ସାକ୍ଷୀଗୋପାଳ,୧୬ା୧୦(ଡି.ଏନ୍.ଏ.): ପୁରୀ ଜିଲା ସତ୍ୟବାଦୀ ବ୍ଲକ ଦାଶବିଦ୍ୟାଧରପୁର ସରପଞ୍ଚ ହରିହର ନନ୍ଦଙ୍କୁ ଗୁରୁବାର ରାତିରେ ଦୁର୍ବୃତ୍ତମାନେ ଅତର୍କିତ ମରଣାନ୍ତକ ଆକ୍ରମଣ କରିଥିଲେ। ଏଥିରେ ସରପଞ୍ଚଙ୍କ ଡାହାଣ ହାତ ଦୁଇଟି ଆଙ୍ଗୁଠି କଟିଯାଇଛି । ମୁଣ୍ଡରେ ଗଭୀର ଆଘାତ ଲାଗିଛି। ଗ୍ରାମର ଗୋଟିଏ ଦୋକାନରେ ସେ ବସିଥିବା ବେଳେ ତାଙ୍କୁ ଆକ୍ରମଣ କରିଥିଲେ ଦୁର୍ବୃତ୍ତ। ସାକ୍ଷୀଗୋପାଳ ଡାକ୍ତରଖାନାରେ ପ୍ରାଥମିକ ଚିକିତ୍ସା କରାଯିବା ପରେ ଅବସ୍ଥା ଉଦ୍ବେଗଜନକ ଥିବାରୁ ଭୁବନେଶ୍ବର ସ୍ଥାନାନ୍ତର କରାଯାଇଛି। ସତ୍ୟବାଦୀ ପୋଲିସ ଅଭିଯୋଗ କ୍ରମେ ତଦନ୍ତ ଚଳାଇଛି। ତୁରନ୍ତ ଅଭିଯୁକ୍ତମାନଙ୍କୁ ଗିରଫ କରିବାକୁ ସ୍ଥାନୀୟ ଭାଜପା ନେତା ଓମ୍ ପ୍ରକାଶ ମିଶ୍ର ଦାବି କରିଛନ୍ତି। ଦୁଇଦିନ ତଳେ ଭାଜପାର ପ୍ରତିନିଧି ଦଳ କିର ଭୋଇଙ୍କୁ ଭେଟିବାକୁ ସେହି ଗ୍ରାମକୁ ଯାଇଥିଲେ ଓ ରାଜ୍ୟ ସରକାରଙ୍କ ଅପରଗତା ଯୋଗୁ ସ୍ତ୍ରୀଙ୍କ ଚିକିତ୍ସା ପାଇଁ ଦୀର୍ଘ ୯୦ କିଲୋମିଟର ଟ୍ରଲିରେ କଟକ ନେବା ଘଟଣାରେ ଟିପ୍ପଣୀ ରଖିଥିଲେ। ସେହି ସମୟରେ ସରପଞ୍ଚ ଉପସ୍ଥିତ ରହିଥିବାରୁ ତାଙ୍କୁ ଆକ୍ରମଣ କରାଯାଇଛି ବୋଲି ସେ କହିଛନ୍ତି।