ପୁରୀ ଅଫିସ,୨୭।୩: ପୁରୀର ବରିଷ୍ଠ ସେବାୟତ କୃଷ୍ଣଚନ୍ଦ୍ର ଓରଫ କାଳିଆ ପ୍ରତିହାରୀ ହତ୍ୟା ମାମଲାରେ ଗିରଫ ଅଭିଯୁକ୍ତଙ୍କୁ ରିମାଣ୍ଡରେ ଆଣି ପୋଲିସ କ୍ରାଇମସିନ୍ ରିକ୍ରିଏସନ୍ କରିଛି। ହତ୍ୟାକାଣ୍ଡ ଘଟିଥିବା ବାରବାଟୀ ଜାଗାରେ ଅଭିଯୁକ୍ତ ଡେମୋ ଦେଖାଇଛନ୍ତି। ବାରବାଟୀ ଜାଗା ପଛ ରାସ୍ତାଦେଇ ଦୁଇ ଅଭିଯୁକ୍ତ ପ୍ରଫୁଲ୍ଲ ମହାପାତ୍ର(ଟୁଟୁ) ଓ ଲକ୍ଷ୍ମଣ ସୁଆର(କୁନୁମୁନି)ଙ୍କୁ ବାରବାଟୀ ଜାଗା ପାଖକୁ ନିଆଯାଇଥିଲା। କାଳିଆଙ୍କୁ କିଭଳି ହତ୍ୟା କଲେ ତାହାର ଡେମୋ ଦେବା ପାଇଁ ଅଭିଯୁକ୍ତଙ୍କୁ ଅତିରିକ୍ତ ଏସ୍ପି ମିହିର ପଣ୍ଡା କହିଥିଲେ। କୁନୁମୁନି ନୃସିଂହଙ୍କ ମନ୍ଦିର ସମ୍ମୁଖରେ କାଳିଆଙ୍କ ସହ ବସି ଆଲୋଚନା କରୁଥିବାବେଳେ ଟୁଟୁ ମହାପାତ୍ର ନୃସିଂହଙ୍କୁ ମୁଣ୍ଡିଆ ମାରିବା ବାହାନାରେ ବାରବାଟୀ ଜାଗାରେ ପହଞ୍ଚତ୍ଥିଲେ। ଏହାପରେ କାଳିଆଙ୍କୁ ପଛପଟୁ ଟୁଟୁ ଗୁଳି ଚଳାଇଥିଲେ। କାଳିଆ ଘଟଣାସ୍ଥଳରେ ଟଳି ପଡ଼ିଥିବାବେଳେ ଅଭିଯୁକ୍ତମାନେ ସାଙ୍ଗରେ ଆଣିଥିବା ମୋଟର ସାଇକେଲରେ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଅଭିଯୁକ୍ତମାନେ ପଛ ରାସ୍ତା ଦେଇ ବାରବାଟୀ ଜାଗାରେ ପ୍ରବେଶ କରିଥିବାବେଳେ ହତ୍ୟାକାଣ୍ଡ ଭିଆଇବା ପରେ ଜାଗାର ସମ୍ମୁଖ ରାସ୍ତାଦେଇ ବାହାରକୁ ଚାଲି ଯାଇଥିଲେ ବୋଲି କ୍ରାଇମ୍ସିନ୍ ରିକ୍ରିଏସନ୍ ବେଳେ ଜଣାଇଥିଲେ। ସେହିଭଳି ଅନ୍ୟଦୁଇ ଅଭିଯୁକ୍ତ ହରି ପଣ୍ଡା ଓ ବାବା ମହାପାତ୍ର ଘଟଣାସ୍ଥଳରୁ ସାମାନ୍ୟ ଦୂରରେ ଥିଲେ। ପୋଲିସ ଶନିବାର ଏହି କ୍ରାଇମ୍ ସିନ୍ ରିକ୍ରିଏସନ୍ରେ ହରି ଏବଂ ବାବାଙ୍କୁ ସାମିଲ କରିନାହିଁ।
ସୂଚନା ଅନୁଯାୟୀ, ହରି ଏବଂ ବାବା ବାଇକ୍ ଧରି ବାରବାଟୀ ଜାଗାଠାରୁ ସାମାନ୍ୟ ଦୂରରେ ଠିଆ ହୋଇ ପାରିପାର୍ଶ୍ୱିକ ପରିସ୍ଥିତି ଉପରେ ନଜର ରଖୁଥିଲେ। ଯଦି କେହି ହଠାତ୍ ଚାଲିଆସିଲେ, ତେବେ ସେ ନେଇ ସୂଚନା ଦେବା ପାଇଁ ସେମାନଙ୍କୁ କୁହାଯାଇଥିଲା। କ୍ରାଇମସିନ୍ ରିକ୍ରିଏସନ୍ ପାଇଁ ଅତିରିକ୍ତ ଏସ୍ପି ମିହିର ପଣ୍ଡାଙ୍କ ନେତୃତ୍ୱରେ ଏକ ସ୍ବତନ୍ତ୍ର ତଦନ୍ତକାରୀ ଟିମ୍ ଗଠନ କରାଯାଇଥିଲା। ଅଭିଯୁକ୍ତମାନେ ୩ ଦିନିଆ ରିମାଣ୍ଡରେ ଆସିଥିବାବେଳେ ଏହି ସମୟ ମଧ୍ୟରେ ହେବାକୁ ଥିବା ଜେରା ଓ ତଦନ୍ତ ସ୍ବତନ୍ତ୍ର ତଦନ୍ତକାରୀ ଟିମ୍ କରୁଛି। ତେବେ କ୍ରାଇମ ସିନ୍ ରିକ୍ରିଏସନ୍ରେ ସାମିଲ ହୋଇପାରି ନ ଥିବା ଅନ୍ୟ ଦୁଇ ଅଭିଯୁକ୍ତଙ୍କୁ ପୁରୀ ଟାଉନ ଥାନାରେ ରଖାଯାଇଛି। ଏସ୍ପି କନ୍ୱର ବିଶାଲ ସିଂ କହିଛନ୍ତି ଯେ, ୪ ଅଭିଯୁକ୍ତଙ୍କୁ କୋର୍ଟ ୩ ଦିନିଆ ରିମାଣ୍ଡରେ ନେଇଛନ୍ତି। ତନ୍ମଧ୍ୟରୁ ୨ଜଣଙ୍କୁ ଶନିବାର ହତ୍ୟାକାଣ୍ଡସ୍ଥଳକୁ ନେଇ ସିନ୍ ରିକ୍ରିଏଶନ୍ କରାଯାଇଛି। ସେହିଭଳି ଅନ୍ୟଦୁଇ ଅଭିଯୁକ୍ତଙ୍କୁ ମଧ୍ୟ କ୍ରାଇମ୍ ସ୍ପଟ୍କୁ ନିଆଯିବ। ଯଥେଷ୍ଟ ସାକ୍ଷ୍ୟ ଓ ପ୍ରମାଣ ଯୋଗାଡ଼ କରି ଏକ ଚାର୍ଜଶିଟ୍ ଦାଖଲ କରିବା ଉପରେ ପୁରୀ ପୋଲିସ ଜୋର୍ ଦେଉଛି। ଏନେଇ ଏକ ସ୍ବତନ୍ତ୍ର ତଦନ୍ତକାରୀ ଟିମ୍ ଗଠନ ହୋଇଥିବାବେଳେ ଅତିରିକ୍ତ ଏସ୍ପି ମିହିର ପଣ୍ଡା ନେତୃତ୍ୱ ନେଇଛନ୍ତି। ଏହି ଟିମ୍ରେ ସିଟି ଡିଏସ୍ପି ଜନାର୍ଦ୍ଦନ ପାଢୀଙ୍କ ସମେତ ବଳିଆପଣ୍ଡା, ବାସେଳୀ ସାହି ଓ ଟାଉନଥାନା ଆଇଆଇସି ସାମିଲ ରହିଛନ୍ତି। ସାକ୍ଷ୍ୟ ପ୍ରମାଣ ଯୋଗାଡ଼ କରିବା ଓ ତଦନ୍ତ କରିବାର ସମ୍ପୂର୍ଣ୍ଣ ଦାୟିତ୍ୱ ଅତିରିକ୍ତ ଏସ୍ପିଙ୍କ ପାଖରେ ରହିଛି। ତଦନ୍ତ ସରିବା ପରେ ଚାର୍ଜଶିଟ୍ ଦାଖଲ କରାଯିବ।
