ନୂଆଦିଲ୍ଲୀ,୨୧।୨: ଅନ୍ତର୍ଜାତୀୟ କ୍ରିକେଟରେ ପଦାର୍ପଣ କରିବା ପରେ ଚର୍ଚ୍ଚାରେ ରହିଛନ୍ତି ଭାରତର ଯୁବ ବ୍ୟାଟର ଜଶସ୍ବୀ ଜୈସ୍ବାଲ। ଟେଷ୍ଟଠାରୁ ଆରମ୍ଭ କରି ଟି୨୦ ରେ ନିଜର ପ୍ରତିଭା ମାଧ୍ୟମରେ ସମସ୍ତଙ୍କୁ ପ୍ରଭାବିତ କରି ପାରିଛନ୍ତି। ଟେଷ୍ଟ ପଦାର୍ପଣରେ ଶତକ ହାସଲ କରିବା ପରେ ମାତ୍ର କେଇଟା ମ୍ୟାଚରେ ଦୁଇଟି ଦ୍ୱିଶତକ ହାସଲ କରି ସାରିଲେଣି।
ଜୈସ୍ବାଲ ଏକ ଗରିବ ପରିବାରରୁ ଆସିଥିଲା ବେଳେ କ୍ରିକେଟ ଖେଳିବା ପାଇଁ ସେ ଅନେକ ତପସ୍ୟା କରିଛନ୍ତି। ଯାହାର ଫଳ ଏବେ ତାଙ୍କୁ ମିଳିବା ଆରମ୍ଭ ହୋଇଛି। ପିଲାଦିନୁ ତାଙ୍କର ସଂଘର୍ଷ ବିଷୟରେ ଲୋକମାନେ ଅନେକ ଜାଣିଛନ୍ତି। ଏବେ ଜୈସ୍ବାଲଙ୍କ ଖୁସିର ଦିନ ଆରମ୍ଭ ହୋଇଛି। ରିପୋର୍ଟ ଅନୁଯାୟୀ ଜଶସ୍ବୀ ମୁମ୍ବାଇରେ ଏକ ବିଳାସପୂର୍ଣ୍ଣ ଫ୍ଲାଟ କିଣିଛନ୍ତି।
ମନି କଣ୍ଟ୍ରୋଲ୍ ରିପୋର୍ଟ ଅନୁଯାୟୀ କ୍ରିକେଟର ଜୈସ୍ବାଲ ବାନ୍ଦ୍ରା ପୂର୍ବର ଏକ ସ୍ଥାନରେ ୫.୩୮ କୋଟି ଟଙ୍କାରେ ଫ୍ଲାଟ କିଣିଛନ୍ତି। ଏଥିରେ କୁହାଯାଇଛି ଯେ ଏହି ନିର୍ମାଣାଧୀନ ୧,୧୧୦ ବର୍ଗଫୁଟ ବିଶିଷ୍ଟ ଆପାର୍ଟମେଣ୍ଟ ପାଇଁ ଡିଲ୍ ଜାନୁୟାରୀ ୭, ୨୦୨୪ ରେ ପଞ୍ଜୀକୃତ ହୋଇଥିଲା।
ଏହି ନିର୍ମାଣାଧୀନ ପ୍ରକଳ୍ପ ଆଦାନୀ ରିଅଲିଟି ନିର୍ମାଣ କରୁଛି। ଆପାର୍ଟମେଣ୍ଟର ନିର୍ମାଣ ଏବଂ ହସ୍ତାନ୍ତର ଚଳିତ ବର୍ଷ ହୋଇପାରେ।