ବାରିପଦା ଅଫିସ, ୧ା୧୧:ଆଦିବାସୀ ଅଧ୍ୟୁଷିତ ମୟୂରଭଞ୍ଜ ଜିଲାରେ ଚୋରି, ଡକାୟତି, ଛିନତାଇ, ବଳାତ୍କାର ଓ ଠକେଇ ଭଳି ଅପରାଧ ବଢ଼ିବାରେ ଲାଗିଛି। ଅପରାଧର କାର୍ପଟଦାର ସାଜିଛନ୍ତି ଭଡ଼ାଟିଆ। ପଶ୍ଚିମବଙ୍ଗର ମୁର୍ଶିଦାବାଦରୁ ଆସି କାୟା ବିସ୍ତାର କରିବାରେ ଲାଗିଛନ୍ତି କିଛି ଅସାମାଜିକ। ବିନା ପ୍ରମାଣପତ୍ରରେ ଘରମାଲିକମାନେ ଭଡ଼ା ସୂତ୍ରରେ ରଖୁଥିବାରୁ ସେମାନଙ୍କ ଉପରେ କାହାର ନିୟନ୍ତ୍ରଣ ରହୁନାହିଁ। ଜିଲାରେ ବେକାରି ସମସ୍ୟା ବୃଦ୍ଧି ପାଇବା କାରଣରୁ ଅନେକ ଯୁବକ ଦାଦନ ଖଟିବା ପାଇଁ ବାହାର ରାଜ୍ୟକୁ ଯାଉଛନ୍ତି। ଶ୍ରମଜୀବୀଙ୍କ ଅଭାବ ପୂରଣ ପାଇଁ ବାହାର ରାଜ୍ୟରୁ ଆସୁଥିବା କେତେଜଣ କୁଶଳୀ ଶ୍ରମିକ ଆପରାଧିକ କାର୍ଯ୍ୟକଳାପରେ ଲିପ୍ତ ରହୁଛନ୍ତି। ମ୍ୟୁନିସିପାଲିଟି ଓ ପୋଲିସ ପକ୍ଷରୁ କଡ଼ାକଡ଼ି ଯାଞ୍ଚ କରାଯାଉ ନ ଥିବାରୁ ସେମାନଙ୍କ ଚେର ମୁର୍ଶିଦାବାଦରୁ ମୟୂରଭଞ୍ଜ ପର୍ଯ୍ୟନ୍ତ ଲମ୍ବିବାରେ ଲାଗିଛି। ଅନ୍ୟପକ୍ଷରେ ସେମାନଙ୍କୁ ଥଇଥାନ କରି ରାଜନୈତିକ ଫାଇଦା ହାସଲ ମଧ୍ୟ କରାଯାଉଛି। ଜିଲା କିମ୍ବା ପୋଲିସ ପ୍ରଶାସନ ଏଥିପ୍ରତି ପଦକ୍ଷେପ ଗ୍ରହଣ କରୁ ନ ଥିବାରୁ ଅଞ୍ଚଳବାସୀ ନିଜକୁ ଅସୁରକ୍ଷିତ ମଣୁଛନ୍ତି।
ଶିଳ୍ପବିହୀନ ମୟୂରଭଞ୍ଜ ଜିଲାର ଅନେକ ଯୁବତୀ ଯୁବକ କାମଧନ୍ଦା ନ ପାଇ ବେକାର ହୋଇ ବୁଲୁଛନ୍ତି। ୨୦୧୧ଜନଗଣନା ଅନୁଯାୟୀ ଜିଲାରେ ୨୫ଲକ୍ଷରୁ ଊର୍ଦ୍ଧ୍ୱ ଲୋକ ବସବାସ କରୁଛନ୍ତି। ସେମାନଙ୍କ ମଧ୍ୟରୁ ଶତକଡ଼ା ୬୫ ପ୍ରତିଶତ ଶ୍ରମିକ ଓ ଦିନ ମଜୁରିଆ ଶ୍ରେଣୀର ହୋଇଥିବା ବେଳେ ବାହାର ରାଜ୍ୟମାନଙ୍କୁ ୩୫ଭାଗ ଗରିବ ଆଦିବାସୀ ଶ୍ରେଣୀର ଲୋକେ ଦାଦନ ଖଟିବାକୁ ଯାଇଥାନ୍ତି। ୨୫ଭାଗ ଶ୍ରମିକ ବର୍ଗର ଲୋକେ ଜାତୀୟ ଖାଦ୍ୟ ସୁରକ୍ଷା ଯୋଜନାରେ ଅନ୍ତର୍ଭୁକ୍ତ ହୋଇ ଶ୍ରମ ଛାଡ଼ି ଦେଇଛନ୍ତି। ଫଳରେ କାମଧନ୍ଦା କରିବାକୁ ଶ୍ରମଜୀବୀ ମିଳୁ ନାହାନ୍ତି। ଏହାର ସୁଯୋଗ ନେଇ ଘରୋଇ କାମ ସହିତ ସରକାରୀ ଓ ବେସରକାରୀ ନିର୍ମାଣ କାମରେ ଶ୍ରମିକ ଭାବେ ପଶ୍ଚିମବଙ୍ଗ, ବାଂଲାଦେଶ, ଢାକା ଓ ବିହାର ଅଞ୍ଚଳର ବିଭିନ୍ନ ସ୍ଥାନରୁ କାରିଗର ଓ ମିସ୍ତ୍ରିମାନେ ଆସି ଜିଲାବାସୀଙ୍କ ଚାହିଦା ପୂରଣ କରୁଛନ୍ତି। ଦିନରେ କାମ କରି ରାତି ହେଲେ ସେମାନେ ଆପରାଧିକ କାର୍ଯ୍ୟକଳାପରେ ଲିପ୍ତ ରହୁଛନ୍ତି। ଜିଲାର କୋଣ ଅନୁକୋଣରେ ଏମାନଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ବିଭିନ୍ନ ପୋଲିସ ପ୍ରଶାସନ ପାଇଁ ଏହା ମୁଣ୍ଡବ୍ୟଥାର କାରଣ ସାଜିଥିବା ବେଳେ ଅପରାଧକୁ ରୋକିବାରେ ବିଫଳ ହେଉଛି। ସେହିପରି କିଛି ଅସାଧୁ ବ୍ୟକ୍ତି ଅର୍ଥଲୋଭରେ ସେମାନଙ୍କୁ ବାସସ୍ଥାନର ପରିଚୟ ଦେଇ ଭୋଟର ତାଲିକାରେ ଯୋଡିବାକୁ ପ୍ରୟାସ ଆରମ୍ଭ କରିଛନ୍ତି। ବାରିପଦା ସହରରେ ରହୁଥିବା ମାଲିକମାନେ ଠିକ ଯାଞ୍ଚ ନ କରି ସେମାନଙ୍କୁ ଘରେ ରହିବାକୁ ଅନୁମତି ଦେଉଛନ୍ତି। ଏପରିକି ସେମାନଙ୍କ ଆଧାର କାର୍ଡ, ଭୋଟର କାର୍ଡ ଓ ବାସସ୍ଥାନ ପ୍ରମାଣପତ୍ର ଦେଇ ଭଡ଼ା ଦେବାକୁ ନିୟମ ରହିଥିଲେ ସୁଦ୍ଧା ଏହାକୁ ଯାଞ୍ଚ କରାଯାଉନାହିଁ।
କିଛି ଦିନ ପୂର୍ବେ ବୈଶିଙ୍ଗା ଓ ଉଦଳା ଥାନା ଅଞ୍ଚଳରେ ହେଉଥିବା ଲଗାତାର ଚୋରି ଘଟଣାରେ ୬ଜଣ ମୁର୍ଶିଦାବାଦର ମିସ୍ତ୍ରି ସମ୍ପୃକ୍ତ ଥିବା ନେଇ ପୋଲିସ ଏକ ଖବରଦାତା ସମ୍ମିଳନୀରେ ସୂଚନା ଦେଇଥିଲା। ଝାରପୋଖରିଆ, ବିଶୋଇ, ଖୁଣ୍ଟା,କୁଳିଅଣା ଓ ବେତନଟୀ ଥାନାରେ ମଧ୍ୟ ଏଭଳି ଅପରାଧ ସମ୍ପର୍କିତ ମାମଲା ରୁଜୁ ହୋଇଛି। ଅପରାଧ ଘଟାଇ ନିଜ ରାଜ୍ୟକୁ ପଳାଇବା ପରେ ଜିଲା ପୋଲିସ ସେମାନଙ୍କ ଟେର୍ ପାଉନି। ପୁଣି କିଛି ଦିନ ପରେ ସେମାନେ ସ୍ଥାନ ବଦଳାଇ ଜିଲାରେ ଆପରାଧିକ କାର୍ଯ୍ୟକଳାପରେ ଲିପ୍ତ ରହୁଛନ୍ତି।
ଏ ସଂକ୍ରାନ୍ତରେ ବିକାଶ ମଞ୍ଚର ଆବାହକ ହରିଶଚନ୍ଦ୍ର ନନ୍ଦ ଗୋସ୍ବାମୀ କୁହନ୍ତି, କାମଧନ୍ଦା ମିଳୁ ନ ଥିବାରୁ ଜିଲାର ଯୁବକମାନେ ବାହାର ରାଜ୍ୟକୁ ଦାଦନ ଖଟିବାକୁ ଯାଉଛନ୍ତି। କୁଶଳୀ ଶ୍ରମିକ କିମ୍ବା କାରିଗର ନ ଥିବାରୁ ପଡ଼ୋଶୀ ରାଜ୍ୟରୁ ଆସୁଥିବା ଲୋକେ ଏହାର ସୁଯୋଗ ନେଇ ଅପରାଧ ଘଟାଇବାରେ ଲାଗିଛନ୍ତି।
ତେବେ ଜିଲାରେ ପୋଲିସ କର୍ମଚାରୀଙ୍କ ସଂଖ୍ୟା କମ୍ ରହୁଥିବାରୁ ଅପରାଧ ନିୟନ୍ତ୍ରଣ ହୋଇପାରୁନି ବୋଲି ଜଣେ ପୋଲିସ ଅଧିକାରୀ କହିଛନ୍ତି। ବାରିପଦା ମ୍ୟୁନିସିପାଲିଟିର ଅଧ୍ୟକ୍ଷ କୃଷ୍ଣାନନ୍ଦ ମହାନ୍ତିଙ୍କୁ ପଚାରିବାରୁ ଯାଞ୍ଚ କରିବା କାମ ପୋଲିସର। ଘରଭଡ଼ା ଦେଉଥିବା ବ୍ୟକ୍ତି ସମସ୍ତ ପ୍ରମାଣପତ୍ର ରଖି ପୋଲିସକୁ ଅବଗତ କରିବାର ନିୟମ ରହିଛି ବୋଲି ସେ କହିଛନ୍ତି। ଏ ସଂକ୍ରାନ୍ତରେ ବାରିପଦା ଟାଉନ ଥାନାଧିକାରୀ ବୀରେନ୍ଦ୍ର ସେନାପତି କୁହନ୍ତି, ଘରଭଡ଼ା ଦେଉଥିବା ମାଲିକମାନେ ମ୍ୟୁନିସିପାଲିଟିକୁ ଜଣାଇବେ। ଏହା ପୋଲିସର କାମ ନୁହେଁ।