ନୂଆଦିଲ୍ଲୀ,୧୨।୮: ଲଣ୍ଡନରେ ଥିବା ଲଡ୍ସ କ୍ରିକେଟ ଗ୍ରାଉଣ୍ଡ ଭାରତୀୟ କ୍ରିକେଟ ଟିମ୍ ପାଇଁ ଭଲ ସାବ୍ୟସ୍ତ ହୋଇନାହିଁ। ଏଠାରେ ଖେଳାଯାଇଥିବା ଟେଷ୍ଟ ଇତିହାସରେ ଭାରତ କେବଳ ଦୁଇଟି ମ୍ୟାଚ୍ ଜିତିଛି। ଏଯାବତ ୧୮ ଟେଷ୍ଟ ଖେଳିଥିଲେ ହେଁ ଦଳ ସର୍ବଦା ସଂଘର୍ଷ କରିଥିବା ନଜର ଆସିଛି। ସାତ ବର୍ଷ ପୂର୍ବେ ଏହି ଗ୍ରାଉଣ୍ଡରେ ଶେଷ ଥର ପାଇଁ ଭାରତ ଏକ ଟେଷ୍ଟ ମ୍ୟାଚ୍ ଜିତିଥିଲା।
୨୦୧୮ ମସିହାରେ ଭାରତୀୟ ଦଳ ଇଂଲଣ୍ଡ ଗସ୍ତ କରିଥିଲା। ସେତେବେଳେ ଏହି ଲଡ୍ସରେ ଟେଷ୍ଟ ସିରିଜର ଦ୍ୱିତୀୟ ମ୍ୟାଚ୍ ଖେଳାଯାଇଥିଲା। ଉକ୍ତ ଦିନ ମଧ୍ୟ ଅଗଷ୍ଟ ୧୨ ଥିଲା। ସେହି ମ୍ୟାଚ୍ରେ ଇଂଲଣ୍ଡ ଟିମ୍ ଭାରତୀୟ ଦଳକୁ ଶୋଚନୀୟ ଭାବେ ହରାଇଥିଲା। ଏଥର ଖେଳାଳିମାନଙ୍କୁ ସେହି ପରାଜୟରୁ ଶିକ୍ଷା କରି ପଡ଼ିଆକୁ ଓହ୍ଲାଇବାକୁ ପଡ଼ିବ ବୋଲି କୁହାଯାଉଛି।
ଉକ୍ତ ଟେଷ୍ଟରେ ଇଂଲଣ୍ଡ ଟସ୍ ଜିତି ଭାରତକୁ ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲା। ବିରାଟ କୋହଲିଙ୍କ ନେତୃତ୍ୱରେ ଭାରତୀୟ ଦଳ ପ୍ରଥମ ଇନିଂସରେ ୧୦୭ରେ ଅଲଆଉଟ୍ ହୋଇଥିଲା। ଜବାବରେ ଜୋ ରୁଟ୍ଙ୍କ ନେତୃତ୍ୱାଧୀନ ଇଂଲଣ୍ଡ ଟିମ୍ ୭ ଉଇକେଟ ହରାଇ ୩୯୬ ରନ୍ କରି ଇନିଂସ ଘୋଷଣା କରିଥିଲେ। ଦ୍ୱିତୀୟ ଇନିଂସରେ ଭାରତୀୟ ଟିମ୍ ୪୭ ଓଭର ଖେଳି ମାତ୍ର ୧୩୦ ରନ୍ କରିଥିଲା। ଶେଷରେ ଇଂଲଣ୍ଡ ସେହି ମ୍ୟାଚ୍କୁ ଏକ ଇନିଂସ ଏବଂ ୧୫୯ରନ୍ରେ ଜିତିଥିଲା।
ସେହି ମ୍ୟାଚ୍ରେ ହିରୋ ଥିଲେ ଇଂଲଣ୍ଡର କ୍ରିସ୍ ଓ୍ବୋକ୍ସ। ସେ ପ୍ରଥମ ଥର ପାଇଁ ନିଜର ବ୍ୟାଟିଂ ଦକ୍ଷତା ଦେଖାଇଥିଲେ। ଦଳ ୮୯ ରନ୍ରେ ୪ ଉଇକେଟ ହରାଇଥିବା ବେଳେ ଓ୍ବୋକ୍ସ ସାତ ନମ୍ବରରେ ଖେଳିବାକୁ ଆସି ଅପରାଜିତ ୧୩୭ ରନ୍ କରି ‘ମ୍ୟାନ୍ ଅଫ୍ ଦ ମ୍ୟାଚ୍’ ହୋଇଥିଲେ। ଅପରପକ୍ଷେ ଭାରତର ପରାଜୟ ପାଇଁ ଅଧିକାଂଶ ବ୍ୟାଟ୍ସମ୍ୟାନ୍ମାନେ ଦାୟୀ ଥିଲେ। ବୋଲର୍ଙ୍କ ଇଶାନ୍ତ ଶର୍ମା ଖରାପ ବୋଲିଂ କରି ଇଂଲଣ୍ଡକୁ ଅଧିକ ରନ୍ କରିବାକୁ ସୁଯୋଗ ଦେଇଥିଲେ।
ଏବେ ଏହି ମ୍ୟାଚ୍କୁ ତିନି ବର୍ଷ ବିତିଯାଇଥିବା ବେଳେ ପୁଣି ଥରେ ଉଭୟ ଟିମ୍ ମଧ୍ୟରେ ସମାନ ପଡ଼ିଆରେ ଦ୍ୱିତୀୟ ଟେଷ୍ଟ ହେବାକୁ ଯାଉଛି। ପୂର୍ବ ମ୍ୟାଚ୍ର ପୁନରାବୃତ୍ତି ଯେପରି ନ ହେଉ ତାହା ପ୍ରଶଂସକ ଆଶା ରଖିଛନ୍ତି।