାରଣ ସେଥିଲାଗି ଉକ୍ତ ବ୍ୟକ୍ତି ଦଳରେ ଅଛନ୍ତି, ମୁଁ ନାହିଁ। ମୁଁ ଯେଉଁଠି ବି ଅଛି, ଖୁସି ଏବଂ ସନ୍ତୁଷ୍ଟ ଅଛି। ମୋର ପ୍ରକ୍ରିୟା ଶକ୍ତିଶାଳି ହେଉ ବୋଲି ସୁନିଶ୍ଚିତ କରିବାକୁ ଚାହେଁ। ନିଶ୍ଚିତ ଭାବେ ଦଳକୁ ଫେରିବାର ସୁଯୋଗ ସର୍ବଦା ଥାଏ। ଯଦି ପୁଣି ଥରେ ଦଳକୁ ଫେରେ ତେବେ ମୋ ପାଇଁ ଭଲ ହେବ। ଯଦି ତାହା ନ ହୁଏ ତେବେ ମଧ୍ୟ ଏହା ଭଲ। ମୁଁ ବହୁତ କିଛି ହାସଲ କରିଦେଇଛି। ନିଜର ସଫଳତାକୁ ନେଇ ଖୁସି ଅଛି। ମୋର ଯାହା ମୁଁ ତାହା ପାଇବି। ମୁଁ କୌଣସି ବିଷୟରେ ହତାଶ ନୁହେଁ ବୋଲି ସେ କହିଛନ୍ତି।
ଧାଓ୍ବନ ୨୦୧୮ରେ ନିଜର ଅନ୍ତିମ ଟେଷ୍ଟ ଏବଂ ୨୦୨୧ରେ ଅନ୍ତିମ ଅନ୍ତର୍ଜାତୀୟ ଟି୨୦ ମୁକାବିଲା ଖେଳିଥିଲେ। ଏହାପରଠାରୁ ସେ ଦିନିକିଆ ଟିମ୍ରେ ଖେଳୁଥିଲେ। ଆଗାମୀ ଦିନରେ ଆଇପିଏଲ୍ର ପଞ୍ଜାବ କିଙ୍ଗ୍ସ ଟିମ୍ର ଅଧିନାୟକ ଭାବେ ତାଙ୍କୁ ଦେଖିବାକୁ ମିଳିବ। ସେ ଏହାକୁ ନେଇ ଏବେ ପ୍ରସ୍ତୁତି ଚଳାଇଛନ୍ତି।