ଧର୍ମଶାଳା/କାଏମା,୧୪ା୧୨(ବଟକୃଷ୍ଣ ପରିଡ଼ା/ଶିବପ୍ରସାଦ ମହାନ୍ତି):ଧର୍ମଶାଳା ଥାନା ଅଞ୍ଚଳରେ ଆପରାଧିକ କାର୍ଯ୍ୟକଳାପ ବଢ଼ିବାରେ ଲାଗିଛି। ଏଠାରେ ୭ ଦିନ ମଧ୍ୟରେ ୩ ଅପହରଣ ଉଦ୍ୟମ ଘଟଣା ଘଟିବା ପରେ ବିଦ୍ୟାଳୟ ଛାତ୍ରୀଛାତ୍ର ଓ ଅଭିଭାବଙ୍କଙ୍କ ମନରେ ଭୟର ବାତାବରଣ ଦେଖାଦେଇଛି। ସ୍କୁଲ୍କୁ ପିଲାଙ୍କୁ ଛାଡ଼ିବା ପାଇଁ ଅଭିଭାବକ ଭୟ କରୁଛନ୍ତି। ଚାରିଆଡ଼େ ଆଲୋଚନାର ବିଷୟ ପାଲଟିଛି ଏହି ଅପହରଣ ଉଦ୍ୟମ ଘଟଣା। ସ୍କୁଲ୍ ଯିବା ବାଟରେ ଛାତ୍ରୀଛତ୍ରଙ୍କୁ ଟାର୍ଗେଟ କରୁଛନ୍ତି ଅପହରଣକାରୀ। ଏମାନେ ବିଭିନ୍ନ ପ୍ରକାର ପ୍ରଲୋଭନ ଦେଖାଇ, ଡରାଇ ଧମକାଇ ପିଲାଙ୍କୁ ଅପହରଣ କରିବା ପାଇଁ ଉଦ୍ୟମ କରୁଛନ୍ତି। ସେହିପରି ରୋଡ ରୋମିଓଙ୍କ ସଂଖ୍ୟା ମଧ୍ୟ ବଢ଼ିବାରେ ଲାଗିଛି। ଦ୍ରୁତଗତିରେ ଗାଡ଼ି ଚାଳନା ସହ ବିକଟାଳ ଶବ୍ଦ କରି ଅଞ୍ଚଳରେ ହଇଚଇ ସୃଷ୍ଟି କରିଛନ୍ତି ରୋଡ୍ ରୋମିଓ।
ଗତ ୬ ତାରିଖରେ ଧର୍ମଶାଳା ଆଦର୍ଶ ବିଦ୍ୟାଳୟ ଛାତ୍ର ସାଇ ପ୍ରସାଦଙ୍କୁ ଅପହରଣ ଉଦ୍ୟମ ହୋଇଥିଲା। ଗତ ସୋମବାର ଜାରକା ଜମୁବଣିଆ ଅଞ୍ଚଳରେ ଥିବା ଗୁରୁକୁଳର ୫ମ ଶ୍ରେଣୀ ଛାତ୍ର ସୂର୍ଯ୍ୟଂଶୁ ବାରିକ ସ୍କୁଲ୍ରୁ ଫେରୁଥିବା ସମୟରେ ତାଙ୍କ ଘର ନିକଟ ରାସ୍ତାରେ ଦୁଇ ଯୁବକ ବାଇକ୍ରେ ଆସି ତାଙ୍କୁ ଅଟକାଇ କୁରକୁରେ ଖାଇବାକୁ ଯାଚିଥିଲେ। ସେ ନିଜ ବୁଦ୍ଧି ବଳରେ ନିଜକୁ ବଞ୍ଚାଇଥିଲେ। ମଙ୍ଗଳବାର ଏହି ଅଞ୍ଚଳର ବାଣୀପୀଠ ବିଦ୍ୟାଳୟର ୭ମ ଶ୍ରେଣୀର ଜଣେ ଛାତ୍ରୀଙ୍କୁ କେହି ଦୁର୍ବୃତ୍ତ ଅପହରଣ ଉଦ୍ୟମ କରିଥିଲେ। ତାଙ୍କୁ ଅଚେତ ଅବସ୍ଥାରେ ଏକ ବୁଦାମୂଳରୁ ଉଦ୍ଧାର କରାଯାଇଥିଲା। ସ୍କୁଲ ଯାଉଥିବା ସମୟରେ ୩ ଅପରିଚିତ ଯୁବକ ତାଙ୍କୁ ବାଟରେ ଅଟକାଇ ତାଙ୍କ ମୁଣ୍ଡକୁ ଆଘାତ କରିଥିଲେ। ଫଳରେ ଛାତ୍ରୀ ଜଣଙ୍କ ଚେତାଶୂନ୍ୟ ହୋଇଯାଇଥିଲେ। ପରିବାର ଲୋକେ ଧର୍ମଶାଳା ଥାନାର ଦ୍ବାରସ୍ଥ ହୋଇଥିଲେ। ଛାତ୍ରୀ ଜଣଙ୍କ ବ୍ୟାଗରେ ଥିବା ମୋବାଇଲକୁ ଟ୍ରାକ କରି ତାଙ୍କୁ ଉଦ୍ଧାର କରାଯାଇଥିଲା। ଏବେ ସେ କଟକ ବଡ଼ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି। ଏସବୁ ଘଟଣାରେ ସମ୍ପୃକ୍ତ ସମସ୍ତ ଅଭିଯୁକ୍ତଙ୍କୁ ତୁରନ୍ତ ଗିରଫ ପାଇଁ ଦାବି ହୋଇଛି। ଏ ସମ୍ପର୍କରେ ଯାଜପୁର ଏସ୍ଡିପିଓ ସଞ୍ଜୟ କୁମାର ପଟ୍ଟନାୟକଙ୍କୁ ପଚାରିବାରେ ସେ କହିଛନ୍ତି, ଏହା ଉପରେ ନଜର ରଖାଯିବା ସହ ଅଞ୍ଚଳରେ କଡ଼ାକଡ଼ି ଯାଞ୍ଚ ଉପରେ ଦୃଷ୍ଟି ଦିଆଯିବ।