ବରଗଡ଼ ଅଫିସ,୩।୧୦: ବରଗ ଜିଲାରେ ନିଶା କାରବାର ବଢି ଚାଲିଛି। କଫ ସିରପ୍, ନିଶା ବଟିକା ଆଦି ସେବନ କରି ଯୁବପିଢି ପଥଭ୍ରଷ୍ଟ ହେଉଛନ୍ତି। ଏପରିକି ଚୋରି, ଡକାୟତି, ଲୁଟପାଟଠାରୁ ଆରମ୍ଭ କରି ହତ୍ୟାକାଣ୍ଡ ଭଳି ଅପରାଧ ଘଟାଇ ଚାଲିଛନ୍ତି ବୋଲି ବରଗଡ଼ ଜିଲା ଅଭିଭାବକ ସଂଘ ଅଭିଯୋଗ କରିଛି । ସହରର ବିଭିନ୍ନ ସ୍ଥାନରେ ମଧ୍ୟ ଏଭଳି ନିଶା କାରବାର ଅବାଧରେ ଚାଲିଥିବା ଅଭିଯୋଗ ହୋଇଛି। ଏଥିପାଇଁ କୋମଳମତି ପିଲାମାନଙ୍କ ଉପରେ ଏହାର କୁପ୍ରଭାବ ପଡୁଛି। ଫଳରେ ନିଶା କାରବାର ରୋକିବା ଦିଗରେ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଭିଭାବକ ସଂଘ ଦାବି କରିଛି। ଏହି ଦାବି ନେଇ ଅଭିଭାବକ ସଂଘ ପକ୍ଷରୁ ଶନିବାର ଏସ୍ପି ପଦ୍ମିନୀ ସାହୁଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି। ସଂଘର ଆବାହକ ବିମଳ କୁମାର ଦାଶ, ସୁଜିତ ମିଶ୍ର, ସୁଶାନ୍ତ ହୋତା ପ୍ରମୁଖ ସ୍ମାରକପତ୍ର ପ୍ରଦାନ ସମୟରେ ଉପସ୍ଥିତ ଥିଲେ।